نبیل کا اردو بلاگ Nabeel's Urdu Blog

اردو سیارہ اپڈیٹ

2010-07-22T22:31:00.005+02:00

السلام علیکم،

ذیل کے بلاگز کو اردو سیارہ میں شامل کر لیا گیا ہے۔

ایم اے امین
روشنی اردو میگزین
عامر شہزاد
ضیاء الحسن خان
عادل بھیا
سمارا
اپنا ڈیرہ
رومی
نعیم اکرام ملک
کاشف نصیر
یاسر جاپانی
امتیاز خان
حجابِ شب
فکر پاکستان
عثمان
عطا محمد تبسم
بلا امتیاز
دوسرا رخ

اب آپ ان بلاگرز کو خوش آمدید کہہ سکتے ہیں۔ اگر میں نے غلطی سے کسی بلاگ کو دوبارہ شامل کر لیا ہے یا کوئی بلاگ شامل ہونے سے رہ گیا ہے تو برائے مہربانی مجھے اس کے بارے میں اطلاع کر دیں۔ اس کے لیے آپ اس پوسٹ پر تبصرہ کر سکتے ہیں یا پھر planet@urduweb.org پر اس کے بارے میں پیغام بھیج سکتے ہیں۔ ایک صاحب نے اپنے نام کی جگہ Md لکھا ہوا ہے۔ میں نے ان سے درخواست کی ہے وہ کسی بہتر نام یا نک کا انتخاب کریں۔ اس کے علاوہ میرے ایک محترم دوست نے ایک سائٹ کی اردو سیارہ میں شمولیت کے لیے کہا تھا جو کہ کوئی بلاگ نہیں بلکہ ایک فورم کا لینڈنگ پیج ہے۔ اس سائٹ کو اردو سیارہ میں شامل نہیں کیا جا سکتا۔ اس کے لیے معذرت چاہتا ہوں۔ میں نے بالا کے بلاگز کو تفصیل سے نہیں دیکھا ہے۔ بہرحال میں امید کرتا ہوں کہ سب اردو بلاگرز ذمہ داری کا مظاہرہ کریں گے اور اردو کی ترویج میں اپنا حصہ ڈالیں گے۔

میں گزشتہ چند روز سے اردو سیارہ کی ڈائنامکس پر غور کرتا آیا ہوں اور اسی نتیجے پر پہنچا ہوں کہ اتفاق یا بدقسمتی سے اردو سیارہ ایک کمیونٹی سائٹ بن چکی ہے، اور اس کی اسی انداز میں نظامت بھی کی جانی ضروری ہوگی۔ میں اس کے بارے میں علیحدہ سے پوسٹ کروں گا۔ نوٹ کریں کہ جب تک اردو سیارہ کی نظامت کا مستقل بندوبست نہیں ہو جاتا، اس وقت تک میں اردو سیارہ کا نظام سنبھالتا رہوں گا، اگرچہ میں بھی اسے زیادہ وقت نہیں دے پاؤں گا۔

والسلام

کچھ اردو سیارہ کے بارے میں

2010-07-17T17:55:00.000+02:00

السلام علیکم،
گزشتہ کچھ عرصے چند اردو بلاگز پر جاری ایک صورتحال کے تناظر میں اردو سیارہ پر بھی تنقید کی جاتی رہی ہے۔ میں اس ضمن میں چند گزارشات پیش کرنا چاہتا ہوں۔ اردو سیارہ کے انتظامی امور کی نگرانی زکریا کرتے آئے ہیں لیکن اب وہ عدیم الفرصتی کی بناء پر اس جانب توجہ نہیں کر پا رہے ہیں۔ یہی وجہ تاخیر کا باعث بھی بنی۔ میں حتی الامکان اردو سیارہ کی نظامت سے دور رہنا چاہتا ہوں۔ لیکن مجبورا مجھے ہی اس سلسلے میں کچھ اقدامات کرنے پڑے ہیں۔ ابھی دو بلاگز کو اردو سیارہ سے ہٹایا گیا ہے اور اس بات کا پورا امکان ہے کہ مزید بلاگز بھی ہٹا دیے جائیں گے۔ جہاں تک اردو سیارہ پر کی جانے والی تنقید کا تعلق ہے تو میں اس بات کو تسلیم کرتا ہوں کہ کوئی ایکشن لینے میں تاخیر ہوئی ہے۔ جن دوستوں کو بھی اس سے کوفت پہنچی ہے میں ان سے معذرت خواہ ہوں۔ میں اس کی وجہ اوپر بیان کر چکا ہوں۔ لیکن میں اس کے ساتھ یہ واضح کر دینا چاہتا ہوں کہ اردو سیارہ محض ایک فیڈ ایگریگیٹر ہے اور اس کو کمیونٹی سائٹ سمجھنا غلط ہے۔ جو لوگ دیر سے ایکشن لیے جانے پر تنقید کر رہے ہیں وہ اس میں حق بجانب ہیں۔ اس کے علاوہ تنقید کو میں بلاجواز سمجھتا ہوں۔ جن لوگوں کے بلاگز کو اردو سیارہ سے ہٹایا گیا ہے، میں ان سے معذرت چاہتا ہوں۔ میرے پاس اس کے علاوہ کوئی راستہ نہیں رہا تھا۔
والسلام

لا فیورا روخا کی جیت

2010-07-13T23:28:00.003+02:00

سپین کی فٹ بال ٹیم جسے سرخ طوفان بھی کہا جاتا ہے، نے 2008 کا یورپین کپ جیتنے کے دو سال بعد ہی ورلڈ کپ بھی جیت کر ایک نئی تاریخ رقم کر دی ہے۔ گزشتہ بار کے ورلڈ کپ کے فاتح اٹلی اور اس مرتبہ کے چیمپین سپین میں جو بات مشترک ہے وہ دونوں ملکوں کے باشندوں کے مزاج کی مماثلت ہے۔ اٹلی اور سپین کے لوگ جس طرح فٹ بال کے میدان میں فتح کا جشن مناتے ہیں، کرکٹ کے شائقین شاید اس کا تصور بھی نہیں کر سکتے ہیں۔ اگرچہ میرا دل جرمنی کے ساتھ ہے، لیکن سپین کی فٹ ٹیم بال کے کھیل نے بھی مجھے اپنا گرویدہ کر لیا ہے۔ 2008 کے یورپین کپ کے فائنل میں بھی سپین نے جرمنی کو ایک-صفر سے شکست دی تھی۔ اس مرتبہ کے ورلڈ کپ میں دونوں ٹیموں کا آمنا سامنا سیمی فائنل میں ہوا اور نتیجہ پھر وہی رہا۔ اسی سال یورپین چیمپین شپ کا فائنل بھی جرمنی کے کلب بائرن میونخ اور سپین کے کلب بارسلونا کے درمیان کھیلا گیا اور یہ میچ بھی بارسلونا نے جیتا تھا۔ سپین کی قومی فٹ بال ٹیم کے بیشتر کھلاڑیوں کا تعلق بارسلونا کے کلب سے ہی ہے۔ اور سپین کی ٹیم کے چھوٹے پاسوں والا اور تیز رفتار حملوں والا انداز بھی بارسلونا کے کلب میں پروان چڑھا تھا۔ مزے کی بات یہ ہے کہ بارسلونا کی ٹیم کو یہ انداز سکھانے والے کوچ کا تعلق بھی ہالینڈ سے تھا۔ ورلڈ کپ کے فائنل میں ہالینڈ نے اگرچہ سپین کے مقابلے میں جرمنی کی نسبت بہتر کھیل پیش کیا لیکن انہیں جلد ہی معلوم ہو گیا کہ ان کی سپین کے کھلاڑیوں کے سامنے کچھ نہیں چل رہی۔ اس کے بعد ہالینڈ کے کھلاڑیوں نے نہایت منفی ہتھکنڈوں کا استعمال شروع کر دیا اور پے در پے فاؤل کرنے لگے تاکہ کسی طرح سپین کے کھیل کے مومنٹم کو توڑا جا سکے۔ اسی وجہ سے ہالینڈ کے کھلاڑیوں کو لگاتار ییلو کارڈ دکھائے گئے اور ایک کھلاڑی کو دو مرتبہ ییلو کارڈ دکھانے کے بعد ریڈ کارڈ بھی دکھایا گیا۔

فائنل میچ کے ایک سو سولہویں منٹ میں بالآخر سپین کی جانب سے انیستا نے گول کر دیا تو دوسری جانب سپین کا کپتان گول کیپر کاسیلیا شدت جذبات سے اشکبار ہو گیا۔ اگرچہ میچ ختم ہونے میں کچھ دیر باقی تھی لیکن سپین کی ٹیم کی کارکردگی کو دیکھتے ہوئے میچ کا نتیجہ سب کے سامنے تھا۔ چند منٹ بعد ہی ریفری کی وسل بجی اور اس کے ساتھ ہی تمام سپین میں فتح کا جشن شروع ہو گیا۔ اس طرح سپین کو لاحق اصل مسائل کچھ دیر کے لیے پس پشت بھی چلے گئے۔ آج کل سپین شدید اقتصادی بحران کا شکار ہے اور قریب ہے کہ وہ یونان کی طرح دیوالیہ ہو جائے۔ ایسے میں فٹ بال کے ورلڈ میں فتح سے عوام کچھ دیر کے لیے اپنے مسائل کو بھول جائیں گے۔اس مرتبہ ورلڈ کپ کے دوران توہم پرستی کو بھی کافی فروغ ملا اور میچوں کے نتائج کی پیشگوئی کرنے والے آکٹوپس کی ہر پیشگوئی درست ثابت ہوئی۔ کوئی بعید نہیں کہ لوگ اس آکٹوپس کی زیارت کو جوق در جوق جانے لگیں اور اس سے اپنی منتیں ماننے لگیں۔ فٹ بال کا ورلڈ کپ ایک مہینے تک جاری رہا اور اس کے فٹ بال ہی لوگوں کی زندگی کا محور بنا رہا۔ اب ورلڈ کپ ختم ہو جانے کے بعد لوگوں کی زندگی میں گویا ایک خلا سا پیدا ہو گیا ہے۔

نوّے منٹ کا کھیل

2010-06-28T00:53:00.007+02:00

انگلینڈ کے فٹ بال لیجنڈ گیری لنکر نے ایک مرتبہ کہا تھا کہ فٹ بال ایک سادہ سا کھیل ہے جس میں 22 کھلاڑی 90 منٹ تک گیند کے پیچھے بھاگتے ہیں اور آخر میں جرمنی کی ٹیم جیت جاتی ہے۔ یہ بات اگرچہ مذاق میں کہی گئی تھی لیکن یہ بات کم از کم جرمنی اور انگلینڈ کے مقابلوں پر صادق آتی ہے جیسا کہ آج کے میچ میں دیکھنے میں آیا ہے۔ جرمنی اور انگلینڈ فٹ بال کے روایتی حریف ہیں۔ انگلینڈ نے فٹ بال ورلڈ کپ کی تاریخ میں جرمنی کے خلاف اپنا آخری میچ 1966 کے ورلڈ کپ کے فائنل میں جیتا تھا جس کا فیصلہ کن گول آج تک متنازعہ گنا جاتا ہے۔ اس گول میں گیند جرمنی کے گول پوسٹ کے ٹاپ سے ٹکرا کر نیچے گری اور ریفری نے ایک لمبی ڈسکشن کے بعد اسے گول قرار دیا۔ اس کا بدلہ شاید آج کے میچ میں پورا ہو گیا ہوگا جب بال ایک مرتبہ پھر سے گول پوسٹ سے ٹکرا کر نیچے گول کے اندر گری اور سپن ہو کر باہر آ گئی لیکن ریفری نے گول نہیں دیا۔ یقینا انگلینڈ کو یہ نہ دیا گیا گول آج سے پچاس سال بعد اسی طرح یاد رہے گا جس طرح کہ جرمنی کو 1966 میں وہ دیا گیا گول آج بھی یاد ہے۔ اس متنازعہ فیصلے قطع نظر آج جہاں جرمنی کی ٹیم نے اعلی معیار کا کھیل پیش کیا وہاں انگلینڈ کی ٹیم کی قسمت نے بھی اس کا ساتھ نہیں دیا اور انگلینڈ کے کھلاڑی لیمپارڈ کی شاٹس جرمنی کے گول پوسٹ سے ٹکراتی رہیں۔ جرمنی نے انگلینڈ کو 4-1 سے ہرا کر نہ‌ صرف اسے تاریخی شکست دی ہے بلکہ وہ ایک مرتبہ پھر سے انگلینڈ کے لیے ڈراؤنا خواب ثابت ہوا ہے۔ جرمنی کے ساتھ میچ سے قبل حسب معمول انگلینڈ کے بدنام زمانہ ٹیبلائڈ پریس نے جرمنی کے خلاف محاز کھول لیا تھا اور اسے جنگ عظیم دوم کی شکست کے طعنے دینے شروع کر دیے تھے۔ آج کی شکست کے بعد انہیں کافی عرصے تک اپنے زخم چاٹنے کے لیے میٹیریل مل گیا ہے۔ اب وہ میچ ریفری کی جان کو روئیں گے اور مس کردہ چانسز پر آہیں بھریں گے۔ اب جرمنی کا مقابلہ کوارٹر فائنل میں ارجنٹائن کی ٹیم سے ہوگا۔ گزشتہ ورلڈ کپ میں بھی دونوں ٹیموں کا کوارٹر فائنل میں ہی مقابلہ ہوا تھا جس کا فیصلہ پنلٹی شوٹ آؤٹ پر ہوا تھا جس میں جرمنی کو فتح حاصل ہوئی تھی۔ میرے خیال میں ارجنٹائن کی ٹیم جرمنی کی ٹیم سے بہتر ہے اور اس کے آگے بڑھنے کا امکان زیادہ ہے۔ بہرحال میچ والے دن بہتر کھیل پیش کرنے والی ٹیم ہی جیت سے ہمکنار ہوتی ہے۔

بلاگسپاٹ کے لیے اردو ٹیمپلیٹس

2010-06-22T10:32:00.004+02:00

بلاگر ڈاٹ کام ایک پرانی اور مستحکم بلاگ ہوسٹنگ سروس ہے اور اردو بلاگنگ کی ترویج میں بلاگر ڈاٹ کام کا ایک اہم کردار رہا ہے۔ بلاگر ڈاٹ کام پر چند نہایت سہل سٹیپس میں بلاگ سیٹ اپ کیا جا سکتا ہے اور اس پر ایک اردو ٹیمپلیٹ اپلوڈ کرکے اسے بآسانی ایک اچھے اردو بلاگ کی شکل بھی دی جا سکتی ہے۔ کئی دوست بلاگر (یا بلاگسپاٹ) کے لیے اردو ٹیمپلیٹس کی تلاش میں رہتے ہیں۔ میں نے کچھ عرصہ قبل چند بلاگر ٹیمپلیٹس کو اردو کے لیے کسٹمائز کیا تھا جن کے روابط میں اس پوسٹ میں فراہم کر رہا ہوں۔ ہو سکتا ہے کہ کچھ دوستوں کو ان میں سے کوئی ٹیمپلیٹس کارآمد لگیں۔ میں نے ان ٹیمپلیٹس کی ٹیسٹنگ کے لیے ایک ٹیسٹ بلاگ بھی تشکیل دیا تھا۔ بلاگر کے لیے اردو ٹیمپلیٹس کے سکرین شاٹس اور ان کے ڈاؤنلوڈ کے روابط ذیل میں موجود ہیں:

راؤنڈر ٹیمپلیٹ 1 ڈاؤنلوڈ کریں

راؤنڈر ٹیمپلیٹ 2 ڈاؤنلوڈ کریں

راؤنڈر ٹیمپلیٹ 3 ڈاؤنلوڈ کریں

راؤنڈر ٹیمپلیٹ 4 ڈاؤنلوڈ کریں

ڈبلیو پی پریمیم ٹیمپلیٹ ڈاؤنلوڈ کریں

پرمیتھیوس ٹیمپلیٹ ڈاؤنلوڈ کریں

میں نے ان ٹیمپلیٹس میں ایک اضافی ٹیکسٹ ایریا شامل کر دیا ہے جس میں اردو ایڈیٹر انٹگریٹ کیا گیا ہے جیسا کہ ذیل کی تصویر میں دکھایا گیا ہے۔

اس کے ذریعے اردو میں تبصرے لکھ کر تبصروں کے خانے میں کاپی پیسٹ کیے جا سکیں گے۔ فی الحال براہ راست تبصروں کے خانے میں کراس ڈومین سکرپٹنگ کی پابندیوں کے باعث اردو ایڈیٹر انٹگریٹ کرنا ممکن نہیں ہے۔ نوٹ کریں کہ راؤنڈر ٹیمپلیٹس والی ہر ڈاؤنلوڈ میں دو ٹیمپلیٹس فراہم کی گئی ہیں۔ ان میں سے ایک ٹیمپلیٹ میں ایک اضافی کسٹمائزیشن یہ کی گئی ہے کہ اس میں مصنف کے تبصروں کو علیحدہ سے ہائی لائٹ کیا گیا ہے جیسا کہ ذیل کی تصویر میں دکھایا گیا ہے۔

بلاگر ڈاٹ کام پر اردو ٹیمپلیٹس استعمال کرنے کا طریقہ

بالا میں فراہم کردہ سانچوں کو اپنے بلاگ پر استعمال کرنے کے لیے ان میں سے مطلوبہ ٹیمپلیٹ کی زپ فائل کو ان زپ کرکے اس کی ایکس ایم ایل فائل کو ذیل کی تصویر کے مطابق اپنے بلاگ کے لے آؤٹ ایڈٹ کرنے کے سیکشن میں اپلوڈ کر دیں:

نوٹ: اگر آپ پہلے سے بلاگر ڈاٹ کام پر کوئی ٹیمپلیٹ استعمال کر رہے ہیں تو یہاں فراہم کی گئی کسی ٹیمپلیٹ کو استعمال کرنے سے قبل اپنے بلاگ کی موجودہ ٹیمپلیٹ کو علیحدہ فائل میں محفوظ کر لیں۔ نئی ٹیمپلیٹ اپلوڈ کرنے سے آپ کے بلاگ کی موجودہ وجٹس اور کسٹمائزیشن بھی غائب ہو سکتی ہیں۔

اگر کسی دوست کو ان ٹیمپلیٹس کے استعمال میں کوئی پرابلم پیش آئے تو وہ یہاں اس کے بارے میں بتا سکتے ہیں یا اردو محفل فورم پر اس سلسلے میں رابطہ کر سکتے ہیں۔

ورڈ پریس 3.0 تھیلونیس کا اجراء

2010-06-17T23:46:00.002+02:00

ورڈ پریس 3.0 کا سٹیبل ورژن بالآخر ریلیز کر دیا گیا ہے۔ اس ریلیز میں ورڈ پریس میں کئی نمایاں تبدیلیاں کی گئی ہیں اور کئی اہم فیچرز کا اضافہ کیا گیا ہے۔ ورڈ پریس کی ڈیویلپمنٹ پر نظر رکھنے والے ورڈ پریس 3.0 کے بیٹا ورژن اور ریلیز کینڈیڈیٹ کے ذریعے سے پہلے ہی ان فیچرز سے واقف ہوں گے۔ ورڈ پریس کی اس ریلیز میں کئی اہم کونٹینٹ منیجمنٹ سسٹم کی فیچرز کو شامل کیا گیا ہے جس کی بدولت اب ورڈ پریس صرف بلاگنگ ہی کے لیے نہیں بلکہ عمومی کونٹینٹ منیجمنٹ کے لیے بھی بخوبی استعمال کیا جا سکے گا۔ ورڈ پریس 3.0 کی ایک اور اہم فیچر اس میں ورڈ پریس ملٹی یوزر کی کوڈ کا انضمام ہے، یعنی اب اسی ورژن کو ایک سے زیادہ بلاگ ہوسٹ کرنے کے لیے بھی استعمال کیا جا سکے گا۔ ذیل میں ورڈ پریس 3.0 کی تعارفی ویڈیو پیش کی جا رہی ہے۔

ورڈ پریس بلاگ لکھنے کا سب سے مقبول اوپن سورس سوفٹویر ہے اور اس کی ڈیویلپمنٹ میٹ مولن وگ نے شروع کی تھی۔ میٹ مولن وگ نے اپنی تعلیم ہائی سکول آف پرفارمنگ اینڈ ویژوئل آرٹس سے حاصل کی جہاں سے انہوں نے جاز سیکسوفون کی تربیت حاصل کی۔

آغاز تو اچھا ہے۔۔

2010-06-15T17:04:00.001+02:00

جرمنی نے آسٹریلیا کے خلاف چار صفر سے میچ جیت کر ورلڈ کپ کا اچھا آغاز کیا ہے۔ اس فتح پر جرمن عوام اور میڈیا خوشی سے سرشار ہیں اگرچہ وہ یہ بھی جانتے ہیں کہ اس مرتبہ جرمنی کو نسبتاً آسان گروپ ملا ہے۔ 2002 کے فٹ بال ورلڈ کپ میں تو جرمنی کو اتفاق سے فائنل تک آسان راستہ ملتا رہا تھا حتی کہ فائنل میں ان کی برازیل سے ٹکر ہو گئی۔ گزشتہ ورلڈ کپ جرمنی میں ہی ہوا تھا اور جرمنی کی ٹیم نے اچھی کارکردگی کا مظاہرہ کیا تھا لیکن سیمی فائنل میں اسے اٹلی کے خلاف شکست کا سامنا کرنا پڑا۔ آسٹریلیا کے خلاف میچ جرمن فٹ بال ٹیم کے کوچ جواخم لوو کے لیے بھی ایک کڑا امتحان تھا کیونکہ اس مرتبہ انجریز کے باعث کئی اہم پلئیر ورلڈ کپ میں شرکت نہیں کر رہے اور جواخم نے جو ٹیم منتخب کی ہے وہ زیادہ تر نوجوان اور کم تجربہ رکھنے والے لیکن باصلاحیت کھلاڑیوں پر مشتمل ہے۔ آسٹریلیا کے خلاف میچ میں ان نئے کھلاڑیوں نے اعلی معیار کا کھیل پیش کرکے جواخم کے انتخاب کو درست ثابت کر دیا ہے۔ خاص طور پر نئے فارورڈ تھامس ملر کا کھیل سب سے متاثر کن تھا۔ اس مرتبہ کے ورلڈ کپ ایک نمایاں بات اس میں شامل شور بھی ہے جو کہ جنوبی افریقہ کے روایتی باجے ووووزیلا کی وجہ سے پیدا ہوتا ہے۔ ووووزیلا سے کان پھاڑنے والی آواز نکلتی ہے جس سے کھلاڑیوں اور تماشائیوں سمیت سبھی عاجز ہیں لیکن جنوبی افریقہ کے لوگ اسے اپنی ثقافت کا حصہ سمجھتے ہیں اور شاید اسی لیے فیفا نے ابھی تک فٹ بال سٹیڈیمز میں اس کے استعمال پر پابندی عائد نہیں کی ہے۔

بڑا منافق کون ہے؟

2010-05-27T10:15:00.001+02:00

میں ایک سوال کا جواب ڈھونڈ رہا ہوں کہ بڑا منافق کون ہے؟‌وہ جو گوجرہ میں مسیحیوں کے زندہ جلائے جانے کے واقعے پر مٹی ڈالنے کی کوشش کر رہا ہے؟ یا وہ جو طاہر پلازہ میں زندہ جلائے گئے کلمہ گو مسلمانوں کی خاکستر لاشوں پر کھڑا ہو کر جئے مہاجر کا نعرہ لگاتا ہے؟

احتیاط ضروری ہے

2010-05-22T15:37:00.001+02:00

نعمان کے اس پوسٹ کے توسط سے ڈاکٹر عواب علوی کے ساتھ پیش آنے والے افسوسناک واقعے کا پتا چلا۔ خدا کا شکر ہے کہ انہیں گزند نہیں پہنچا ہے۔ ڈاکٹر عواب نے شاید عوام کا مزاج بھانپنے میں کچھ غلطی ہو گئی۔ یہاں لوگ دین کی سرفرازی کے لیے غیر مسلموں کو جلا کر راکھ کرنے سے بھی گریز نہیں کرتے، بلکہ بس چلے تو یہی سلوک اپنے ہم مذہبوں سے بھی کرتے ہیں۔ کچھ نام نہاد دانشوروں کے خیال میں گوجرہ میں مسیحیوں کو زندہ جلانے کا کوئی واقعہ پیش ہی نہیں آیا ہے۔ انہی منافقوں نے دکان کھول رکھی ہے منافقت کا پردہ چاک کرنے کی۔ اور جن لوگوں کی ذات سے کبھی ملک و قوم کو کوئی فائدہ نہیں پہنچا ہے وہ اپنی آخرت کی سرخروئی کے لیے کوئی شکار ڈھونڈ رہے ہیں جسے وہ ناموس رسالت کے تحفظ کے نام پر موت کے گھاٹ اتار سکیں۔ علم الدین اور عامر چیمہ جیسوں کو ہیرو بنانے والی سوچ نے ایسے ذہنی معذور ہی جنم دینے تھے۔ اب فیس بک کے تنازعے کی بدولت پھر سے ملک بھر میں مذہبی جماعتوں کو اپنی سیاست چمکانے کا موقع مل گیا ہے۔ ہر جانب ریاکاری اور منافقت کی سیاہی نظر آتی ہے۔ ایسے مواقع پر ہی جماعت الدعوہ اور لشکر جیسے غنڈہ اور دہشت گرد گروہ احتجاج کی آڑ میں لوگوں کے کاروبار اجاڑنے لگتے ہیں اور ان کی املاک کو نذر آتش کرتے ہیں۔ ایسے عناصر کی جانب سے احتیاط ضروری ہے۔

محمد علی کی باکسنگ کا ایک منفرد انداز

2010-05-19T14:03:00.002+02:00

محمد علی باکسنگ کی تاریخ کے عظیم ترین باکسرز میں شمار کیا جاتا ہے، اگرچہ اس کے اسلام قبول کرنے اور اچھے مسلمان ہونے کے بارے میں اکثر باتیں مغالطے پر مبنی ہیں۔ محمد علی نے باکسنگ کو اپنے منفرد سٹائل سے ایک نئی جہت دی تھی۔ محمد علی کی باکسنگ کی خاص بات طاقتور گھونسوں کی بجائے برق رفتاری تھی۔ محمد علی کا خود اپنے سٹائل کے بارے میں کہنا تھا کہ وہ تتلی کی طرح اڑتا ہے اور شہد کی مکھی کی طرح ڈنک مارتا ہے۔ عام باکسرز کی طرح دفاع کے لیے اپنے ہاتھ اپنے چہرے کے سامنے کرنے کی بجائے محمد علی اکثر ہاتھ نیچے رکھتا تھا۔ اس طرح ایک جانب اسے مخالف باکسر پر برق رفتار گھونسا برسانے کے لیے حرکت میں آسانی رہتی تھی تو دوسری جانب یہ سٹائل ہیوی ویٹ باکسنگ کے لیے کافی خطرناک بھی تھا کیونکہ اس سے سر کا دفاع کمزور ہوتا تھا۔ دفاع کی اس کمزوری کو محمد علی اپنے سر کی تیز حرکت سے پورا کرتا تھا۔ اس انداز کا خوبصورت مظاہرہ محمد علی اور ارنی ٹیرل کے 1967 کے مقابلے میں نظر آیا تھا جب محمد علی نے دوبارہ ورلڈ ہیوی ویٹ چیمپین کا ٹائٹل جیتا تھا۔ میں ذیل میں ایک ویڈیو پیش کر رہا ہوں جس میں ارنی ٹیرل محمد علی پر گھونسے برسا رہا ہے اور محمد علی محض اپنے سر کی جنبش سے اس کے وار کو خالی جانے دے رہا ہے۔ اس ویڈیو کو دیکھیں اور فیصلہ کریں کہ موجودہ دور کو کونسا اسلام چاہیے۔۔ قوالیوں پر دھمال ڈال کر حال چڑھانے والا صوفی اسلام یا پھر لوگوں کو ذبح کرتے ہوئے ان کی ویڈیو بنا کر ان کی سی ڈیز ڈسٹریبیوٹ کرنے والا طالبانی اسلام؟

گلزار ہست و بود نہ بیگانہ وار دیکھ

2010-02-09T12:33:00.004+01:00

اردو محفل فورم پر چند دوستوں نے مشہور افغان گلوکار ناشناس کے بارے میں بتایا کہ انہوں نے “اقبال کی غزل گلزار ہست و بود نہ بیگانہ وار دیکھ“ گائی ہوئی ہے۔ میں اس وقت سے اس غزل کے سحر میں گرفتار ہوں اور بار بار یوٹیوب پر اسے سن رہا ہوں۔ میں جب بھی ناشناس کی آواز میں اس غزل کو سنتا ہوں تو مجھ پر سرشاری کی سی کیفیت طاری ہو جاتی ہے۔ بلاشبہ میں نے کسی اور گلوکار کو ایسی گہرائی کے ساتھ کلام اقبال گاتے نہیں دیکھا ہے۔ اس غزل کے اشعار اور مذکورہ ویڈیو کے روابط ذیل میں ہیں۔

گلزار ہست و بود نہ بیگانہ وار دیکھ
ہے دیکھنے کی چیز اسے بار بار دیکھ

آیا ہے تو جہاں میں مثال شرار دیکھ
دم دے نہ جائے ہستی ناپائیدار دیکھ

مانا کہ تیری دید کے قابل نہیں ہوں میں
تو میرا شوق دیکھ، مرا انتظار دیکھ

کھولی ہیں ذوق دید نے آنکھیں تری اگر
ہر رہ گزر میں نقش کف پائے یار دیکھ

تجدید ایمان

2009-09-13T17:26:00.001+02:00

یہ بات کافی اطمینان کا باعث ہے کہ پاکستان میں مسلمان ایمان کی روشنی سے سرشار ہوتے جا رہے ہیں۔ یہ جذبہ ایمانی اس حد تک بڑھ گیا ہے کہ مذہبی جوش و جذبے کا تحت دوسروں کو جلا کر راکھ کرنے سے بھی گریز نہیں کیا جاتا۔ گوجرہ میں عیسائیوں کو زندہ جلانے کے واقعے سے ظاہر ہوتا ہے کہ ہمارے معاشرے میں مذہبی جنونیت کس حد تک بڑھ چکی ہے۔ اس سے زیادہ قابل ذکر بات ذرائع ابلاغ کا اس واقعے کی کھلی مذمت سے گریز ہے۔ یہاں جو بلاگر دن رات معاشرے کی برائیوں پر آہ و فغاں کرتے نظر آتے ہیں، ان کے بلاگز پر بھی اس واقعے کا ذکر نہیں آتا۔ نوائے وقت جیسے ٹیبلائیڈ اور دہشٹ گرد تنظیموں کے ترجمان اخبار میں تو کالم نویس حضرات کھلم کھلا گوجرہ کے واقعے کا حقارت سے ذکر کرتے نظر آتے ہیں۔

آج کل ذرائع ابلاغ میں ایم کیو ایم کے قائد الطاف حسین کے قادیانیوں کی حمایت کے حوالے سے بیانات کا کافی چرچا ہو رہا ہے۔ الطاف حسین پہلے بھی اس طرح کے بیانات کے باعث ایم کیو ایم کے لیے شرمندگی کا باعث بنتا رہا ہے۔ یہ اور بات ہے کہ ایم کیو ایم کے حامی کسی بات پر شرمندہ نہیں ہوتے۔ ایک مرتبہ الطاف حسین نے اپنے لیے حضرت خدیجہ (رضی اللہ عنہا) جیسی بیوی کی خواہش کا اظہار کیا تھا۔ جب جریدہ تکبیر کے مدیر صلاح الدین نے اس بات پر الطاف حسین کی گرفت کی تھی تو اس پر صلاح الدین کے گھر کو آگ لگا دی گئی تھی۔

کچھ مذہبی رہنماؤں کا کہنا ہے کہ الطاف حسین کی اس بارے میں محض تردید کافی نہیں ہو گی بلکہ انہیں اپنے ایمان کی باقاعدہ تجدید کرنی پڑے گی۔ ان حضرت مولانا نے ایمان کی تجدید کا پروسیجر نہیں بتایا کہ آخر ایمان کی تجدید کیسے کی جاتی ہے۔ شاید ان ملاؤں کو نذرانے سمیت حلوے کی دیگ پکوا کر بھیجنی پڑتی ہوگی۔ بہرحال ایمان کی تجدید ایک اچھا آئیڈیا ہے۔ الطاف حسین کے ساتھ ساتھ اور بھی کئی لوگوں کو اپنے ایمان کی تجدید کرنی چاہیے۔ ذیل میں چند مثالیں پیش کر رہا ہوں:

۔ جو لوگ ابو مصعب زرقاوی اور اسامہ بن لادن جیسے درندہ صفتوں کو اسلام کے مجاہد سمجھتے رہے ہیں، انہیں توبہ کرنی چاہیے اور اپنے ایمان کی تجدید کرنی چاہیے۔
۔ جو لوگ یہ سمجھتے رہے ہیں کہ طالبان جیسے وحشی جنگلی ملک پر قابض ہو کر اسلام کا نفاذ کریں گے انہیں بھی ایمان کی تجدید کرنی چاہیے۔
۔ جو مذہبی رہنما مذہب کے نام پر لوگوں کو دھوکا دیتے رہے ہیں اور پلاٹ اور پرمٹ کی سیاست کرتے رہے ہیں، انہیں بھی اپنے ایمان کی تجدید کرنی چاہیے۔ خواہ رسماً ہی کریں۔
۔ وہ لوگ جو اپنے کالموں اور بلاگز پر جھوٹ اور منافقت کا پرچار کرتے آئے ہیں، انہیں بھی اپنے ایمان کی تجدید کرنی چاہیے اور کم از کم ایک مرتبہ سچ بولنے کا عہد کرنا چاہیے۔

دور حاضر کا سرسید، عمران خان

2008-04-30T10:46:00.003+02:00

عمران خان کو سرسید سے تشبیہ دینے پر کچھ لوگ یقیناً چونک اٹھیں گے لیکن مجھے پاکستان سے ملنے والی ایک خبر نے اس superlative کا استعمال کرنے پر مجبور کر دیا ہے۔ اور یہ خبر میانوالی میں نمل کالج کے افتتاح کی خبر ہے۔ وطن عزیز، جہاں سے کوئی اچھی خبر سنے ہوئے مدت ہو گئی ہے، یکایک اس عظیم کارنامے کی خبر پر بلاشبہ میری آنکھوں میں خوشی کے آنسو آ گئے تھے۔ اب بھی الفاظ میرے جذبات کا ساتھ نہیں دے پا رہے ہیں۔ مجھے عمران خان کے پرانے انٹرویوز سے اس کے تعلیمی میدان میں کچھ کام کرنے کے ارادے کا علم ضرور تھا لیکن مجھے اس چیز کی خبر نہیں تھی کہ عمران خان صرف باتیں ہی نہیں کر رہا بلکہ اپنے منصوبوں کو عملی جامہ بھی پہنا رہا ہے۔ ایک مرتبہ پھر قوم کے اس عظیم سپوت نے تمام رکاوٹوں اور مخالفتوں کو زیر کرکے ایک شاندار منصوبے کو عملی جامہ پہنایا ہے۔ میری نظر میں تعلیمی اداروں کا قیام قوم کی نسلوں پر احسان کے مترادف ہوتا ہے اور میانوالی کے ایک پسماندہ علاقے میں ایک عالمی معیار کی یونیورسٹی کے قیام سے حاصل ہونے والے ثمرات کا ادراک کچھ مدت گزرنے کے بعد ہی ہوگا۔

شاید کچھ لوگ یہ نہ جانتے ہوں کہ عمران خان کو ایک اور منفرد اعزاز حاصل ہے کہ وہ برطانیہ کی بریڈ فورڈ یونیورسٹی کا چانسلر بھی ہے۔ اور بریڈ فورڈ یونیورسٹی ہی نمل کالج کے نصاب کی تیاری اور اس کے معیار کو یقینی بنانے کی ذمہ دار ہوگی۔ عمران خان کا ویژن یہ ہے کہ نمل کالج میں آکسفورڈ سے مماثلت رکھتا ہوا تعلیم اور تحقیق کا ماحول فراہم کیا جائے۔ نمل کالج کی فیکلٹی میں آغاز میں جن انجینیرنگ کے مضامین کی تعلیم دی جائے گی ان میں الیکٹریکل انجینیرنگ، آٹو موٹو انجینیرنگ، زرعی انجینیرنگ، کنسٹرکشن اور سیمنٹ انڈسٹری ورک شامل ہیں۔ مجھے نمل کالج کے ایجنڈے میں ایک اور چیز متاثر کن لگی ہے کہ اس میں مقامی سکولوں اور ان کے اساتذہ کے معیار کو بہتر بنانے کا پروگرام بھی شامل ہے۔ اس پروگرام کے مطابق میانوالی کے سکولوں کے اساتذہ کی قابلیت کو بہتر بنانے کے لیے انہیں ٹریننگ دی جائے گی اور وہاں کے طلبا و طالبات کا معیار بہتر بنانے کے لیے انہیں‌ انگریزی اور ریاضی کے مضامین پڑھائے جائیں گے۔ اس کے علاوہ سکولوں کے نصاب اور ان کی لیبارٹریز کو بہتر بنانے پر بھی توجہ دی جائے گی۔ اس کام کے لیے ان لوکل پارٹنرز کا تعاون حاصل کیا جائے گا جو علاقے میں معیاری تعلیم فراہم کرنے کے خواہاں ہیں۔ اس طرح نمل کالج علاقے میں اعلی تعلیم کا کوئی الگ تھلگ جزیرہ نہیں بنے گا بلکہ اس کے ثمرات پورے علاقے تک پھیلیں گے۔

شوکت خانم میموریل ہسپتال کی طرح نمل کالج کو چلانے کے لیے بھی کروڑوں بلکہ شاید اربوں روپے درکار ہوں گے۔ یہ رقم بھی عوام اور حکومت کے تعاون سے ہی اکٹھی ہو سکتی ہے۔ نمل کالج کے افتتاح کے موقع پر اگرچہ وزیر اعظم یوسف رضا گیلانی نے نمل کالج کے لیے گرانٹ کا اعلان کیا لیکن اس موقع پر پنجاب حکومت کا رویہ قدرے مایوس کن تھا۔ مجھے اس موقعے پر پاکستانی الیکٹرانک میڈیا کا رویہ بھی شرمناک لگا ہے۔ جہاں ہر چینل پر معمولی سے واقعے کو بریکنگ نیوز بنا کر پیش کیا جاتا ہے، وہاں نمل کالج کے افتتاح جیسے تاریخ ساز لمحات کا مکمل بلیک آؤٹ کیا گیا۔ میڈیا کا یہ رویہ ہماری قوم کے مجموعی علم دشمن رویے کی عکاسی کرتا ہے۔ نمل کالج کی تعمیر کے دوران بھی اس بات پر علاقے میں کشیدگی پھیلی رہی ہے کہ یہ کالج نیازیوں کی بجائے اعوانوں کے علاقے میں کیوں بنایا جا رہا ہے۔ اگر اس کالج کی تعمیر کسی عالمی ادارے کے ہاتھ میں ہوتی تو یہ پاکستان میں کبھی بھی نہ بن پاتا۔ مجھے یاد پڑتا ہے کہ کسی زمانے میں ورلڈ بینک نے بلوچستان میں زرعی یونیورسٹی کے قیام کے لیے کئی سو ملین روپے کی امداد کا اعلان کیا تھا۔ اس کے بعد بلوچستان میں ایک طویل عرصے تک پشتونوں اور بلوچوں میں اس ضد پر فسادات ہوتے رہے کہ یہ یونیورسٹی ان کے علاقے میں بننی چاہیے۔ مجبوراً ورلڈ بینک کو اپنی امداد واپس لینی پڑی۔ اس سے ملتی جلتی داستانیں پاکستان کے اعلی تعلیمی اداروں میں بھی پائی جاتی ہیں۔ اگر کسی ایک یونیورسٹی کو سینٹر آف ایکسیلینس قائم کرنے کے لیے گرانٹ ملنے کا امکان پیدا ہو جائے تو باقی یونیورسٹیاں اس میں سے حصہ لینے کے لیے بضد ہو جاتی ہیں۔

عمران خان کے ناکام سیاستدان ہونے میں کوئی شک نہیں ہے۔ وہ غالباً عوامی سیاست میں کبھی بڑی کامیابی حاصل نہیں کر سکے گا۔ لیکن ملک وقوم کے لیے اس کی خدمات ہمیشہ اس کا نام روشن کیے رکھیں گی۔ عمران خان نے نمل کالج کے پراجیکٹ میں بھی رزاق داؤد کا تعاون حاصل کیا ہے۔ رزاق داؤد اور بابر علی جیسے لوگ نام و نمود کی پرواہ کیے بغیر معاشرے کی خدمت کرتے رہتے ہیں۔ یہ رزاق داؤد اور بابر علی ہی تھے جنہوں نے لاہور میں عالمی معیار کی منیجمنٹ سائنسز کی یونیورسٹی لمز کی بنیاد رکھی۔ بعد میں عمران خان نے انہیں شوکت خانم ہسپتال کے پراجیکٹ کا ذمہ دار بھی بنایا۔ اور اب یہ نمل کالج کے پراجیکٹ میں عمران خان کا ساتھ دے رہے ہیں۔ کسی قوم کو عروج بخشنے کے لیے چند عزم اور حوصلہ رکھنے والے افراد ہی کافی ہوتے ہیں۔ عمران خان اور اس کے رفقاء کار اس کی زندہ مثالیں ہیں۔ نمل کالج کے پراجیکٹ میں تعاون یا ڈونیشن کے لیے معلومات اس ربط پر موجود ہیں۔

آمریت کی سیاہ رات

2007-11-08T00:11:00.000+01:00

پاکستان میں ایمرجنسی جو کہ اصل میں مارشل لاء ہے، کی صورتحال پر تبصرے کرنے اور اس کے بارے میں آگاہی بڑھانے میں انٹرنیٹ پر انگریزی بلاگرز نہایت فعال ہیں اور ان کی سائٹس کی ایکٹویٹی بھی کئی گنا بڑھ گئی ہے۔ اس کے مقابلے میں اردو بلاگرز کی فعالیت نہ ہونے کے برابر ہے۔ میرے لیے یہ صورتحال قدرے مایوسی کا باعث ہے۔ میں نے اس صورتحال کے تناظر میں تبصرے کرنے اور انفارمیشن پھیلانے کے لیے محفل فورم پر ذیل کے ربط پر ایک زمرہ سیٹ اپ کیا ہے:

پاکستان میں ایمرجنسی کا نفاذ

اب تک میں اس زمرے میں ذیل کے موضوعات پوسٹ کر چکا ہوں:

بالآخر۔۔ پیپلز پارٹی بحالی جمہوریت کی تحریک میں شامل
پاکستان میں ایمرجنسی پر مغربی میڈیا کا رویہ
عمران خان، امید کی کرن؟
کہیں وردی کی جگہ وردی نہ آ جائے۔۔

اس موقعے پر ہمیں آپس کے اختلافات بھلا کر آمریت کی سیاہ رات مٹانے کی جدوجہد کرنی چاہیے۔ پاکستان میں کیبل ٹی وی پر پابندی کی وجہ سے لوگوں نے ڈش خریدنا شروع کر دی ہے۔ میں نے ایک جگہ تجویز کیا ہے کہ ایک ہی ڈش انٹینا کے سگنل کو رپیٹرز کے ذریعے زیادہ سے زیادہ لوگوں تک پہنچایا جا سکتا ہے۔ اللہ تعالی وکلاء کو استقامت نصیب کرے اور پاکستان کو آمریت کے غاصبانہ قبضے سے نجات عطا فرمائے۔ آمین۔

غازی عبدالرشید جاں بحق

2007-07-10T17:20:00.000+02:00

اطلاعات کے مطابق عبدالرشید غازی جاں بحق ہو گئے ہیں۔
میں آفس میں بیٹھا ہوا ہوں اور بار بار میری آنکھیں نم ہو رہی ہیں۔ کئی دن سے میں شدید اضطراب کی کیفیت میں مبتلا ہوں۔ لال مسجد کے معاملے پر لکھنے کی ہمت نہیں‌ ہو پا رہی تھی۔ میڈیا میں اور انٹرنیٹ پر لوگ گویا آگ اگل رہے ہیں۔ غازی برادران نے غیر حقیقی آئیڈیلز کو پانے کی کوشش کی اور یوں اپنے لیے تباہی کا رستہ چنا۔ میں نے کبھی ملائیت کو پسند نہیں کیا اور لال مسجد کے قانوں کو ہاتھ میں لینے کو بھی ہمیشہ فاشسٹ کاروائیاں سمجھا ہے۔ لیکن جب میں محصور نوجوان لڑکوں اور لڑکیوں کو مصیبت میں گرفتار دیکھتا ہوں تو میرا دل بھر آتا ہے۔ یہ سادہ دل لوگ بھلائی کا کام کر سکتے تھے لیکن ان کے ہاتھ میں اسلحہ تھما دیا گیا۔

میں صرف اتنا جانتا ہوں کہ لال مسجد کا سانحہ ایک بڑی تباہی کا پیش خیمہ ثابت ہو سکتا ہے۔

اہنسا کے پجاری

2007-05-13T07:02:00.000+02:00

اسرائیل ایک امن پسند ملک ہے اور اس کے کوئی جارحانہ عزائم نہیں ہیں۔

یہ بیان اسرائیل کے سفارت کار اور حکومتی اہل کار اس وقت جاری کرتے نظر آتے ہیں جب اسرائیلی فوج فلسطینی عورتوں اور بچوں کو بمباری کا نشانہ بنا رہی ہوتی ہے۔ کچھ ایسا ہی بیان 12 مئی کو متحدہ قومی موومنٹ کے قائد الطاف حسین کا لگا جب انہوں نے کہا کہ ایم کیو ایم ایک پرامن جماعت ہے اور اس نے کبھی تشدد کا درس نہیں دیا۔ جی ہاں اور کراچی میں شاید لاشوں کے ڈھیر زمین سے خود ہی اگل رہے تھے۔ ایم کیو ایم کے پاس ہمیشہ کی طرح اس مرتبہ بھی ایک عذر ہے کہ آخر ہمارے کارکن بھی تو مرے ہیں۔ واقعی ایم کیو ایم کے لیے یہ کوئی بڑی بات نہیں ہے کہ کسی ایک دن ہنگامہ آرائی میں دس بارہ کارکنوں کو بھینٹ چڑھا دے۔ کراچی کو یرغمال بنانے کے لیے شاید یہ قیمت زیادہ نہیں ہے۔

ہٹلر کے پراپگینڈا منسٹر گوئبلز کا کہنا تھا کہ جھوٹ اس کثرت سے بولو کہ وہ سچ لگنے لگے۔

ایم کیو ایم کی پراپگینڈا مشینری کا تو لگتا ہے کہ جھوٹ بول بول کر گلا سوکھ گیا ہے۔ پہلے چیف جسٹس افتخار چوہدری کے لاہور کے دورے کے موقعے پر سندھ میں کچھ ٹی وی چینلز کی نشریات منقطع رہیں تو ایم کیو ایم کے میڈیا منیجر مصطفی عزیز آبادی کا بیان آیا کہ اس کے پیچھے ایم کیو ایم کا ہاتھ نہیں تھا بلکہ یہ دراصل ایک عوامی رد عمل کا نتیجہ تھا۔

عوامی رد عمل۔۔؟

اس سے مصطفی عزیز آبادی کی مراد یہ تھی کہ فلاں فلاں چینلز نے ایم کیو ایم کی ریلی کو خاطر خواہ کوریج نہیں دی تھی۔۔

نہ جانے پاکستان کے ذرائع ابلاغ کب اس بات کا ادراک کریں گے کہ ان کا سب سے اہم کام الطاف حسین اور ایم کیو ایم کو کوریج دینا ہے۔

کسی چینل کو الطاف حسین کی وہ تقریر بھی نشر کر دینی چاہیے جس میں اس نے کراچی کے عوام کو گھر کے ریفریجریٹر بیچ کر ہتھیار خریدنے کی ہدایت کی تھی۔

کسی چینل پر ایم کیو ایم کے ایک حامی دانشور یہ کہتے نظر آ رہے تھے کہ آج کوئی ایسا غیر معمولی واقعہ پیش نہیں آیا جس کا اتنا شور مچایا جائے۔ آج کراچی میں لاشیں اٹھیں ہیں تو یہ کوئی نئی بات نہیں ہیں۔ لاشیں تو پورے ملک میں اٹھتی رہتی ہیں۔ خوامخواہ ہی شور مچا رکھا ہے۔۔

ایم کیو ایم ان انمول تحفوں میں سے ایک ہے جو سابق صدر ضیاءالحق نے اس قوم کو عنایت کیے تھے۔ شاید جنرل ضیا کو خود بھی معلوم نہیں تھا کہ اس نے کس عفریت کو جنم دے دیا ہے۔

کراچی ریلی

2007-04-18T17:08:00.000+02:00

متحدہ قومی موومنٹ جو پہلے مہاجر قومی موومنٹ ہوتی تھی، کے قائد الطاف حسین کے کہنے پر کراچی میں مذہبی انتہاپسندی اور دہشت گردی کے خلاف ریلی منعقد ہوئی۔ ویٹ آ منٹ۔۔ الطاف حسین اور دہشت گردی کے خلاف ریلی؟ یہ تو اس طرح ہوگا جیسے ہٹلر یہودیوں کی نسل کشی کے خلاف احتجاج کر رہا ہو۔
الطاف بھائی میں گزشتہ بیس میں فکری ارتقاء کی کئی منزلیں دیکھنے میں آئی ہیں۔ آج وہ لبرل ازم کا پرچار کر رہے ہیں اور مذہبی انتہا پسندی کے خلاف احتجاج کر رہے ہیں۔ ایک وقت وہ بھی تھا جب الطاف حسین کی تصویر کروٹن کے پتوں پر ابھر آتی تھی اور وہ پیر صاحب کے نام سے پہچانے جانے لگے تھے۔ کچھ دوستوں کو شاید یاد ہو کہ الطاف حسین نے اپنے لیے حضرت خدیجہ (رضی اللہ عنہا) جیسی بیوی کی خواہش کا اظہار بھی کیا تھا۔ اس پر جب جریدہ تکبیر کے مدیر مرحوم صلاح الدین نے گرفت کی تو سبز پگڑیاں پہنے ہوئے غنڈوں بھیج کر صلاح الدین کا مکان نذر آتش کرا دیا گیا تھا۔ دراصل صلاح الدین کا ایک اور مضمون بھی شائع ہوا تھا جس میں انہوں نے عید میلاالنبی کو بطور تہوار منانے کے بارے میں کچھ تحریر کیا تھا۔ یہی مضمون ان کے گھر کو نذر آتش کرنے کا بہانہ بنا۔
اس کراچی ریلی میں مختلف مکاتیب فکر کے علما نے آ کر جامعہ حفصہ کے خلاف فتاوی جاری کیے۔ ان علما کو دیکھ کر نجانے کیوں میرے دل میں جامعہ حفصہ اور لال مسجد کے مولویوں کی قدر ہزار گنا بڑھ گئی ہے۔ ان موقع پرست علما سے میری نظر میں اپنی بات پر اڑ جانے والے مولوی کہیں بہتر ہیں۔ کراچی ریلی میں شامل علما کو ایک فتوی ان بھتوں سے حاصل ہونے والی آمدنی کو جائز قرار دینے کا بھی جاری کر دینا چاہیے تھا جو سارے کراچی سے اکٹھا کرکے لندن بھیجی جاتی ہے۔

بھگوان داس کی تعیناتی چلینج

2007-04-03T12:12:00.000+02:00

ایک خبر کے مطابق رانا بھگوان داس کی بطور سپریم کورٹ‌ چیف جسٹس کو عدالت میں چیلنج کر دیا گیا ہے۔ درخواست گزار کا مؤقف ہے کہ اسلامی جمہوریہ پاکستان کی سپریم کورٹ کا چیف جسٹس غیر مسلم نہیں ہو سکتا۔ ٹھیک کہا درخواست گزار نے، یہ ملک اسلام کے نام پر بنا ہے، اس میں کسی غیر مسلم کو اعلی عہدے پر فائز ہونے کا حق نہیں ہے۔ بھگوان داس کو سپریم کورٹ کے چیف جسٹس کے عہدے سے ہٹا کر ان کی جامعہ حفصہ کے منتظم کو چیف جسٹس بنا دینا چاہیے۔ اس کے بعد ہر طرف ڈنڈا بردار مجاہدین اور مجاہداؤں کا راج ہوگا اور انصاف کا بول بالا ہوگا۔ مجھے یقین ہے کہ کئی لوگ میری اس تجویز سے اتفاق کریں گے جو کہ جامعہ حفصہ کی حالیہ غنڈہ گردی پر سر دھنتے نظر آئے تھے اور جنہیں اس میں اسلامی انقلاب کی نوید نظر آ رہی تھی۔ اس کے ساتھ ساتھ ہمیں قائداعظم پر بھی فرد جرم عائد کر دینی چاہیے جنہوں نے اسلامی جمہوریہ پاکستان کے پہلے وزیر خارجہ کے طور پر ایک قادیانی کی تقرری کی تھی اور ایک ہندو کو بھی کابینہ میں شامل کیا تھا۔

فاضل درخواست گزار کو بھگوان داس کے اللہ کہنے پر بھی اعتراض ہے کیونکہ اس سے ان کے مذہبی جذبات مجروح ہوتے ہیں۔ واقعی جو غیر مسلم اللہ کہے اس کی زبان کھینچ لینی چاہیے۔ اللہ تو شاید صرف مسلمانوں کا ہے، بلکہ کسی ایک چھوٹے سے گروہ کا جو خود مغفرت کا حقدار سمجھ کر باقیوں پر کفر کے فتوے جاری کرنا اپنا فرض سمجھتا ہے۔

جرمن یونیورسٹیز میں کورس کی تلاش

2006-12-12T16:39:00.000+01:00

السلام علیکم،

مجھے پاکستان سے واپس آئے کئی مہینے ہو گئے ہیں لیکن مصروفیت کچھ ایسی رہی ہے کہ بلاگ پر پوسٹ‌ کرنے کا وقت ہی نہیں ملتا۔ اتفاق سے میرے بلاگ کی دوسری سالگرہ بھی ہوئی چاہتی ہے اگرچہ میں نے اس پر گزشتہ کچھ عرصے سے کم ہی پوسٹ کیا ہے۔ بلکہ آج میں نوٹ کیا کہ اردو سیارہ پر میرے نام پر سرخ لکیر بھی پھری ہوئی ہے، یعنی کہ کچھ اور دن میرے بلاگ پر پوسٹ‌ نہ ہوتی تو اس بلاگ کو بھی اردو سیارہ سے بے دخل کر دیا جاتا۔ :(

میں دراصل آج ایک دوست کی فرمائش پر ایک مرتبہ پھر سے جرمنی میں اعلٰی تعلیم کے مواقع پر مزید معلومات فراہم کرنا چاہ رہا ہوں۔ میں ایک گزشتہ پوسٹ میں اس سلسلے میں چند بنیادی معلومات فراہم کی تھیں۔ جرمنی کی یونیورسٹیز میں اگلا سمسٹر اپریل 2007 میں شروع ہو رہا ہے۔ اس میں داخلے کا وقت تو اب گزر چکا ہے۔ اب اس سے اگلے سمسٹر یعنی اکتوبر 2007 کے کورسز میں داخلے کے لیے کوشش کی جا سکتی ہے۔

ایک عجیب بات جو میرے مشاہدے میں آئی ہے وہ بیرون ملک یونیورسٹیوں سے فارغ التحصیل افراد اور ان یونیورسٹیوں میں داخلے کے خواہشمند لوگوں میں رابطے کا فقدان ہے۔ پاکستان میں بیرون ملک یونیورسٹیوں میں داخلہ کرانے کا وعدہ کرکے ایجنٹ لوگوں سے پیسے لوٹ‌ رہے ہیں حالانکہ کوئی بھی پڑھا لکھا آدمی خود سے انٹرنیٹ پر یہ کام بخوبی کر سکتا ہے۔ جو انفارمیشن یہ ایجنٹ مہنگے داموں فراہم کرتے ہیں، وہی معلومات ہم لوگ بلاقیمت اور بہتر انداز میں فراہم کر سکتے ہیں۔ میرا خیال ہے کہ ہم لوگ ایجنٹوں کو پیسے دے کر مطمئن ہو جاتے ہیں کہ اب خود سے کوئی کام نہیں کرنا پڑے گا اور بس یونیورسٹی میں داخلہ خود سے لفافے میں پوسٹ ہو کر آ جائے گا۔ شاید ہم لوگوں کو ایک خطیر رقم خرچ کرکے زیادہ اطمینان نصیب ہوتا ہے کہ یہ مفت کام سے بہتر ہے۔ میں اس سلسلے میں بعد میں چند گزارشات پیش کروں گا۔

میرا اس پوسٹ میں بنیادی مقصد چند روابط فراہم کرنا ہے جن کے ذریعے آپ جرمنی میں اپنی مرضی کا بیچلرز یا ماسٹرز پروگرام ڈھونڈھ سکتے ہیں۔ میں نے اپنی گزشتہ پوسٹ میں جرمن سٹوڈنٹ ایکسچینج سروس کا ربط فراہم کیا تھا جہاں یہ انفارمیشن موجود ہے لیکن بدقسمتی سے اس سائٹ کی نیویگیشن قدرے پیچیدہ ہے۔ اس کے علاوہ اس سائٹ کا بیشتر کونٹینٹ جرمن زبان میں ہے جس کی بنا پر اسے سمجھنے میں دقت ہو سکتی ہے۔ اسی لیے میں یہاں چند براہ راسط روابط اور ٹپس فراہم کر رہا ہوں جس سے آپ کو تلاش میں آسانی ہو جائے گی۔

ذیل کے ربط پر آپکو جرمنی میں اعلی تعلیم سے متعلق عمومی معلومات مل جائیں گی:

Study and Research in Germany

جبکہ ذیل کے ربط پر آپ جرمن یونیورسٹیز میں آفر کیے جانے والے انٹرنیشنل پروگرامز ڈھونڈھ سکتے ہیں:

International Degree Programmes

جیسا کہ میں اپنی گزشتہ پوسٹ میں عرض کر چکا ہوں، انٹرنیشنل پروگرام سے مراد بین الاقوامی سطح پر تسلیم شدہ بیچلرز اور ماسٹرز پروگرام ہیں۔ ان میں سے اکثر کورسز انگریزی میں پڑھائے جاتے ہیں جبکہ کچھ جرمن میں آفر ہوتے ہیں۔ براہ راست کسی جرمن کورس میں دراخلہ لینا کافی ہمت کا کام ہے کیونکہ اس کے لیے پہلے ایک غیرمانوس اور مشکل زبان یعنی جرمن سیکھنی پڑتی ہے اور اسی میں ماسٹرز کی سطح کی پڑھائی کرنا پڑتی ہے۔

یہاں میں واضح کرتا چلوں کہ میں جرمنی میں اعلی تعلیم کے مواقع کو انٹرنیشنل بیچلرز یا ماسٹرز کورسوں تک محدود نہیں کرنا چاہ رہا۔ جرمن یونیورسٹیوں کا روایتی ڈپلوم ایک اعلی درجے کا تعلیمی نظام ہے اور ابھی تک زیادہ تر اسی نظام کے تحت کورس آفر ہوتے ہیں۔ اس میں ایک مسئلہ یہ ہے کہ یہ نسبتاً طویل عرصے (ساڑھے چار سے پانچ سال تک) جاری رہتا ہے۔ اس کی وجہ یہ ہے کہ ڈپلوم میں بیچلرز اور ماسٹرز کی تخصیص نہیں ہوتی۔ پاکستانی سٹوڈنٹس کے نکتہ نظر سے جرمنی کے روایتی نظام تعلیم کی سب سے بڑی قباحت یہ ہے کہ یہاں کی یونیورسٹیوں میں ان کے پاکستانی بیچلرز اور ماسٹرز کے کریڈٹ نہیں مانے جاتے۔ یعنی یہاں داخلہ لینے والے کو ڈپلوم کا شروع سے ہی آغاز کرنا پڑے خواہ اس نے پاکستان سے ماسٹرز ہی کیوں نہ کیا ہو۔۔ جبکہ انٹرنیشنل پروگرامز میں پاکستان کی ڈگریاں مانی جاتی ہیں۔ یہاں یہ بات ذہن نشین رکھیں کہ جرمنی کے کسی ماسٹرز پروگرام میں داخلے کی شرط ایک recoginzed بیچلرز پروگرام ہے یعنی وہ بیچلرز جس میں ایک خاص مقدار کے کریڈٹ hours صرف کیے گئے ہوں۔

یہاں میں بالا میں فراہم کردہ ربط پر کورس تلاش کرنے کی ایک مثال پیش کر رہا ہوں۔ جیسے کہ ذیل کی تصویر میں دکھایا گیا ہے، آپ اس ربط پر مطلوبہ انفامیشن مہیا کریں۔ میں نے یہاں الیکٹریکل انجینیرنگ کے ماسٹرز کورسز کی تلاش کی ہے۔

ذیل کی تصویر میں اس تلاش کے نتائج دکھائے گئے ہیں۔ نوٹ کریں کہ کمپیوٹر سائنس اور انفارمیشن ٹیکنالوجی کے کورسز بھی الیکٹریکل انجینیرنگ کی ذیل میں دکھائے گئے ہیں۔ مزید تفاصیل میں اپنی کسی آئندہ کی پوسٹ میں بیان کروں گا۔

سفر پاکستان

2006-08-10T17:24:00.000+02:00

آج صبح ٹرین کے سفر کے دوران مجھے کھڑکی سے دور فضا میں بلند ہوتا ہوا ایک ہوائی جہاز نظر آیا۔ یہاں سے نیورمبرگ کا ایرپورٹ قریب پڑتا ہے اور کافی فاصلے سے یہاں سے ٹیک آف کرنے والے ہوائی جہاز نظر آجاتے ہیں۔ کچھ دنوں میں میں بھی ایسے ہی کسی ہوائی جہاز پر بیٹھا پاکستان کی جانب عازم سفر ہوں گا۔ ہر سال انہی دنوں میں میرا پاکستان کا چکر لگتا ہے۔ جب ہوائی جہاز ایک طویل پرواز کے بعد بالآخر لاہور ایرپورٹ پر لینڈ کرتا ہے تو اس کے جھٹکے سے گویا سارے سفر کی تکان اتر جاتی ہے۔ یہ وہ لمحہ ہوتا جب میں خدا کا شکر ادا کرتا ہوں کہ اس نے مجھے دوبارہ پاکستان آنا اور اپنے والدین سے ملنا نصیب کیا۔ وہاں ایرپورٹ پر ہوائی جہاز سے نکلتے ہی میرے شہر کی گرمی میرا استقبال کرتی ہے۔ ایرپورٹ پر وہی پورٹر باہر کی کرنسی اچکنے کے چکر میں ہوتے ہیں۔ ان سے بچ کر میں اپنے والدین سے بغل گیر ہوتا ہوں۔ پھر گھر کے راستے میں میں لاہور کا جائزہ لیتا جاتا ہوں۔ گھر کے قریب پہنچ کر پتا چلتا ہے کہ ایک سال میں کچھ زیادہ تبدیلی نہیں آئی۔ جو سڑک پچھلے سال جہاں سے اکھڑی ہوئی تھی، وہ گڑھا ابھی تک وہاں موجود ہے۔ اکثر جگہ وال چاکنگ بھی وہی پرانی نظر آجاتی ہے۔ لیکن بعد میں لوگوں سے مل کر اور باتیں کرکے پتا چلتا ہے کہ وقت بہت آگے جا چکا ہے اور معاشرے کی قدریں بہت بدل گئی ہیں۔ اس بارے میں پھر لکھوں گا۔ فی الحال تو اتنا ہی عرض کرنا چاہ رہا تھا کہ اب شاید میرے یہاں پوسٹ کرنے میں وقفہ آجائے گا۔ پاکستان میں میں کوشش کروں گا کہ کبھی کبھار آن لائن آ سکوں لیکن وہاں ان کاموں کا مشکل ہی وقت ملتا ہے۔ ابھی بھی میرے پاس کئی پوسٹس کے نامکمل ڈرافٹ پڑے ہیں۔ انہیں اب واپس آ کر ہی مکمل کر سکوں گا۔

فی امان اللہ۔

بیچلر بوائے

2006-08-08T12:47:00.000+02:00

مجھے ایک مرتبہ ومبلڈن ٹینس ٹورنامنٹ کے بارے میں ایک پروگرام دیکھنے کا اتفاق ہوا۔ اس پروگرام کی خاص بات یہ تھی کہ اس میں ٹینس کے کھیل سے زیادہ ومبلڈن کو دیکھنے کے لیے آنے والی celebrities کے متعلق زیادہ باتیں تھیں۔ ومبلڈن کے میچون کو دیکھنے کے لیے برطانیہ کے شاہی خاندان کے افراد سے لے شوبز کی مشہور شخصیات تک آتی ہیں۔ ان میچوں کا ایک اور دلچسپ عنصر میچ کے دوران تماشائیوں میں بیٹھی ہوئی کھلاڑیوں کی بیویوں یا گرل فرینڈز کے میچ کی صورتحال کے ساتھ بدلتے ہوئے تاثرات ہوتے ہیں۔ بعض اوقات بارش کی وجہ سے میچوں کو روک دیا جاتا ہے اور ٹینس کورٹ‌ پر کور ڈال دیا جاتا ہے اور تماشائی چھتریاں بلند کیے بارش کیے بارش رکنے کا انتظار کرتے ہیں۔ یہ انتظار کے لمحات کبھی ناقابل فراموش بھی بن جاتے ہیں۔ ایک مرتبہ اسی طرح بارش کی وجہ سے میچ رکا ہوا تھا تو ایکدم اعلان ہوا، "لیڈیز اینڈ جنٹلمین، سر کلف رچرڈز"۔ سر کلف رچرڈ برطانیہ کا مشہور سنگر ہے۔ اس نے مائیکروفون ہاتھ میں لیا اور اپنا مشہور گانا بیچلر بوائے گانا شروع کر دیا۔ وہاں پر موجود لوگوں نے بھی اسے ساتھ گانا شروع کر دیا اور یوں ایک کنسرٹ کا سا سماں پیدا ہو گیا۔ میرے سامنے وقت جیسے تھم گیا تھا۔ یہ گانا میں نے بچپن میں سنا ہوا تھا اور مجھے نہایت پسند تھا۔ اس دن اس گانے کے بول سن کر میں یکایک ماضی کی یادوں میں کھو گیا تھا۔ ذیل میں اس گانے کا ربط موجود ہے۔

شرم کا مقام

2006-08-04T13:55:00.000+02:00

ایک خبر کے مطابق وینزویلا کی حکومت نے اسرائیل کی لبنان میں بہیمانہ جارحیت کے خلاف احتجاج کے طور پر اسرائیل سے اپنے سفیر کو واپس بلا لیا ہے۔ یہ خبر پوری اسلامی دنیا کے لیے ڈوب مرنے کا مقام ہے۔ دنیا کے ایک ارب سے زائد مسلمان ابھی تک مل کر لبنان میں قتل عام کے خلاف کوئی مؤثر آواز نہیں اٹھا سکے ہیں۔ ابھی بھی تین مسلمان ملکوں مصر، ترکی اور اردن کے اسرائیل سے سفارتی تعلقات قائم ہیں۔ ایک غیر مسلم ملک نے مسلمانوں کے قتل عام کے خلاف ابھی تک سب سے مؤثر سفارتی احتجاج کیا ہے اور اسلامی ممالک کے حکومتی ترجمان صمٌی بکمٌ ہوئے بیٹھے ہیں کہ کہیں ان کی کرسی کو کوئی خطرہ لاحق نہ ہو جائے۔

وینزویلا کے صدر شاویز نہ صرف اپنے ملک میں بلکہ جنوبی اور وسط امریکی ممالک کی مقبول ترین شخصیات میں سے ہیں۔ امریکہ انہیں کئی مرتبہ رستے سے ہٹانے کی کوشش کر چکا ہے۔ اس کی بڑی وجہ یہ ہے کہ شاویز وینزویلا کی تیل کی دولت کو اپنے ملک کی عوام کی بہبود پر صرف کرنا چاہتے ہیں جبکہ امریکہ ان کی جگہ اپنے کسی ایسے پٹھو کو مسلط کرنا چاہتا ہے جو علاقے میں اس کے مفادات کی نگرانی کرتا رہے۔ امریکہ نے شاویز کی حکومت کا تختہ الٹنے کے لیے وہی حربے آزمائے جو کہ اس نے چلی کی جمہوری حکومت کا تختہ الٹ کر جنرل پنوشے کو برسراقتدار لانے کے آزمائے تھے لیکن وینزویلا کے عوام نے ان سازشوں کو ناکام بنا دیا۔ حال ہی میں شاویز کے ایران کے صدر کے لیے دوستانہ جذبات پر بھی اسرائیل کو بہت تکلیف ہوئی تھی۔ اب بھی گمان یہی ہے کہ مغربی میڈیا صدر شاویز کے خلاف سرگرام ہو جائے گا۔

لبنان میں جاری قتل عام مسلمانوں میں چھائی بے حسی، جہالت اور لیڈر شپ کے فقدان کی علامت بھی ہے۔ کچھ عرصہ قبل جب ڈنمارک کے ایک اخبار میں چھپنے والے کارٹونوں کا تنازعہ کھڑا ہوا تھا تو مغربی ممالک کے سفارت خانے نذر آتش کر دیے گئے تھے اور خود پاکستان کے شہروں میں ہر جانب گاڑیاں جلا دی گئی تھیں اور کاروبار اجاڑ دیے گئے تھے اور یہ سب کچھ ناموس رسالت کے نام پر کیا گیا تھا۔ اب لبنان میں اسرائیل کی بمباری کے نتیجے میں عورتوں اور بچوں کے اعضاء بکھر رہے ہیں اور پاکستانی آزادی کا جشن منانے کے لیے کریکر اکٹھے کر رہے ہیں اور موٹرسائیکلوں کے کرتب سیکھ رہے ہیں۔

جرمنی میں اعلٰی تعلیم کے مواقع

2006-08-03T18:17:00.000+02:00

پاکستان میں انجینیرنگ اور کمپیوٹر کے طلبا اور طالبات اپنی بی ایس سی یا ماسٹرز کی تعلیم ختم ہونے سے پہلے کم از کم ایک مرتبہ مزید تعلیم کے لیے بیرون ملک جانے کا ضرور سوچتے ہیں۔ کچھ سٹوڈنٹ بروقت منصوبہ بندی کرتے ہیں اور یونیورسٹیوں کے ساتھ خط و کتابت کرنا شروع کر دیتے ہیں۔ اس طرح پاکستان میں فارغ التحصیل ہونے تک ان کا بیرون ملک یونیورسٹیوں میں داخلے کا کام بھی مکمل ہو جاتا ہے اور ویزہ ملنے کی شرط پر یہ اعلی تعلیم کے روانہ بھی ہوجاتے ہیں۔ میری طرح جو لوگ فوراً نہیں جا پاتے، وہ کم از کم اس خواہش کو دل میں ضرور رکھتے ہیں اور مناسب موقعہ ملنے پر اس سے فائدہ بھی اٹھاتے ہیں۔ لیکن پاکستان کے سٹوڈنٹس کی توجہ عام طور پر ان ممالک کی یونیورسٹیوں کی جانب ہوتی ہے جہاں انگریزی بولی جاتی ہے۔ اس کی بڑی وجہ پاکستانی طلبا و طالبات کی انگریزی کی بہتر قابلیت ہے۔ ان کے لیے TOEFL یا IELTS جیسے امتحان پاس کرنا کوئی مسئلہ نہیں ہوتا۔

پاکستانی سٹوڈنٹس عام طور پر جرمنی آنے سے گھبراتے ہیں۔ ایک وجہ ایک غیرمانوس جرمن زبان ہے جو کہ سیکھنے میں بھی اتنی آسان نہیں ہے۔ دوسری وجہ ایک قطعی مختلف نظام تعلیم ہے جہاں بیچلرز اور ماسٹرز الگ نہیں ہوتے اور ایک ہی پانچ سال کی ڈگری ہوتی ہے جسے ڈپلوم (Diplom) کہا جاتا ہے۔ اس پر مستزاد یہ کہ جرمنی والے پاکستان میں کی گئی بیچلرز کے کوئی کریڈٹس بھی نہیں دیتے جس کی وجہ سے وہاں تعلیم کا آغاز پہلے سمسٹر سے کرنا پڑتا ہے۔ یہ صورتحال تقریباً دس سے بتدریج تبدیل ہو رہی ہے لیکن پاکستانی سٹوڈنٹس حیران کن طور پر اس سے بے خبر ہیں۔

میں نے یونیورسٹی آف ارلینگن (University of Erlangen) سے
کمپیوٹیشنل انجینیرنگ میں ماسٹرز کی ڈگری حاصل کی ہے۔ یہ ایک بین المضامینی (Interdisciplinary) سبجیکٹ ہے جس میں انجینیرنگ کی فیلڈ میں کمپیوٹر سائنس کی اطلاقیات کا مطالعہ کیا جاتا ہے۔ یہ دو سال کا ماسٹرز پروگرام اس یونیورسٹی میں 1997 سے شروع ہوا ہوا ہے اور اب تک صرف دو پاکستانیوں نے یہاں سے یہ ماسٹرز کی ہے۔ ان میں سے ایک میں ہوں اور دوسرا میرا ایک عزیز ہے جسے میں نے کافی مشکل سے یہاں آنے پر آمادہ کیا تھا۔ وہ اب ماسٹرز ختم کرنے کے بعد اپنی پی ایچ ڈی بھی مکمل کرنے کے قریب ہے۔ زیادہ غور طلب بات یہ ہے کہ یہ ماسٹرز پروگرام انگریزی میں آفر ہو رہا ہے اور اس میں ہماری انجینیرنگ یونیورسٹی لاہور کی بیچلرز کی ڈگری کو تسلیم بھی کیا گیا تھا۔

ایک طرف پاکستانی سٹوڈنٹ جرمنی کی جانب کم رخ کرتے ہیں، دوسری طرف ہر سال ہزاروں کی تعداد میں بھارتی اور چینی سٹوڈنٹس یہاں امڈے آتے ہیں۔ اگرچہ اب کچھ زیادہ پاکستانی طلبا یہاں آنے لگے ہیں لیکن میرے خیال میں انہوں نے یہاں تعلیم حاصل کرنے کا بہترین وقت مِس کر دیا ہے۔ جس وقت میں نے ماسٹرز کی تھی اس وقت جرمنی میں تعلیم بالکل مفت تھی اور اب تمام جرمنی میں یونیورسٹیاں بتدریج ٹیوشن فیس لاگو کر رہی ہیں۔ اگرچہ امریکی یونیورسٹیوں کے مقابلے میں یہ فیس ابھی بھی بہت کم ہے لیکن قیاس یہی ہے کہ یہ بڑھتی جائے گی۔

بہرحال میری اس تحریر کا مقصد یہی معلومات عام کرنا تھا کہ اب پورے جرمنی میں ماسٹرز اور بیچلرز پروگرام شروع ہو رہے ہیں جو کہ بین الاقوامی نظام تعلیم سے کمپیٹبل بھی ہیں۔ اگرچہ ان میں سے کچھ پروگرام جرمن میں ہیں لیکن ڈھونڈھنے پر مطلوبہ فیلڈ میں انگریزی میں پروگرام ضرور مل جاتا ہے۔ میرا ارادہ مزید اس موضوع پر لکھنے کا ہے اور میں کمپیوٹیشنل انجینیرنگ کے بارے میں بھی مزید معلومات فراہم کرنے کا ارادہ رکھتا ہوں۔ دوسرے دوست جو بیرون ملک تعلیم حاصل کر رہے ہیں یا تعلیم سے فارغ ‌ہو چکے ہی، ان سے بھی میری درخواست ہے کہ وہ جونیئر سٹوڈنٹس کی اس سلسلے میں رہنمائی کریں۔ پاکستانی اخبارات میں بیرون ملک داخلہ کروانے کے لیے ایجنٹوں کے اشتہارات سے ظاہر ہوتا ہے کہ پاکستانی سٹوڈنٹ بلاجواز ان پر اپنا پیسہ ضائع کر رہے ہیں جبکہ خود وہ یہ کام بہتر طور پر کر سکتے ہیں۔

وہ طلبا و طالبات جو اگلے سال (2007) میں جرمنی میں اپریل کے سمسٹر میں یونیورسٹی جوائن کرنے کا ارادہ رکھتے ہیں، انہیں چاہیے کہ وہ ابھی اپنے داخلے کی کاروائیاں شروع کر دیں۔ اپریل کے سمسٹر کے لیے داخلے دسمبر تک مکمل ہو جائیں گے۔ اس کے بعد ویزے کے لیے جرمنی کی ایمبیسی کے چکر لگانے پڑیں گے۔

ذیل کے روابط پر آپ جرمنی میں اپنے مطلب کا بیچلرز یا ماسٹرز پروگرام ڈھونڈھ سکتے ہیں:

First degree studies
Graduate studies

بیچارگی کی کیفیت

2006-08-02T23:41:00.000+02:00

میں زندگی کے اس حصے میں ہوں جب جذبات آسانی سے مجھ پر حاوی نہیں ہوتے۔ لیکن کچھ واقعات پر مجھے اپنے آپ پر قابو نہیں رہتا۔ میں نام کا مسلمان ہی سہی، لیکن دنیا میں کسی بھی حصے میں مسلمانوں پر ہونے والا ظلم دیکھ کر میرا دماغ ماؤف ہو جاتا ہے۔ ابھی تھوڑی دیر پہلے میں لبنان میں ہونے والے قتل عام کی ایک رپورٹ دیکھ کر میں بلک بلک کر رونے لگا۔ یہ کوئی پروپگینڈا فلم نہیں تھی بلکہ جرمنی، جو کہ اسرائیل کا ایک تابع فرمان ملک ہے اور جہاں حزب اللہ کو واضح طور پر ٹیررسٹ سمجھا جاتا ہے، کے ایک ٹی وی نیوز چینل پر رپورٹ تھی۔ میں کچھ دیر تک غیر یقینی کے عالم میں بچوں اور عورتوں کے بکھرے ہوئے اعضاء کے مناظر دیکھتا رہا۔ اس کے بعد جب ان لوگوں کو دکھایا گیا جن کے سب پیارے اس حملے میں بچھڑ گئے تھے تو میں بے اختیار رو پڑا۔ ایک عورت کو دکھایا گیا جس کے پاس اپنے بھوک سے بے حال بچوں کو کھانے کے لیے دینے کے لیے کچھ بھی نہیں تھا۔ اس کی دو بیٹیاں دیکھ کر مجھے اپنی بیٹیاں یاد آ گئیں جو اسی عمر کی ہیں۔

میرے ذہن میں رہ رہ کر ایک سوال ضرور آتا ہے۔۔ آخر حزب اللہ کو کیا ملا یہ جنگ شروع کرکے؟ اب انٹرنیشنل کمیونٹی کی کوشش سے بہت اگر کچھ ہوا تو یہی کہ اسرائیل کی فوج واپس چلی جائے گی۔ لیکن لبنان کی مکمل تباہی کا مداوا کون کرے گا؟

مجھے معلوم ہے کہ میرے آنسوؤں اور میری دعاؤں سے لبنان کی حالت میں کوئی بہتری واقع نہیں ہوگی۔ اتنی ہی بیچارگی مجھ پر اس وقت طاری ہوئی تھی جب سرب فوج نے بوسنیا میں ایک ہی دن میں آٹھ ہزار مسلمانوں کو ایک میدان میں لیجا کر گولیوں سے بھون دیاتھا۔ یہی حالت میری اس وقت بھی ہوئی تھی جب بھارت میں گجرات میں دوہزار کے قریب مسلمانوں کو پٹرول چھڑک کر جلا دیا گیا تھا۔

بہرحال ہم لوگوں کو اس سے کیا غرض ہے۔ پاکستانی قوم تو اس وقت جشن آزادی کی تیاریوں میں مشغول ہے۔ ادھر لبنان میں اسرائیل بم گرا رہا ہوگا دوسری جانب نوجوانان پاکستان موٹر سائیکلوں کے سلنسر اتارے آزادی کی خوشیاں منا رہے ہوں گے۔

ابہام

2006-07-30T12:49:00.000+02:00

کچھ دنوں سے انتہاپسندی اور اسلام پسندی جیسی اصطلاحات کے استعمال پر کچھ ابہام سا پایا جاتا ہے۔ میں نے اپنی ایک پوسٹ میں چند اسلام پسندوں کی باتیں کیں تو ایک دوست نے پوچھا کہ کیا تم اسلام پسند نہیں ہو؟ اس پر میں کچھ چونک پڑا۔ اس کا کیا کیا جائے کہ یہ اصطلاح خود ہم لوگوں کی بنائی ہوئی ہے۔کسی زمانے میں دائیں بازو اور بائیں بازو کی اصطلاحات عام تھیں اور لوگ اپنے سے اختلاف رائے رکھنے والوں کو کسی ایک گروہ میں بریکٹ کرکے اس پر چاند ماری شروع ہو جاتے تھے۔ بائیں بازو والے دوسروں کو رجعت پسند کہتے تھے اور دائیں بازو والے انہیں اصحاب الشمال قرار دیتے تھے یعنی کہ وہ لوگ جنہیں قیامت کے روز ان کا اعمال نامہ انکے بائیں ہاتھ میں پکڑایا جائے گا۔

یہ تو کمیونسٹ روس کے دور کی باتیں تھیں۔اس وقت تو ایک مکتبہ فکر کے جید علما سوشلزم کو عین اسلام بھی قرار دیا کرتے تھے۔ اب کچھ عرصے سے انتہاپسندی اور اعتدال پسندی کی کی تراکیب مستعمل ہیں اور حسب معمول لوگ اپنے پاس عقلی دلائل کی کمی کو اعتدال پسندی یا انتہاپسندی کے خلاف اپنے دل کا غبار نکال کر پورا کرتے ہیں۔

ان باتوں کا خیال مجھے ایک ساتھی بلاگر کی پوسٹس پڑھ کر آیا تھا۔ یہ خاصے ذہین اور تمیز دار ہونے کے باوجود بدتمیز کے نام سے بلاگ لکھتے۔ ان کی پوسٹس پڑھ کر مجھے یوں لگ رہا ہے کہ یہ بھی اسلام پسندی اور روشن خیالی کا ایک سیاہ و سفید تصور پیش کر رہے ہیں جس میں یہ لوگ دو واضح گروپوں میں تقسیم ہوں۔ میں اس تصور سے اختلاف کرتا ہوں۔ ان کی حالیہ پوسٹس کا پس منظر بھی میں جانتا ہوں اور اس پر بھی لکھوں گا۔ فی الحال صرف اتنا عرض کرنا چاہتا ہوں کہ اگر (مثال کے طور پر) میں اپنی کسی تحریر میں ملائیت کے خلاف کچھ لکھتا ہوں تو اس سے میں روشن خیالی کا جھنڈا نہیں لہرا رہا۔ طالبان کی حکومت کو اسلامی یا شرعی حکومت سمجھنا میں ایمان کا جزو نہیں سمجھتا۔ اسی طرح اگر کچھ تنگ نظر اور محدود ذہنیت کے حامل لوگ کسی فورم پر اکٹھے ہو کر فتوے بازیاں کرنا شروع ہو جائیں یا اپنے بلاگ پر متعفن تحریریں پوسٹ کریں تو اسے بھی اسلام پسندی نہیں قرار دیا جا سکتا۔ اس موضوع پر بھی پھر لکھوں گا۔

بدلا ہوا انداز

2006-07-29T09:06:00.000+02:00

میری گزشتہ پوسٹ پر ہونے والے تبصروں نے مجھے احساس دلایا ہے کہ شاید اس سطح پر گرنا میرے لیے مناسب نہیں ہوگا۔ آپ کے تبصروں کا شکریہ۔ میں کوشش کروں گا کہ کسی کے اشتعال دلانے پر اسی رو میں نہ بہہ جاؤں۔

یہاں یہ ضرور کہنا چاہوں گا کہ کوئی اہل تشیع کو محض اس لیے مغظات بکتا ہے کہ میں اس سے زچ ہو جاؤں گا تو وہ اپنا وقت ضائع کر رہا ہے۔ میں شیعہ نہیں ہوں لیکن شیعوں کو مسلمان ضرور سمجھتا ہوں۔ میرے نزدیک ہر وہ شخص مسلمان ہے جو اللہ اور اللہ کے رسول صلی اللہ علیہ والہ وسلم اور ختم نبوت پر ایمان رکھتا ہے۔ میں جانتا ہوں کہ کچھ اسلام پسندوں کے نزدیک مسلمان کی اتنی ڈیفینیشن کافی نہیں ہے لیکن میں ان کو مطمئن کرنا ضروری نہیں سمجھتا۔

اردو سیارے کا متبادل

2006-07-29T02:06:00.000+02:00

سب بلاگرز کے لیے ایک خوشخبری ہے کہ اب اردو سیارہ کا ایک متبادل فیڈ ایگریگیٹر اردو راکٹ کے نام سے بھی دستیاب ہے۔ اس میں وہ تمام خصوصیات موجود ہیں جو آج کل کے نام نہاد اسلام پسندوں کا خاصا ہیں۔ یہاں آپ کو مغلظات، ماں بہن کی گالیاں اور فحش گفتگو سمیت وہ سب کچھ مل جائے گا جو کہ ساری انسانیت میں خود کو مغفرت کا حقدار سمجھنے والے ایک چھوٹے سے گروہ کی خصوصیات ہیں۔ تمام بلاگرز سے گزارش ہے کہ اس اسلام پسند فیڈ ایگریگیٹر سے رجوع فرمائیں۔

پکڑو اس شیعہ کو۔۔

2006-07-28T22:05:00.000+02:00

میں نے القاعدہ کے تازہ ترین فتوے کے بارے میں پوسٹ لکھی تھی تو یہ مجھے احساس ضرور ہوا تھا کہ شاید یہ القاعدہ کے حامیوں کو ناگوار گزرے گا لیکن مجھے یہ قطعی علم نہیں تھا کہ اس پوسٹ کی بنا پر مجھے اہل تشیع قرار دے کر اسرائیل کا حامی قرار دیا جائے گا۔ کیا کسی اور صاحب کو بھی میری پوسٹ اسرائیل کا لبنان پر اور تاریخ کا سبق حملہ اسرائیل کی حمایت میں نظر آئی ہے؟ اس کا جواب تو میں پھر لکھوں گا، فی الحال حزب اللہ کے متعلق سعودی مفتی شیخ عبداللہ بن جبرین کا فتوی ملاحظہ فرمائیں اور کوسیں مجھ اہل تشیع کو کہ گلا پھاڑ پھاڑ کے اپنے آقا اسرائیل کی حمایت میں لکھ رہا ہے۔ ویسے کس طرح پتا چلا کہ میں اہل تشیع ہوں؟

ماخذ؛

آج الجزیرہ پر مجھے اس فتوی کا پتہ چلا۔ پھر میں نے تحقیق کی تو یہ مکمل فتوی سامنے آیا۔ ترجمہ ملاحظہ فرمائیے:

فتوی کا عنوان: کیا شیعی تنظیم حزب اللہ کی نصرت کرنا جائز ہے؟
مفتی: شیخ عبداللہ بن جبرین (سعودی مفتی)
فتوی نمبر: 15903
مؤرخہ: 21 جمادی الثانی بمطابق 17 جولائی 2006

سوال: کیا شیعی تنظیم حزب اللہ کی نصرت کرنا جائز ہے؟ اور کیا ان کے حکم کے تحت (لڑائی کیلئے) نکلنا جائز ہے؟ اور کیا ان کی نصرت اور ثابت قدمی کیلئے دعا کرنا جائز ہے؟ اور ان کے دھوکے میں آئے ہوئے سنیوں کے لئے کیا حکم ہے؟

جواب:

اس شیعی تنظیم کی نصرت جائز نہیں اور ان کے حکم کے تحت لڑائی جائز نہیں، اور ان کی کامیابی اور ثابت قدمی کی دعا جائز نہیں۔ اور اہلسنت کیلئے ہماری یہ نصیحت ہے کہ وہ ان سے علیحدہ رہیں اور جو ان کے حلیف بنیں ان سے قطع تعلقی اختیار کریں۔ اور ان کے دلوں میں اسلام اور مسلمانوں کیلئے جو عداوت ہے اور ان سے اہلسنت کو ماضی میں اور حال میں جو نقصان پہنچا ہے، اُس کو عام کریں۔ کیونکہ شیعہ ہمیشہ اپنے دلوں میں اہل سنت کی دشمنی چھپا کر رکھتے ہیں۔ اور اپنی بساط بھر ہمیشہ اہل سنت کے عیبوں کے اظہار، اور ان پر طعن و تشنیع اور ان کے ساتھ فریب اور دغا کرنے کی کوششوں میں لگے رہتے ہیں۔ ایسی حالت میں جو ان کو اپنا دوست بنائے گا وہ انہیں میں سے گِنا جائے گا جیسا کہ اللہ سبحانہ و تعالی قران حکیم میں فرماتے ہیں (و من یتولھم منکم فانہ منھم) ترجمہ: "اور جو تم میں سے ان کو اپنا دوست بناتا ہے سو وہ انہی میں سے ہے"۔

فتوی کا اصل عربی متن جس سے میں نے ترجمہ کیا ہے یہاں پر موجود ہے۔

دعا ہے کہ ایسے علماء سے اللہ سبحانہ و تعالی تمام مسلمانوں کو اپنی پناہ میں رکھیں۔

القاعدہ کا نیا فتوٰی

2006-07-27T18:43:00.000+02:00

ایک خبر کے مطابق القاعدہ نے کافی سوچ بچار کے بعد حزب اللہ کی اسرائیلی فوج کے خلاف لڑائی کو جہاد کے مساوی قرار دے دیا ہے۔ بڑی مہربانی ہے القاعدہ کی۔ اب تک تو جہاد کا مطلب عراق میں امام عسکری کے مزار کو خود کش دھماکے سے اڑا دینا تھا۔ چلیں مان لیتے ہیں وہ القاعدہ نے نہیں بلکہ زرقاوی نے کروایا تھا۔ بہرحال اب القاعدہ اس نتیجے پر پہنچی ہے کہ لبنان کی صورتحال کو وہ ایک شیعہ تنظیم حزب اللہ کے باوجود اپنے مقصد کے لیے استعمال کر سکتی ہے۔ لہذا القاعدہ کے لیڈر ایمن الزواہری نے ایک ویڈیو پیغام میں حزب اللہ کا ذکر کیے بغیر مسلمانوں کو لبنان میں شہادت کی دعوت دی ہے۔ خود القاعدہ نے اسرائیل کے خلاف آخری کاروائی 2002 میں کی تھی جب اس نے کینیا میں 15 کے قریب اسرائیلی ٹورسٹس کو ہلاک کر دیا تھا۔

لبنان پر اسرائیل کا حملہ اور تاریخ کا سبق

2006-07-27T16:41:00.000+02:00

ایک خبر کے مطابق حزب اللہ کا فائر کیا گیا ایک میزائل اسرائیل میں ایک کیمیکلز بنانے والی فیکٹری پر جا لگا ہے جس کے بعد آگ اور دھویں کے بادل نظر آنے لگے۔ اسرائیل کے لبنان پر حملے سے لے کر اب تک حزب اللہ نے اسرائیل پر تقریباً 1400 میزائل فائر کیے ہیں۔ یہ معلوم نہیں کہ ان میں کتنے صحیح نشانے پر لگے ہیں۔ بہرحال اس اتنا اثر ضرور ہوا ہے کہ تل ابیب اور حیفہ کی آبادی اب بنکروں میں رہنے پر مجبور ہے۔

جب حزب اللہ نے دو اسرائیلی فوجیوں کو اغوا کیا تھا تو اسے اسرائیل کے اس سخت رد عمل کی توقع نہیں تھی۔ اسرائیل کا لبنان پر حملہ یقیناً ان مغوی فوجیوں کی رہائی کے لیے نہیں ہے۔ دوسری جانب اسرائیل کو بھی حزب اللہ کی حربی طاقت کا صحیح اندازہ نہیں تھا۔ حزب اللہ کے میزائلز کی رینج اب کافی بڑھ گئی ہے اور ان زمین سے زمین پر مار کرنے والے میزائلوں کے سامنے پیٹریاٹ دفاعی نظام بھی بے بس ہے۔ اس ہائی ٹیک حربی طاقت کے باوجود حزب اللہ بنیادی طور پر گوریلا طرز کی جنگ لڑنے کے ماہر ہیں اور گوریلا جنگ اسی صورت میں کامیاب ہو سکتی ہے اگر سرحد پر کوئی اور ملک اس کی سرپرستی کر رہا ہو۔ اس کی ایک مثال ویت نام میں ویت کانگ گوریلا کی امریکی فوج کے خلاف جنگ ہے جس میں چین نے ویت کانگ گوریلا فوج کی معاونت کی تھی۔ دوسری مثال افغانستان میں پاکستان کی افغان مجاہدین کی روسی فوج کے خلاف سپورٹ ہے۔

حالیہ اور ماضی کی جنگوں کی تاریخ سے معلوم ہوتا ہے کہ گوریلا وار فیئر کے خلاف کوئی فوجی حکمت مشکل ہی ٹھہر سکتی ہے لیکن گوریلا جنگ بھی ایک مرحلے کے بعد ہی شروع ہوتی ہے۔ گوریلا جنگیں عام طور پر اس وقت شروع ہوتی ہیں جبکہ دشمن افواج ہوائی حملوں سے فارغ ہو کر زمینی پیشرفت کر رہی ہوتی ہیں یا اس وقت جب وہ بظاہر زمینی قبضہ مکمل کر چکی ہوتی ہیں۔ اس کی ایک مثال عراق میں امریکہ کا حالیہ قبضہ ہے۔ کہنے کو تو جنگ شروع ہونے کے تین ہفتے بعد ہی بغداد کا سقط ہو گیا تھا اور کچھ ماہ بعد ہی امریکی صدر بش نے Mission Accomplished ڈکلیئر کر دیا تھا لیکن دیکھا جائے تو اصل جنگ اس کے بعد ہی شروع ہوئی تھی۔ آج کل امریکہ کی فوجی حکمت عملی یہی ہوتی ہے کہ پہلے ڈیزی کٹر طرز کے بموں کے بارش (carpet bombing) کرکے تمام اطراف کو زمین سے ملا دیا جاتا ہے اور پھر آخر میں زمینی پیشرفت ہوتی ہے، یعنی زمینی لڑائی کا کم سے کم امکان رکھا جاتا ہے۔ افغانستان میں بھی امریکہ کو شمالی اتحاد کی صورت میں سستے داموں فوجی مل گئے تھے جنہوں نے زمینی پیشرفت کا کام بھی سنبھال لیا تھا۔ دیکھا جائے تو افغانستان کی جنگ بھی ابھی ختم نہیں ہوئی۔ یا شاید ابھی تک صحیح معنوں میں شروع بھی نہیں ہوئی۔ اگر امریکی فوج عراق سے پسپا ہوتی ہے تو اس کا اثر افغانستان میں بھی پڑے گا جہاں آئے روز طالبان حملے جاری رکھے ہوئے ہیں۔ ذاتی طور پر میں طالبان سے کسی قسم کی ہمدردی یا لگاؤ نہیں رکھتا لیکن دل میں یہ ضرور چاہتا ہوں کہ امریکی فوج کو افغانستان اور عراق میں پسپائی نصیب ہو۔

اسرائیل کی فوج کو بھی لبنان میں زمینی پیشرفت سے ڈر لگتا ہے اور وہ امریکہ کے دیے گئے ہوائی جنگ کے سازوسامان ، جن میں عرب ممالک کا سستے داموں بیچا گیا پٹرول جلتا ہے، سے فضا میں رہتے ہوئے ہی سول آبادی پر قہر برسا رہے ہیں۔

لبنان میں اسرائیلی فوج کی پیش قدمی سے ایک مرتبہ پھر دنیائے اسلام ، جو کہ پہلے ہی افغانستان اور عراق کو امریکی قبضے میں جاتے دیکھ چکے ہیں، میں اضطراب کی ایک لہر دوڑ گئی ہے اور اس اضطراب میں بے بسی کی کیفیت بھی شامل ہے کیونکہ لوگ بے بس ہیں۔ وہ محض چند مظاہرے کرنے کے علاوہ اور کچھ نہیں کر پائیں گے۔ کچھ سیاست دان اس موقعے سے فائدہ اٹھا کر اپنی سیاست چمکانے کی کوشش کریں گے اور بس۔

کسی بھی قوم اور معاشرے کی طاقت انصاف کی حکومت اور اتحاد و یکجہتی سے ہی ممکن ہوتی ہے۔ اس وقت عالم اسلام لسانی، جغرافیائی اور فرقہ وارانہ عصبیتوں سے جس طرح منتشر ہے وہ عین عالم اسلام کے قلب میں اسرائیل کی چھوٹی سے ریاست کی کھلے عام غنڈہ گردی سے ظاہر ہے۔ کچھ لوگ 56 اسلامی ممالک کا ذکر کرتے ہیں تو صفر کو بیشک 56 مرتبہ جمع کر لیں، یہ رہے گا صفر ہی۔ کیا عرب ممالک میں اتنی جرات ہے کہ وہ مغربی دنیا کو تیل کی سپلائی بند کر سکیں؟ یہ تو اس وقت معلوم ہوگا جب عراق سے تیل کی پائپ لائن براہ راست حیفہ کو تیل سپلائی کر رہی ہوگی۔

دنیا کے مسلمانوں میں اتحاد تو دور کی بات ہے، خود لبنان میں حزب اللہ کو مکمل سپورٹ حاصل نہیں ہے۔ حزب اللہ بنیادی طور پر ایران اور شام کی حمایت سے بنی ہوئی شیعوں کی تنظیم ہے جبکہ لبنان میں عیسائی اور سنی بھی کافی تعداد میں ہیں اور وہ کھل کر حزب اللہ کی حمایت نہیں کر رہے۔

تاریخ کے ادورار خود کو دہراتے ہیں۔ صلیبی جنگوں (Crusades) کے زمانے میں بھی اسلامی دنیا کافی پھیلی ہوئی تھی لیکن ایک طرف صلیب بردار اور دوسری جانب تاتاری اسلامی ممالک کو یوں روندتے گئے جیسے یہ ریت کے پہاڑ ہوں۔ کہتے ہیں کہ جب ہلاکو خان کی فوجیں بغداد میں داخل ہو رہی تھیں وہاں جید علما کے درمیان اس بات پر مناظرہ ہو رہا تھا کہ آنحضرت صلی اللہ علیہ والہ وسلم کا سایہ تھا یا نہیں۔ ایسے علم پر مبنی کتابیں جب ٹنوں کے حساب سے دجلہ میں پھینکی گئیں تو اس کا پانی کئی دن تک کالا رہا رہا۔ اب وہی دجلہ میں غرقاب ہونے کے لائق فہم و فراست آج کل کے آن لائن فورمز پر بھی نظر آ جاتی ہے۔ اس موضوع پر پھر کبھی۔

دنیاایک فٹ‌ بال کا گراؤنڈ‌ہے

2006-06-13T16:01:00.000+02:00

ہر چار بعد پوری دنیا کی تمام تر توجہ ان کھیل کے میدانوں کی جانب مرکوز ہو جاتی ہے جہاں فٹ بال کے ورلڈکپ کے میچ ہو رہے ہوتے ہیں۔ اس وقت یہ ورلڈ کپ جرمنی میں ہو رہا ہے اور پورا جرمنی ورلڈکپ کے رنگ میں رنگا ہوا ہے۔ ہرجانب جرمنی کے جھنڈے نظر آرہے ہیں یا پھر ورلڈکپ میں شریک ٹیموں کے کلر کی ٹی شرٹیں پہنے لوگ۔ اب پاکستان تو ورلڈ کپ میں شرکت نہیں کر رہا تو میں جرمنی کی ٹیم کو سپورٹ کر رہا ہوں۔ پچھلے ورلڈ کپ میں بھی جرمنی کی ٹیم رنر اپ رہی تھی اور فائنل میں برازیل نے اسے شکست دی تھی۔ میرا ٹپ یہ ہے کہ اس مرتبہ بھی فائنل انہی دونوں ٹیموں کے درمیان ہوگا۔ جرمنی نے ابتدائی راؤنڈ کا پہلا میچ کوسٹاریکا کے خلاف چار۔دو سے جیت لیا ہے۔ جرمنی کے سپورٹس میڈیا اور فٹ بال ٹیم کے کوچ یرگن کلنزمان کو اپنی ٹیم کے چار گول سکور کرنے کی خوشی سے زیادہ ٹیم کے دفاع میں کمزوری سامنے آنے کی فکر ہے جس کی بنا پر مخالف ٹیم نے دو گول کر دیے تھے۔

ورلڈ کپ کا بخار صرف ورلڈ کپ کی شریک ٹیموں تک محدود نہیں رہتا بلکہ پوری دنیا کے لوگ اسے جنون کی حد تک شوق سے دیکھتے ہیں۔ 1998 کے ورلڈکپ کے دوران بنگلہ دیش میں بجلی منقطع ہونے پر مشتعل ہوکر لوگوں کے ہجوم نے الیکٹرک سپلائی ایجنسی کے ایک آفس کو نظر آتش کر دیا تھا کیونکہ یہ ان کے میچ دیکھنے کی راہ میں رکاوٹ بن رہا تھا۔ اس خبر سے کلکتہ میں فٹ بال کے شوق کا پتا چلتا ہے۔

لوگ جس جذباتیت کے ساتھ اس کھیل سے وابستگی کا اظہار کرتے ہیں، اس کا اندازہ لگانا مشکل ہے۔ حالیہ ورلڈ کپ شروع ہونے سے چند ماہ قبل سوئٹزر لینڈ نے ترکی کو کوالیفائنگ راؤنڈ میں شکست دے کر اسے ورلڈ کپ سے باہر کر دیا تھا۔ یہ میچ ترکی میں ہوا تھا۔ گزشتہ ورلڈکپ میں ترکی نے تیسری پوزیشن حاصل کرکے فٹ بال کی نئی تاریخ رقم کر دی تھی۔ اس شکست کو وہ ٹھنڈے پیٹوں برداشت نہ کر سکے۔ واپسی روانگی کے لیے سوئس کھلاڑی جب ترکی کے ایرپورٹ پر آئے تو وہاں انہیں امیگریشن کے عملے نے زدوکوب کیا۔ اس واقعے کے بعد فیفا نے ترکی پر عالمی فٹ بال مقابلوں میں شرکت لینے پر پابندی لگا دی ہے۔

جرمنی نے تین مرتبہ فٹ بال کے عالمی چیمپین ہونے کا اعزاز حاصل کیا ہے۔ سب پہلے جرمنی 1954 میں سوئٹزرلینڈ کے شہر برن میں ہنگری کے خلاف فائنل جیت کر ورلڈ چیمپین بنا تھا۔ یہ کافی بڑا اپ سیٹ تھا کیونکہ اس وقت ہنگری کی ٹیم بہت مضبوط تھی اور کسی سالوں سے ناقابل شکست تھی۔ فائنل میچ میں ہنگری نے دو صفر کی برتری بھی حاصل کر لی تھی لیکن جرمنی کے کھلاڑیوں نے نہ صرف اس برتری کو ختم کیا بلکہ کھیل کے اختتامی لمحوں میں گول کرکے ورلڈکپ بھی جیت لیا۔ اس آخری گول پر ہونے والا ریڈیو پر رواں تبصرہ تاریخ میں امر ہو چکا ہے:

Toooooor.....Toooooor........Toooooor
Das Spiel ist aus
Das Spiel ist aus
Deutschland ist Weltmeister

گووووول۔۔۔۔۔گوووووووول۔۔۔۔۔۔۔۔۔۔گووووووول
کھیل ختم ہوگیا ہے
کھیل ختم ہو گیا ہے
جرمنی ورلڈ چیمپین بن گیا ہے

1954 میں ورلڈ کپ جیت کر جرمنی کا فٹ بال کا عروج ہی نہیں شروع ہوا تھا بلکہ یہ جرمنی کا عالمی معیشت کے ورلڈ چیمپین بننے کا زمانہ بھی تھا۔ دوسری جنگ عظیم میں مکمل تباہی کے بعد صرف نو سال کے اندر جرمنی کی معیشت کا وہ دور شروع ہو چکا تھا جسے لوگ آج بھی جرمنی کے اکنامک ونڈر (Economic Wonder) کے نام سے یاد کرتے ہیں۔ 1954 میں جرمنی کی ورلڈ کپ میں فتح پر ایک مشہور جرمن فلم Das Wunder von Bern بھی بن چکی ہے۔

امیر کھیل کے غریب کاریگر

2006-05-28T01:16:00.000+02:00

چند ہی ہفتوں میں جرمنی میں فٹ بال کا ورلڈ کپ شروع ہونے والا ہے جو کہ سپورٹس کی دنیا کا سب سے بڑا ایونٹ مانا جاتا ہے۔ فٹ بال یا سوکر دنیا کا مقبول ترین کھیل ہے اور جرمنی کے لوگ خاص طور پر فٹ بال کے دیوانے ہیں۔ فٹ بال کے ورلڈ کپ کے انعقاد پر اٹھنے والے اخراجات یقیناً کئی سو ملین یورو ہوں گے۔ فٹ بال کے کھلاڑی بھی اس کھیل کے ذریعے کروڑوں ڈالر کماتے ہیں۔ اس کھیل میں استعمال ہونے والا اچھی کوالٹی کے فٹ بال کی قیمت 100 ڈالر کے لگ بھگ ہوتی ہے اور اسے Nike اور Adidas جیسی مشہور کمپنیاں پروڈیوس کرتی ہیں اور یہ کمپنیاں بھی اشتہارات کے ضمن میں کئی کئی ملین ڈالر خرچ کرتی ہیں۔ 100 ڈالر کے قریب بکنے والے اس فٹ بال کو سینے کے عوض سیالکوٹ کے کاری گر کو محض اتنی مزدوری ملتی ہے کہ وہ مشکل سے ایک وقت کے کھانے کا بندوبست کر سکے۔

دنیا کے فٹ بالز کی پروڈکشن کا 60 فیصد حصہ سیالکوٹ سے برآمد ہوتا ہے اور سیالکوٹ میں فٹ بال کے تقریباً 200 پروڈیوسرز ہیں۔ ایک اندازے کے مطابق سیالکوٹ میں‌ تقریباً 40,000 مرد اور عورتیں فٹ بال سی کر روزی کما رہے ہیں۔ انہیں اس کام کا جتنا معاوضہ ملتا ہے، اس لحاظ سے ایک فیملی کو گزارا کرنے کے لیے کم از کم دو فل ٹائم سینے والوں (stitchers) کی ضرورت ہوتی ہے۔

ایک غریب ملک کے غریب عوام کو مشینی پرزوں کی طرح کام میں جوٹ کر اپنی پراڈکٹس کو نہایت مہنگے داموں بیچنا اور ان مزدوروں کو چند ٹکوں پر ٹرخانا فٹ بال کی انڈسٹری پر ہی موقوف نہیں ہے۔ یورپ اور امریکہ کی ملٹی نیشنل کمپنیاں ایشیا کے اکثر غریب ممالک کے افراد کا اسی طرح استحصال کرتی آئی ہیں۔ کچھ عرصہ پہلے تک سیالکوٹ کی فٹ بال انڈسٹری میں بچوں سے بھی کام کرایا جاتا تھا۔ یہ بات Nike اور Adidas کے کاربرداران سے چھپی نہیں ہوتی لیکن انہیں اس کی روک تھام سے کوئی غرض نہیں ہوتی کیونکہ غریب ملکوں کی سستی لیبر میں ہی انکے منافع اور امیج کا راز ہے۔ سیالکوٹ کی چائلڈ لیبر کا معاملہ منظر عام پر آنے کے بعد انسانی حقوق کی تنظیمیں حرکت میں آئیں اور اس کے نتیجے میں یونیسیف، انٹرنیشنل لیبر آرگنائزیشن اور سیالکوٹ کے مینوفیکچررز کے درمیان معاہدہ اٹلانٹا (Atlanta Agreement) طے پایا جس کے تحت سیالکوٹ کی فیکٹریوں سے چائلڈ لیبر ختم کرنے کی مہلت دی گئی تھی۔ سیالکوٹ کے صنعت کار طوعا و کرہا اس معاہدے پر عمل کر رہے ہیں۔

ماخذ: Balls and Chains

سیالکوٹ کی چند تصاویر

بے معنی حقائق

2006-05-27T01:02:00.000+02:00

ہم لوگ ایک اجتماعی خود فریبی میں مبتلا ہیں۔ آمریت اور ملائیت کے شکنجے میں جکڑی ہوئی قوم کو اپنی عظمت کے ثبوت کے لیے کوئی نہ کوئی نیا ہیرو چاہیے اور اب یہ ہیرو اسے عامر چیمہ کی صورت میں مل گیا ہے۔ متحدہ مجلس عمل والے مطالبہ کر رہے ہیں کہ جرمنی سے سفارتی تعلقات منقطع کر لیے جائیں۔ ایک مطالبہ یہ بھی ہے کہ عامر چیمہ کو اعلی ترین فوجی اعزاز یعنی نشان حیدر سے نوازا جائے۔ عامر چیمہ کو پی ایچ ڈی کا طالب علم قرار دیا جا رہا ہے جیسے اس طرح مرحوم کے درجات بلند ہو جائیں گے۔

دوسری جانب کالم نویس حسب معمول موقعے کو بھانپتے ہوئے آنسو بھرے کالم لکھ رہے ہیں اور ہمیشہ کی طرح اپنے کالموں کو بیچنے کے لیے القاعدہ اور یہودی سازش کا مسالحہ بھی لگا رہے ہیں۔ حقائق کو مسخ کرنے کا کام اس ڈھٹائی سے کیا جاتا ہے کہ جیسے لوگوں کے پاس معلومات کے اور کوئی ذرائع نہ ہوں۔ اب حالت یہ ہے کہ لوگوں کو بھی اصل حقائق سے کوئی غرض نہیں رہی ہے۔

اس صورتحال میں اس بات کی کوئی اہمیت نہیں رکھتی کہ عامر چیمہ کے پوسٹ مارٹم کی رپورٹ آ چکی ہے اور یہ کہ دو پاکستانی پیتھالوجسٹ اس موقعہ پر موجود تھے۔ کافی دیر جاری رہنے والے اس پوسٹ مارٹم سے یہی ثابت ہوا ہے کہ عامر چیمہ کی موت خودکشی سے واقع ہوئی ہے۔ اور شاید یہ بات بھی غیر اہم ہے کہ عامر چیمہ دی ویلت اخبار کے دفتر میں سیکیورٹی سے آگے نہیں بڑھ سکا تھا۔ اخبار کے ایڈیٹر پر قاتلانہ حملہ تو دور کی بات، وہ اس کو دیکھ تک نہیں سکا تھا۔ عامر چیمہ پر اصل چارج پولیس کے خلاف شدید مزاحمت اور جارحانہ رویہ اپنانے کا تھا۔ گرفتاری کے وقت اور بعد میں پوچھ گچھ کے دوران بھی عامر چیمہ کا ذہنی توازن ٹھیک نہیں معلوم ہو رہا تھا۔ یہ سب حقائق ہماری عوامی عدالت کے سامنے بے معنی ہیں۔ پوسٹ مارٹم کی رپورٹ کو مسترد کیا جا رہا ہے اور قاتلانہ حملے اور تشدد کے سنسنی خیز افسانے گھڑے جا رہے ہیں۔ ظاہر ہے مذہبی جماعتوں کے ہاتھ نفرت پھیلانے اور بلوے کرنے کا ایک موقعہ آیا ہوا ہے، وہ اسے آسانی سے تو نہیں جانے دیں گے۔ اور اگر کوئی واقعاتی شہادت کی نشاندہی کرنے کی کوشش کرے تو اسے لادین اور مغرب زدہ قرار دے دیا جائے گا۔

کچھ عرصہ قبل ہالینڈ میں فلم ساز وان گو نے مسلم دنیا میں عورتوں کے ساتھ ہونے والے سلوک کے بارے میں ایک فلم بنائی تھی جس کے کچھ قابل اعتراض سین کی وجہ سے مراکو کے ایک شخص نے اسے بہیمانی سے قتل کر دیا۔ اس نے یقیناً اپنی جانب سے اسلام کا بول بالا کیا ہوگا۔ یہ کہ بعد میں ہالینڈ میں رہنے والے مسلمانوں پر عرصہ حیات تنگ کر دیا گیا اور چالیس سے زائد مساجد کو جلا کر راکھ کر دیا گیا، شاید ضمنی سی بات ہے۔

ایک اور غازی علم الدین؟

2006-05-08T19:08:00.000+02:00

پاکستان کی تاریخ میں ایک اور ہیرو کا نام ثبت ہوگیا ہے۔

عامر چیمہ کا کارنامہ اس کے سوا کچھ نہیں تھا کہ وہ دی ویلت (Die Welt) اخبار کے دفتر میں باورچی خانے کا ایک چاقو لے کر گھس گیا تھا اور وہاں سیکیورٹی پر بیٹھے ہوئے آدمی کو دھمکیاں دینی شروع کر دیں۔ سیکیورٹی والوں نے شروع میں اسے مذاق ہی سمجھا تھا لیکن بعد میں جب پولیس آئی تو اس کے سامنے بھی عامر چیمہ ٹھنڈا نہ پڑا اور اپنی گرفتاری کے خلاف شدید مزاحمت کی۔ بعد میں پولیس کے سامنے پوچھ گچھ میں بھی عامر چیمہ نے دعوی کیا کہ جو وہ کر رہا تھا (پتا نہیں کس مجاہدانہ کارنامے کی بات کر رہا تھا) وہ ہر مسلمان کا فرض تھا۔

عامر چیمہ کی جارحیت کا محرک دی ویلت میں انہی توہین آمیز کارٹونوں کی اشاعت تھی جو کچھ عرصہ قبل ڈنمارک کے اخبارات میں شائع ہوئے تھے۔ اب یہ معلوم نہیں کہ اس طرح اخبار کے دفتر میں چاقو لہراتے ہوئے گھس کر عامر چیمہ نے کن مقاصد کو حاصل کیا ہے۔ لگتا ہے کہ اس کا برین واش صحیح طرح نہیں ہوا ہوا تھا ورنہ وہ خودکش دھماکہ کرتا۔ ہمارے کچھ کرم فرماؤں کے نزدیک تو یہی ایمان کا اونچا درجہ رکھنے والوں کی نشانی رہ گئی ہے۔

ابھی تک کی رپورٹس کے مطابق عامر چیمہ نے جیل میں خود کشی کی ہے اور کسی بیرونی ہاتھ کے اس میں عمل دخل کا کوئی ثبوت نہیں ہے۔ عامر چیمہ کی لاش کی آٹوپسی میں پاکستانی آفیشل موجود ہوں گے اور وہاں اصل حقیقت سامنے آ جائے گی۔ لیکن ہم لوگوں کے لیے حقائق کی کونسی اہمیت ہے۔ جو فیصلہ عوامی عدالت نے دے دیا وہی کافی ہے۔ جرمنی کے جھنڈے جلائے جانے شروع ہو چکے ہیں، جذباتی کالم اور بلاگ لکھے جا رہے ہیں اور عامر چیمہ کو ایک اور غازی علم الدین قرار دیا جا رہا ہے۔ عامر چیمہ جو کہ دو ماہ بعد اپنی تعلیم سے فارغ ہو کر اپنے بوڑھے ماں باپ کا سہارا بن سکتا تھا، ایک بے مقصد موت کا شکار ہو چکا ہے۔ اس سے اس کے سوا اور کچھ نہیں حاصل ہوا ہے کہ متحدہ مجلس عمل اور دوسری مذہبی جماعتوں کے ملاؤں کی سیاست کچھ دن کے لیے چمک گئی ہے۔ وہ ایک احتجاجی جلوس نکالیں گے اور اپنے رستے میں آنے والی ہر دکان اور املاک کو جلاتے جائیں گے اور عامر چیمہ کا بوڑھا باپ اپنے بیٹے کی تصویر کو بوسے دیتا رہ جائے گا۔

جنونیت کے مناظر

2006-02-20T01:36:00.000+01:00

ایک خبر کے مطابق آج سکھر میں ایک مشتعل ہجوم نے دو گرجا گھروں اور ان سے منسلکہ مشنری سکولوں کو نذر آتش کر دیا۔ اس کی وجہ یہ بتائی جاتی ہے کہ کسی عیسائی شخص نے قرآن کی بے حرمتی کی تھی۔ ہم لوگ کس قدر اسلامی غیرت و حمیت سے سرشار ہیں۔ ہمیں ذرا محلے کی مسجد کے لاؤڈ سپیکر پر ایک عیسائی کے اسلام کی توہین کی اطلاع ملنے کی دیر ہوتی ہے اور دیکھتے ہی دیکھتے غیور فرزندان توحید کا ایک لشکر اکٹھا ہوجاتا ہے جو کہ کفار یعنی کہ نہتی اقلیتوں پر حملہ آور ہوجاتا ہے۔ ویسے بھی یہ ملک اسلام کے لیے بنا تھا۔ کریکشن: یہ ملک مسلمانوں کے لیے بنا تھا۔ اس میں کفار کی کیا گنجائش موجود ہے۔ کچھ عرصہ قبل کراچی کے کے ایف سی میں جن افراد کو زندہ جلا دیا گیا تھا، شاید وہ اسی کے مستحق تھے۔ ملک کے آئین میں کئی شقیں شامل کرکے کئی غیر مسلموں کو ملک چھوڑنے پر مجبور کیا جا چکا ہے۔ جو حالات چل رہے ہیں تو یوں لگتا ہے کہ باقی بچنے والوں کو ایک کونسنٹریشن کیمپ بنا کر اس میں قید کر دیا جائے گا۔ اب لوگ مردار خوروں کی طرح اسماعیلیوں پر نظریں جمائے بیٹھے ہیں۔ آغا خان بورڈ کا ذکر بھی کرنا ہوتا ہے تو واقعے کا آغازحسن بن صباح کے قلعہ الموت کے قصے سے کیا جاتا ہے کہ اس کے بغیر صحیح طور نفرت نہیں پھیلتی۔ ایک مرتبہ اقلیتوں کو ٹھکانے لگانے کے بعد اس بات کا فیصلہ بھی ہو جائے گا کہ اصل میں کونسا فرقہ حق پر ہے۔ ویسے تو ایک دوسرے کی عبادت گاہوں پر خود کش دھماکوں کا سلسلہ جاری ہے۔ آخر میں جس فرقے کے لوگ باقی بچ گئے وہی حق پر ہوگا۔ اس وقت بس یہ عالم ہو گا کہ راج کرے گا خالصہ باقی رہے نا کو۔

قرآن کی بے حرمتی یا توہین اسلام ایک کافی مستعمل بہانہ بن چکا ہے جسے بالخصوص اقلیتوں کو نشانہ بنانے کے لیے استعمال کیا جاتا ہے۔ صرف قرآن کا ایک بوسیدہ ورق ملنا کافی ہوتا ہے۔ اس کے بعد کچھ کہانیاں گھڑی جاتی ہیں اور ایک بلوائیوں پر مشتمل ہجوم جمع ہو جاتا ہے اور اس کے بعد ناموس اسلام کے نام پر جلاؤ گھیراؤ کا وہی گھناؤنا کھیل۔

میں نے پہلی مرتبہ اس قسم کے واقعے کے متعلق آج سے قریباً دس سال قبل سنا تھا۔ میں نے صبح کے وقت اخبار میں گوجرانوالہ میں ایک ہجوم کو توہین قرآن کے مرتکب ایک شخص کو ایک لرزہ خیز موت کے گھاٹ اتارنے کے متعلق پڑھا۔ خبر کچھ یوں تھی کہ گوجرانوالہ میں ایک مشتعل ہجوم نے توہین قرآن کرنے والے ایک شخص سجاد کو پہلے زدوکوب کرکے ہلاک کیا۔ اس کے بعد اس کی لاش موٹر سائیکل کے پیچھے باندھ کر اسے گھسیٹا گیا۔ جب لوگوں کو اس سے بھی تسکین نہ پہنچی تو اس لاش پر تیل چھڑک کر آگ لگائی گئی اور پھر اسے گھسیٹا گیا۔ اگلے دن ضمنی طور پر خبر آئی کہ یہ محض ایک غلط فہمی اور ایک پڑوسی کی چپکلش کا شاخسانہ تھا۔ جس شخص سجاد کو توہین قرآن کے شبے میں ہلاک کیا گیا تھا، وہ اصل میں نہایت نیک اور پرہیزگار آدمی تھا۔ وہ اپنے ایک پڑوسی کو اونچی آواز میں گانے لگانے سے منع کرتا تھا۔ اس پڑوسی نے کہیں سجاد کے گھر جھانک کر دیکھا کہ اس کے ہاتھ میں قرآن سے کچھ اوراق گرے ہیں۔ بس پھر کیا تھا، ساتھ والی مسجد سے اعلان ہوا کہ فلانے شخص نے توہن قرآن کی ہے۔ اس میں کچھ زور پیدا کرنے کے لیے کچھ دیر بعد ایک ترمیم شدہ اعلان یہ کیا گیا کہ ایک عیسائی ڈاکٹر نے قرآن کے صفحات جلائے ہیں۔

اس کے بعد سے یہ ایک دہرائے جانے والا پیٹرن ڈیویلپ ہو گیا ہے جس میں مسجد کے لاؤڈ سپیکر پر اعلان ہوتا ہے اور اسکے بعد دو تین سو لوگ ایک آدمی کا پیچھا کرتے ہوئے پائے جاتے ہیں اور اسے موت کے گھاٹ اتار کر دم لیتے ہیں۔ دلچسپ بات یہ ہے کہ اس نوعیت کے واقعات میں کسی کو اصل حقیقت جاننے سے غرض نہیں ہوتی۔ اور نہ ہی کوئی یہ معاملہ عدالت کے سپرد کرنے کے متعلق سوچتا ہے۔ سب اپنے جذبہ ایمانی کی تسکین کے لیے ایک گناہگار کو عبرتناک موت کے منہ میں جاتے ہوئے دیکھنا چاہتے ہیں۔ اخبارات اور میڈیا کا کردار بھی کم گھناؤنا نہیں ہے۔ اگلے دن کی خبروں میں ایسی خبریں یوں پیش کی جاتی ہیں جیسے مرنے والا اسی سلوک کا مستحق تھا۔

سوچنے والی بات یہ ہے کیا ہم واقعی اس قدر سچے مسلمان ہیں کہ ہمیں اسلام کی جانب اٹھنے والی کوئی میلی نظر بھی گوارا نہیں ہے۔ میرا اندازہ ہے کہ ان بلووں سے فارغ ہو کر لوگ آرام سے اپنے معمول کو لوٹ جاتے ہیں۔ کاروباری لوگ حسب معمول منافع خوری اور ملاوٹ میں مشغول ہو جاتے ہیں جبکہ سرکاری ملازم رشوت ستانی کا بازار گرم کرتے ہیں۔ ہم لوگ کہنے کو اسلام کے آفاقی اصولوں کے پیروکار ہیں لیکن ہمارے اعمال وہ جنہیں دیکھ کر شرمائیں ہنود و یہود۔ یہ ہمارے قول و فعل کا وہ تضاد ہے جو ایک شیزوفرینیا کی کیفیت کو جنم دے چکا ہے اور جس میں ہم بحیثیت قوم مبتلا ہیں۔ حالیہ کارٹونوں کے تنازعے پر پورے ملک میں بنکوں، ریستورانوں اور گاڑیوں کو لوٹنا اور جلانا قوم کے اسی ذہنی انتشار کو ظاہر کرتا ہے۔ اس میں تعلیم یافتہ اور ان پڑھ لوگوں کی کوئی تفریق نہیں ہے۔ اس پورے معاملے میں ملک کے دانشوروں اور صحافیوں نے شرمناک رول پلے کیا ہے۔ اس وحشت کا سماں طاری ہوگیا ہے کہ کوئی اعتدال کی بات کرے تو اسے مغرب زدہ، لادین، سیکولر وغیرہ قرار دے کر اس پر طعنوں کی برسات کر دی جاتی ہے۔ اپنے ہی ملک میں اپنے ہی ہم وطنوں کے کاروبار کو اجاڑنے والے مجاہدوں کا درجہ حاصل کیے ہوئے ہیں جبکہ لوٹ مار کے دوران ہلاک ہونے والے بلوائی شہید ہیں اور کسی کی جرات نہیں ہے کہ اس سے اختلاف کر سکے۔ کئی لوگ تو دبے لفظوں میں ایک دوسرے کو خود کش دھماکوں کے لیے بھی آمادہ کرتے ہوئے پائے گئے ہیں کہ جا بم لگا لے سیدھا جنت میں پہنچے گا۔

مجھے یہاں علامہ اقبال کے فرزند جسٹس جاوید اقبال کی ایک بات یاد آ رہی ہے۔ انہوں نے کہا تھا کہ اقبال اگر آج زندہ ہوتے تو وہ پاکستان کے حالات دیکھ کر خودکشی کر لیتے۔ میں اس بات کو کچھ آگے بڑھانے کی جسارت کرتا ہوں۔ اگر قائداعظم آج زندہ ہوتے تو اس جنونیت کے عالم کو دیکھ کر وہ بھی علامہ اقبال کے پیچھے چھلانگ لگا دیتے۔

باجوڑ ایجنسی میں امریکی بمباری

2006-01-16T13:56:00.000+01:00

باجوڑ ایجنسی میں امریکی بمباری سے عورتوں اور بچوں سمیت 18 بے گناہ افراد ہلاک ہو گئے ہیں۔ اس حملے کی حکومت پاکستان کو کوئی پیشگی اطلاع نہیں تھی اور پاکستان کی خومختاری کو پرکاہ کی اہمیت تک نہیں دی گئی تھی۔ اس پر حکومت پاکستان کی غیرت جوش میں آگئی اور اس نے کہا اِب کے مار۔ امریکی حکومت کے ترجمان نے انسانی جانوں کے نقصان پر افسوس کا اظہار کرتے ہوئے کہا ہے کہ امریکہ دہشت گردی کے خاتمے کے لیے کچھ بھی کرنے کو تیار ہے۔ دراصل امریکہ کو اطلاع ملی تھی کہ ایمن الظواہری کے گھر کھانے پر آنے والے ہیں۔ بس ادھر ہی کروز میزائل داغ دیا گیا۔ ماڈرن ٹیکنالوجی کا یہی تو فائدہ ہے کہ گھر بیٹھے میزائل داغ کر یا 50000 میٹر کی بلندی سے ڈیزی کٹر بم گرا کر داد شجاعت دی جا سکتی ہے۔ میں صرف اس سوچ میں مبتلا ہوں کہ اگر کوئی وائٹ‌ ہاؤس فون کرکے کہہ دے گہ اس وقت اسامہ بن لادن پاکستان کے ایوان صدر میں موجود ہے تو وہاں کروز میزائل پہنچتے کتنی دیر لگے گی؟

خلا میں دہشت گردی

2006-01-09T16:33:00.000+01:00

آج کل لگتا ہے کہ امریکہ کی داخلہ اور خارجہ پالیسیاں ہالی وڈ کے سکرپٹ رائٹر تشکیل دے رہے ہیں۔ پہلے مساجد اور دوسری عمارات کا تابکاری کا لیول ماپا جاتا رہا ہے کہ کہیں ایٹم بم تیار نہ ہو رہا ہو۔ اب ایک خبر کے مطابق خدشات ظاہر کیے جا رہے ہیں کہ کہیں دہشت گرد خلا میں جا کر امریکہ کو نشانہ نہ بنا لیں۔ یعنی کہ دہشت گرد پہلے خلا میں جائیں گے اور وہاں سے اپنا خلائی جہاز وائٹ ہاؤس پر کریش کرنے کے لیے واپس زمین پر آئیں گے۔ حیرانی کی بات ہے کہ اسامہ بن لادن کو اتنا آسان نسخہ معلوم نہیں تھا۔ ان خبروں سے اگر کوئی چیز ظاہر ہوتی ہے تو وہ امریکی حکومت کے اندر چھپا ہوا خوف ہے۔ کچھ عرصہ پہلے بھی جب وہائٹ ہاؤس کے ریڈار پر غلطی سے ایک سفید نقطہ ظاہر ہوگیا تھا تو خطرے کے سائرن بجا دیے گئے تھے اور صدر بش کو حفاظتی خندق میں چھپا دیا گیا تھا۔

انڈین کرکٹ ٹیم کی پاکستان آمد

2006-01-06T11:19:00.000+01:00

برصغیر کی سب سے بڑی سپورٹس ایٹریکشن یعنی انڈیا اور پاکستان کی کرکٹ سیریز شروع ہوا چاہتی ہے اور انڈیا کی ٹیم پاکستان پہنچ گئی ہے۔ مجھے پہلی فکر اس چیز کی ہوگی کہ آخر کونسا چینل اس مرتبہ میچ دکھا رہا ہے اور وہ بھی فری آ رہا ہے یا نہیں۔ یہاں جرمنی میں ایک مرتبہ خوش قسمتی سے سونی والوں نے گزشتہ سال انڈیا میں ہونے والی ون ڈے سیریز دکھا دی تھی، وہی جس کے ایک میچ میں شاہد آفریدی نے 45 گیندوں پر سینچری کی تھی اور اس کے فورا بعد ہربجن سنگھ کی سیدھی سی گیند پر بولڈ ہوگیا تھا۔ زیادہ تر اے آر وائی پر ہی میچ آتے ہیں اور وہ فری میں دکھانے والے تو نہیں، اور اپنا دل نہیں مانتا صرف دو مہینے کی سیریز دیکھنے کے لیے اتنے بیکار چینل کی پوری سال کی سبسکرپشن خریدنے کو۔ ہاں یاد آیا، ہمارے ایک بہت اچھے جاننے والے ہیں نیورمبرگ میں۔ کافی عرصہ ہوا ان سے ملاقات ہوئے۔ اتفاق کی بات ہے جب بھی پاکستان اور انڈیا کی کرکٹ سیریز ہوتی ہے، ہماری ان سے ملاقاتوں میں اضافہ ہو جاتا ہے۔ ان کے پاس دراصل اے آر وائی کی سبسکرپشن ہوتی ہے۔

اب ہم دعا ہی کر سکتے ہیں کہ پاکستان کی کرکٹ ٹیم کی اچھی کارکردگی کا سلسلہ برقرار رہے۔ شعیب اختر کا اچھی فارم میں ہونا اور اس کا ٹیم میں بہتر طور پر انٹگریٹ ہونا بھی نیک فال ہے۔ سننے میں آیا ہے کہ پاکستان کرکٹ بورڈ نے باؤنسی وکٹ بنانے کا فیصلہ کیا ہے۔ میرے خیال میں یہ ایک مثبت فیصلہ ہے اور اس سے میچوں کی دلچسپی میں اضافہ ہوگا۔

جہاں لوگ ان میچوں سے لطف اندوز ہوں گے وہاں یہ کچھ ایسے کالم نویسوں اور بلاگرز کے لیے بھی موقعہ ہوگا جو کسی طرح اسے کھینچ تان کر دوقومی نظریہ اور اسلام کے تناظر میں دیکھیں گے اور اسی طرح اس پر تبصرہ کریں گے۔ میری سب سے درخواست ہے کہ کھیل کو کھیل ہی رہنے دیں۔

مغفرت کے حقدار (اقتباس یادگار غالب ۔ الطاف حسین حالی)

2006-01-04T00:24:00.000+01:00

۔۔۔ایک مدت کے بعد لوگوں نے مرزا کے نام گمنام خط متضمن سب و شتم بھیجنے شروع کیے جن میں شراب نوشی اور بدمذہبی وغیرہ پر سخت نفرین اور طعن و ملامت لکھی ہوتی تھی۔ ان دنوں میں مرزا کی عجیب حالت تھی، نہایت مکدر اور بے لطف رہتے تھے، اور جب چٹھی رساں ڈاک لے کر آتا تھا، تو اس خیال سے کہ مبادا کوئی اس قسم کا خط نہ آیا ہو، ان کا چہرہ متغیر ہوجاتا تھا۔

اتفاق سے انہی دنوں میں نواب مصطفی خان مرحوم کے ہمراہ میرا دل میں آناہوا۔ چونکہ مجھے کو ان نالایق گمنام خطوں کے آنے کا حال معلوم نہیں تھا، ایک روز مجھ سے ایسی غلطی ہو گئی جس کے تصور سے مجھ کو ہمیشہ نہایت شرمندگی ہوتی ہے۔ یہ وہ زمانہ تھا کہ ہم مذہبی خود پسندی کے نشے میں سرشار تھے۔ خدا کی تمام مخلوق میں صرف مسلمانوں کو، اور مسلمانوں کے تہتر فرقوں میں اہل سنت کو، اور اہل سنت میں سے صرف حنفیہ کو، اور ان میں سے بھی صرف ان لوگوں کو جو صوم و صلوت اور دیگر احکام ظاہری کے نہایت تقیّد کے ساتھ پابند ہین، نجات اور مغفرت کے لائق جانتے تھے۔ گویا دائرہ رحمت الہی کو کوئین وکٹوریہ کی وسعت سلطنت سے بھی جس میں ہر مذہب و ملت کے آدمی بہ امن و امان زندگی بسر کرتے ہیں، زیادہ تنگ اور محدود خیال کرتے تھے۔ جس قدر کسی کے ساتھ محبت یا لگاؤ زیادہ ہوتا تھا، اسی قدر اس بات کی تمنا ہوتی تھی کہ اس کا خاتمہ ایسی حالت پر ہو، جو ہمارے زعم میں نجات اور مغفرت کے لیے ناگزیر ہے۔ چوں کہ مرزا کی ذات کے ساتھ محبت اور لگاؤ بدرجہ غایت تھا، اس لیے ہمیشہ ان کی حالت پر افسوس ہوتا تھا۔ گویا یہ سمجھتے تھے کہ روضہ رضوان میں ہمارا ان کا ساتھ چھوٹ جائے گا اور مرنے کے بعد ان سے ملاقات نہ ہو سکے گی۔ ایک مرزا کی بزرگی، استادی، اور کبرسنی کے ادب اورتعظیم کو بالائے طاق رکھ کر خشک مغز واعظوں کی طرح ان کو نصیحت کرنی شروع کردی۔ چوں کہ ان کا ثقل سماعت انتہا کے درجے کو پہنچ گیا تھا اور ان سے بات چیت صرف تحریر کے ذریعے کی جاتی تھی، نماز پنج گانہ کی فرضیت اور تاکید پر ایک لمبا چوڑا لیکچر لکھ کر ان کے سامنے پیش کیا، جس میں ان سے اس بات کی درخواست تھی آپ کھڑے ہو کر، یا بیٹھ کر، یا ایما و اشارے سے، غرض جس طرح ہو سکے، نماز پنج گانہ کی پابندی اختیار کریں۔اگر وضو نہ ہو سکے تو تیمم ہی سہی، مگر نماز ترک نہ ہو۔

مرزا کو یہ تحریک سخت ناگوار گزری، اور ناگوار گزرنے کی بات ہی تھی ، خصوصاً اس وجہ سے کہ انہیں دنوں میں لوگ گمنام خطوں میں ان کے اعمال وافعال پر بہت نازیبا طریقے سے نفرین و مالامت کر رہے تھے اور بازاریوں کی طرح کھلم کھلا گالیاں لکھتے تھے۔ مرزا نے میری لغو تحریر کو دیکھ کر جو کچھ فرمایا، وہ سننے کے لائق ہے۔ اہوں نے کہا؛ “ساری عم فسق و فجور میں گزری، نہ کبھی نماز پڑھی، نہ روزہ رکھا، نہ کوئی نیک کام کیا۔ زندگی کے چند انفاس باقی رہ گئے ہیں۔ اب چند روز بیٹھ کر یا ایما و اشارے سے نماز پڑھی، تو اس سے ساری عمر کے گناہوں کی تلافی کیونں کر ہو سکے گی۔ مین تو اس قابل ہوں کہ جب مروں، میرے عزیز اور دوست میرا منہ کالا کریں اور میرے پانؤں میں رسی باندھ کر شہر کے تمام گلی کوچوں اور بازاروں میں تشہیر کریں، اور پھر شہر سے باہر لے جا کر کتوں اور چیلوں اور کوّں کے کھانے کو (اگر وہ ایسی چیز کھنا گوارا کریں) چھوڑ آئیں۔ اگرچہ میرے گناہ ایسے ہی ہیں کہ میرے سارھ اس سے بھی بدتر سلوک کیا جائے، لیکن اس میں شک نہیں کہ میں مؤحد ہوں۔ ہمیشہ تنہائی اور سکوت کے عالم میں یہ کلمات میری زبان پر جاری رہتے ہیں؛ لاالہ الااللہ، لا موجود الااللہ، لاموثر فی الوجود الااللہ“۔

اردو مائیکروسوفٹ آفس

2006-01-02T17:18:00.000+01:00

کمال ہے، اتنی بڑی خبر کو اتنے دن ہوگئے اور کسی دوست نے خبر تک نہیں دی۔ اطلاعات کے مطابق مائکروسوفٹ نے نیشل یونیورسٹی (FAST) پاکستان تعاون سے مائکروسوفٹ آفس 2003 کا اردو ورژن تیار کر لیا ہے۔ مائیکروسافٹ آفس کے اس اردو ورژن کے بارے میں مزید تفصیلات نہیں مل سکیں کہ یہ کب سے اور کس قیمت پر مارکیٹ میں دستیاب ہوگا۔ لگتا ہے کہ مائیکروسوفٹ کو اب پاکستان میں بھی بزنس کا پوٹینشل نظر آنے لگا ہے۔ ایشیائی ممالک میں مائیکروسوفٹ اور دوسری بڑی سوفٹویر کی کمپنیوں کو سرمایہ کاری میں جس سب سے بڑی رکاوٹ کا سامنا کرنا پڑتا ہے وہ ان ملکوں کے عوام کی کم قوت خرید اور وہاں کی مارکیٹ پر پائریسی کا مکمل قبضہ ہے۔ مائیکروسوفٹ نے اس کے باوجود ہمت نہیں ہاری ہے۔ اس کی سٹریٹجی یہ رہی ہے کہ ان ممالک میں کچھ سال تک لابنگ اور اثر و رسوخ سے اپنا مقام بنایا جائے اور لوگوں کو بھی لائسنسڈ سوفٹویر کے استعمال کی آگاہی دلائی جائے۔ دوسرے ان میں سے معاشی طور پر آہستہ مگر مستقل انداز سے ترقی پانے والے چند ممالک میں کچھ ہی سال میں عوام کی قوت خرید ان لائسنسڈ سوفٹویر کی متحمل ہو جاتی ہے۔ اس کی مثال تھائی لینڈ، چین، انڈیا اور ملائشیا ہیں۔ ان ممالک میں مائیکروسوفٹ کی سالوں کی کی گئی محنت اب رنگ لا رہی ہے اور اب یہ مائیکروسوفٹ کی ایکسپورٹ کا بہت اہم ذریعہ ہیں۔

اگرچہ پاکستان کے ہر شہر میں آج بھی ہر گلی میں ریڑھیوں پر چوری کے سوفٹویر کی سی ڈیاں مل رہی ہیں لیکن گزشتہ کچھ سال سے جو ایک تبدیلی آئی ہے وہ ہے حکومتی سطح پر لائسنسڈ سوفٹویر کا استعمال۔ میرے خیال میں پاکستان میں سوفٹویر کے بزنس کو لانے میں مشرف حکومت کا یہ ایک دانشمندانہ قدم ثابت ہوا ہے۔ دوسرا دہشت گردی کے خلاف جنگ میں امریکہ کا ساتھ یا جو کوئی اور وجہ ہو، سرمایہ پاکستان کا رخ کر رہا ہے اور پاکستان میں جس طرح بھی سہی، معاشی گروتھ ہو رہی ہے۔ لگتا ہے کہ مائیکروسوفٹ کے مستقبل پر نظر رکھنے والوں نے پاکستان میں بھی کچھ معاشی ترقی کے اشارے دیکھ لیے ہیں اور اسی لیے پہلے سے ہی یہاں کی مارکیٹ پر اپنی گرفت مضبوط کر رہی ہے۔

پاکستان میں بڑی کمپنیوں کی سرمایہ کاری اگر ایک لحاظ سے خوش آئند ہے لیکن ان ملٹی نیشنلز کو ملکی مارکیٹ پر قبضے کی کھلی چھٹی دے دینا بھی تباہ کن ثابت ہو سکتا ہے۔ اگر آئی ٹی کو فروغ دینا مقصد ہے تو اس کے لیے اوپن سورس آپریٹنگ سسٹم (لینکس) اور سوفٹویر کو بھی حکومتی سطح پر استعمال کیا جانا چاہیے۔

اوپر کی خبر کا سب سے خوش آئند پہلو مجھے اردو آفس کی تیاری میں نیشنل یونیورسٹی کا کردار لگا ہے۔ جب میں یورپ کے ہر بڑے سوفٹویر پرایجیکٹ کو انڈیا کی جانب آؤٹ سورس ہوتے دیکھتا ہوں تو میں نہایت افسردگی سے سوچتا ہوں کہ کاش پاکستان میں بھی آئی ٹی کی انڈسٹری اتنی فروغ پاتی۔ پاکستان کے آئی ٹی پروفیشنل دنیا بھر میں اپن پیشہ ورانہ مہارت کا لوہا منوا رہے ہیں اور کوئی وجہ نہیں ہے کہ ہم پاکستان کی آئی ٹی انڈسٹری کو فروغ نہ دے سکیں۔ گزشتہ سال پاکستان قیام کے دوران مجھے نہایت خوشگوار حیرانی ہوئی جب FAST کے پڑھے ہوئے ایک لڑکے نے مجھے بتایا کہ اسے مائیکروسوفٹ نے ہائر کر لیا ہے اور وہ مائیکروسوفٹ کے سیاٹل کے آفس میں جاکر ونڈوز کے اگلے ورژن وسٹا کے لیے ڈیویلپمنٹ کرے گا۔ مجھے یہ بھی پتا چلا کہ ایک اس پر ہی موقوف نہیں تھا بلکہ مائیکروسوفٹ نے FAST کے اور بھی کئی فارغ التحصیل طلبا کو ہائر کیا تھا۔ واقعی شدید گھٹاٹوپ اندھیرے میں بھی افق پر ہلکی سی روشن لکیر دکھائی دے رہی ہے۔

بلاگ ڈے

2005-12-21T18:24:00.000+01:00

میں نے آج سے ایک سال قبل اپنا اردو بلاگ شروع کیا تھا۔ اس وقت اردو بلاگز انگلیوں پر گنے جا سکتے تھے۔ اپنا بلاگ شروع کرنے سے پہلے میں دبئی کے شعیب اور آصف اقبال کے بلاگ ایک خاموش قاری کی طرح پڑھتا تھا۔ آصف کا بلاگ مجھے خاص طور پر خاصا پسند تھا۔ خود سے بلاگ شروع کرنے کا میں نے سنجیدگی سے نہیں سوچا تھا۔ میرا بلاگ شروع کرنے کا محرک متحدہ قومی موومنٹ کے قائد الطاف حسین کا ایک ٹیلی فونک خطاب تھا جس میں اس نے کراچی کے عوام کو اکٹھا کرکے پہلے دو قومی نظریے کے پرخچے اڑائے اور پھر ایک نام نہاد گریٹر پنجاب کو مغلظات بکیں۔ اگرچہ وطن عزیز میں نصاب میں شامل دوقومی نظریہ کی وضاحت کے بارے میں میں بھی تحفظات رکھتا ہوں لیکن ایک بھتہ خور اور دہشت گرد تنظیم کے سرگروہ کا اس طرح ملک کے عوام کی ذہانت کی توہین مجھے بہت بری لگی۔ میں یہ توقع رکھتا تھا کہ پاکستان کے سیاستدان اور دانشور الطاف حسین کو اس دریدہ دہنی پر آڑے ہاتھوں لیں گے لیکن مجھے یہ دیکھ کر حیرانی ہوئی پاکستان کے اخبارات اور جرائد اس بارے میں خاموش رہے۔ شاید انہیں اپنی کراچی میں سرکولیشن زیادہ عزیز تھی۔ بس اسی لیے میں نے اپنے دل کا غبار نکالنے کے لیے یہ پوسٹ لکھی۔ یہ شغل مجھے اچھا لگا اور میں باقاعدگی سے سیاستدانوں کی کہہ مکرنیوں اور اخباری کالم نویسوں کے جھوٹ کے پرخچے اڑانے لگا۔ یہ شغل کچھ عرصے مجھ تک ہی محدود رہا۔ بعد میں جب میں نے دوسروں کے بلاگز پر تبصرے کیے تو انہیں بھی میرے بلاگ کا پتا چل گیا۔

اسی اثنا میں میں نے آصف اقبال کے بلاگ پر ایک پوسٹ پڑھی جس میں زکریا کی اردو بلاگنگ کے بارے میں معلومات جمع کرنے کے بارے میں ایک تجویز کا ذکر موجود تھا۔ اس پوسٹ نے گویا میری زندگی بدل دی۔ میں آصف کو اس مقصد کے لیے وکی پیڈیا استعمال کرنے کی تجویز پیش کی جسے وہ اگلے دن ہی روبہ عمل لے آئے۔ یوں ہمارا انٹرنیٹ پر اردو کی ترویج کا مشن شروع ہوا۔ میں نے اس سلسلے میں کئی اوپن سورس پروگرام لکھے۔ اس کے بعد زکریا نے تمام کاوشوں کو اکٹھا کرنے کے لیے ایک الگ سے ڈومین رجسٹر کرنے کی تجویز پیش کی۔ یوں اردو ویب کا قیام عمل میں آیا۔ میں نے اس پر اردو محفل فورم سیٹ اپ کی اور زیادہ تر اسی کے کام میں مصروف رہتا ہوں اور اسی لیے بلاگنگ کو وقت نہیں دے پاتا۔ لیکن میں نے بلاگنگ کو خیرباد نہیں کہا ہے۔ میں اپنے بلاگ پر اپنی مرضی کی بات جیسے چاہوں کہہ سکتا ہوں جبکہ فورم پر مجھے محتاط رہنا پڑتا ہے۔ میں کوشش کروں گا کہ بلاگ کو بھی پھر سے وقت دوں۔ کئی موضوعات پر لکھنے کا سوچا ہوا ہے میں نے اور ان تحریروں کی زد میں بھی کئی لوگ آئیں گے۔

ابھی قدیر احمد رانا کے بلاگ پر حیرت انگیز پوسٹ پڑھی کہ وہ اپنا بلاگ بند کر رہے ہیں۔ ان سے درخواست ہے کہ وہ اپنے فیصلے پر نظر ثانی کریں۔ وہ ماشاءاللہ اچھے آدمی ہیں۔ خوامخواہ غلط فہمی میں مبتلا ہو گئے ہیں کہ انہیں خودستائی کا عارضہ لاحق ہوگیا ہے۔ ہمیں ان کی آن لائن موجودگی کی ضرورت ہے۔

حکومت سرحد کی ترجیحات

2005-11-01T22:10:00.000+01:00

پاکستان کی تاریخ کے بدترین زلزلے کے بعد لاکھوں لوگ کسمپرسی کے عالم میں زندگی بسر کر رہے ہیں۔ زلزلے اور لینڈ سلائیڈز کے بعد اب لوگ موسم کے ہاتھوں مر رہے ہیں اور امداد رس رس کر پہنچ رہی ہے۔ اس صورتحال میں صوبہ سرحد کی حکومت کی ترجیحات چشم کشا ہیں۔ سرحد اسمبلی میں ترمیم شدہ حسبہ بل پیش کر دیا گیا ہے ہے۔ صوبائی وزیر قانون ظفر اعظم سے جب دریافت کیا گیا کہ وہ ایسی تباہی کی صورتحال میں کیوں حسبہ بل کی ضد لگائے ہوئے ہیں تو ان کا کہنا تھا:

ان کا دل بھی خون کے آنسو رو رہا ہے لیکن اگر دیکھا جائے تو یہ آفت بھی انسانوں کے اپنے اعمال کی وجہ سے آتے ہیں۔

ان کا کہنا تھا کہ ’ ہم انہیں اعمال کو درست کرنے کے لیے خدا کے قوانین لانا چاہتے ہیں۔ اس میں اخلاق کا بھی، قوم کا بھی اور دین کا بھی بچاؤ ہے‘۔

اور کیا ایم ایم اے والے لاشوں کے ووٹ بینک پر ناچنا چاہتے ہیں۔ الائی کے علاقے میں جہاں زلزلے سے زبردست تباہی ہوئی ہے، اس لیے کھٹائی میں پڑ گیا ہے ہے کہ اس سے ایم ایم اے کی حکومت کو اپنے ووٹ بینک میں کمی کا اندیشہ محسوس ہوتا ہے۔ اس کے علاوہ بھی علاقے کے بااثر لوگ جن کی خدائی چند بے سہارا لوگوں پر ظلم ڈھا کر چلتی تھی، انہیں اپنے شکنجے سے آزادی نہیں دینا چاہتے۔ اللہ ہم سب کا حامی و ناصر ہو۔ آمین۔

ایک پوسٹ

2005-11-01T19:37:00.000+01:00

خاور کی یہ پوسٹ پڑھیں اور سر دھنیں۔ ہمیں معاشرے میں انصاف کے قیام کے لیے ایسی ہی پنچایتوں کی ضرورت رہ گئی ہے اور ہم مظلوم عورتوں کو اسی سلوک کا حقدار جانتے ہیں۔

اللہ آپ کو جزا دے۔۔

2005-10-11T11:37:00.000+02:00

قوم پر مصیبت کا وقت آیا ہوا ہے اور میں دیار غیر میں بے بسی سے اس کا نظارہ کر رہا ہوں۔ یہاں رہنے والے دوسرے پاکستانیوں کی طرح میں بھی اپنی بساط بھر مدد پاکستان بھیج رہا ہوں اور دعا کر رہا ہوں کہ اس کا کچھ حصہ متاثرین تک بھی پہنچ جائے۔ سونامی کے کئی متاثرین تک یہ امداد پہچتے پہنچتے چند روپے کا چیک رہ گئی تھی۔

مختلف ذرائع سے ملنے والی خبریں اور بلاگ پوسٹس دل چیرنے والی ہیں۔ جب میں ان بچوں کا سوچتا ہوں جو ابھی تک ملبے کے اندر زندہ ہیں تو مجھ سے اپنے آنسو ضبط نہیں ہوتے۔

قوم پر پڑنے والی ایسی مصیبت قوم کے ضمیر کو بھی جگا دیتی ہے۔ ہمہ وقت معاشرے کی خرابیوں پر کڑھنے والے لوگ اب آس پاس کے لوگوں کو دیکھ کر حیران ہیں کہ وہ کس قدر عظیم ہیں۔ میں یہاں یہ کہتا چلوں کہ اچھائی اور برائی عام طور پر ایک تناسب میں ظاہر ہوتی ہیں۔ اللہ تعالٰی نے انسان کو اگر احسن تقویم بنایا ہے تو یہی انسان اسفل السافلین بھی بننا جانتا ہے۔ آج آپ لوگوں کو جہاں ایثار و قربانی کے بے مثال مناظر دیکھنے میں ملیں گے وہاں کچھ لوگ آنے والی امداد کے انتظار میں اپنے دانت بھی تیز کر رہے ہوں گے۔ ہمارے ملک کی تاریخ سیلابوں اور دوسری قدرتی آفات کے لیے آنے والی امداد ہڑپ ہونے کے واقعات سے بھری ہوئی ہے۔

پاکستانی اور بالخصوص اردو بلاگز بھی میرے لیے اس وقت قوم کے ضمیر کا عکس ہیں۔ افتخار اجمل صاحب، دانیال، اسما، حارث اور باقی سب لوگ جو امدادی کاموں میں مصروف ہیں، اللہ تعالٰی آپ کو جزا دے۔

جرمنی کا سیاسی منظر

2005-09-20T17:56:00.000+02:00

ذیل کی تحریر میں نے محفل فورم کے اس تھریڈ پر پوسٹ کی تھی:

کچھ ماہ قبل جرمنی کے ایک انتہائی اہم صوبے کے اتخابات میں شکست کے بعد چانسلر شروڈر نے فیصلہ کیا کہ اب ان کے پاس حکومت چلانے کے لیے ضروری مینڈیٹ نہیں رہا۔ اپوزیشن کیونکہ نہایت طاقتور ہو گئی تھی اس لیے وہ شروڈر کی ہر قانون سازی کی راہ میں روڑے اٹکا رہی تھی۔ چانسلر شروڈر نے نئے مینڈیٹ کے لیے دوبارہ عوام سے رجوع کرنے کا فیصلہ کیا اور مقررہ وقت سے ایک سال قبل انتخابات کرانے کا اعلان کر دیا۔ ہم پاکستان میں اس بات کا تصور بھی نہیں کرسکتے۔ جنرل مشرف کے مشیران خاص ابھی سے عندیہ دے رہے ہیں کہ وہ 2007ء کے بعد بھی صدر رہیں گے اور اس طرح ق-لیگ بھی اقتدار سے چپکی رہے گی۔ اقتدار کی بھوک کا بھر پور مظاہرہ حالیہ بلدیاتی انتخابات میں بھی ہوا جہاں من پسند امیدواروں کو جتانے کے لیے انتخابات سے پہلے اور اس کے دوران ہر گھٹیا حربے کو استعمال کیا گیا۔ یہ اقتدار پر اپنی گرفت مضبوط کرنے کے لیے ہی تو تھا۔

جرمنی میں اپوزیشن پارٹیوں نے انجیلا میرکل کو چانسلرشپ کا امیدوار نامزد کیا اور اسے اپنی بھرپور کامیابی کا پورا یقین تھا لیکن وقت گزرنے کے ساتھ ساتھ اپوزیشن جماعتیں عوام میں مقبولیت کھوتی گئیں۔ خاص طور پر جب چانسلر شروڈر اور انجیلا میرکل کے درمیان ٹی وی پر مباحثہ پیش ہوا تو اس کے بعد شروڈر کی پارٹی کی مقبولیت میں تیزی سے اضافہ ہونے لگا۔ چانسلر شروڈر جرمنی کی تاریخ میں میڈیا کو سب سے مہارت سے استعمال کرنے کی شہرت رکھتے ہیں اور اسی لیے انہیں میڈیا چانسلر بھی کہا جاتا ہے۔ دوسری جانب انجیلا میرکل جو کہ فزکس میں پی۔ایچ۔ڈی ہیں، کو میڈیا ایکسپرٹس کی ایک پوری ٹیم کی خدمات حاصل تھیں لیکن وہ خاطر خواہ پرفارمنس نہ دے سکیں۔ رہی سہی کسر ان کے نامزد وزیرخزانہ کرشوف نے پوری کردی جنہوں نے الیکشن میں کامیابی کے بعد ایک نہایت غیرمقبول معاشی ایجنڈے پر عملدرآمد کا اعلان کردیا۔ اس سے بھی اپوزیشن اتحاد کو کافی تقصان پہنچا۔ وقت گزرنے کے ساتھ ساتھ شروڈر کے اعتماد میں اضافہ ہوتا گیا۔

انتخابات کے نتائج سے اپوزیشن اتحاد میں شامل پارٹیوں کو شدید دھچکا پہنچا ہے۔ جہاں انہیں مطلق اکثریت حاصل ہونے کی امید تھی، اب وہ حکومت سازی کے لیے سادہ اکثریت بھی نہ حاصل کرسکیں۔ دوسری جانب حکومتی اتحاد کو غیر متوقع طور پر عوامی پذیرائی حاصل ہوئی ہے۔ اب الیکشن کے بعد صورتحال یہ ہے کہ کوئی پارٹی بھی از خود حکومت سازی کی پوزیشن میں نہیں ہے۔ ایک امکان یہ ہے کہ بڑی پارٹیاں مل کر ایک قومی حکومت کی تشکیل دیں لیکن اس امکان کو دونوں اطراف سے رد کیا گیا ہے۔ اگرچہ ایسے موقعوں پر جرمنی کا صدر فیصلہ کن کردار ادا کر سکتا ہے لیکن صدر کوہلر نے ایسا کرنے سے انکار کر دیا ہے۔ غور طلب بات یہ ہے کہ تمام تر سیاست جمہوریت کے فریم ورک کے اندر ہو رہی ہے۔ کوئی لوگ کسی قسم کے قومی مفاد کی خاطر فوج کو مداخلت کی دعوت نہیں دے رہے۔ جرمنی کے جمہوری نظام کا پاکستانی سیاسی نظام سے مقابلہ کرنا ہی مضحکہ خیز ہے۔ اس معاملے میں تو بھارت ہی ہم سے کئی درجہ بہتر ہے جہاں کبھی جمہوری عمل میں رکاوٹ نہیں ڈالی گئی۔ گزشتہ انتخابات میں شکست کے بعد واچپائی کے الفاظ “ہم ہار گئے لیکن جمہوریت جیت گئی“ پاکستان کے باشعور طبقے پر بجلی بن کر گرے۔ بھارت میں جمہوری روایات مضبوط ہوتی گئی جبکہ ہمارا جمہوری عمل سے حاصل کیا ہوا ملک اس وقت فوجی آمریت، فصلی بٹیروں اور ملائیت کے علمبرداروں کے شکنجے میں ہے۔

جمہوریت نام ہی بار بار عوام سے رجوع کرنے پر آمادگی کا ہے اور جرمنی کے حالیہ انتخابات نے اس بات کو ثابت کر دکھایا ہے۔

جنرل مشرف کی روشن خیالی

2005-09-18T01:12:00.000+02:00

اب جنرل مشرف کا کہنا ہے کہ وہ کسی سے معافی مانگنے کی ضرورت نہیں سمجھتے اور یہ کہ کسی کو ان سے معذرت طلب کرنے کی جرات نہیں ہو سکتی۔ یہ بات انہوں نے اپنے اس بیان کے پر ہونے والے شدید عوامی رد عمل کے جواب میں کہی ہے جس میں انہوں نے عورتوں کے ساتھ ریپ کو ان کے لیے منافع بخش کاروبار قرار دیا ہے اور مغربی ممالک کا ویزا لگوانے کا آسان ذریعہ قرار دیا ہے۔ اپنی غلطی کا اعتراف کرنا کبھی جنرل مشرف کا سٹرانگ پوائنٹ نہیں رہا۔ جب انڈیا کے سابق وزیر اعظم واچپائی نے جنرل مشرف کو آگرہ میں مذاکرات کے لیے مدعو کیا تو وہاں بھارتی صحافیوں کے سوالات کے جواب میں انہوں نے خم ٹھونک کر کہا ہاں میں ہی ہوں جس نے کارگل میں فوجی دخل اندازی کی تھی اور میں آخری آدمی ہونگا جو اسے غلطی قرار دے گا۔

جب میں نے جنرل مشرف کا مذکورہ بالا بیان پڑھا تو یکایک میری نگاہوں کے سامنے آنے والے واقعات کا نقشہ کھنچ گیا۔ اس چیز کا ادراک کرنے کے لیے کسی جینئس کی ضرورت نہیں ہے کہ قومی اور بین الاقوامی میڈیا اس بیان پر بھوکے بھیڑیے کی طرح جھپٹے گا۔ ہو سکتا ہے کہ روپرٹ مرڈاک کی میڈیا ایمپائر کے زیر انتظام چلنے والے اخبارات صدر بش کے دوست ہونے کے ناطے جنرل مشرف کے ساتھ ہاتھ ہولا رکھیں، لیکن یہ بات طے ہے کہ یہ بیان اب ہمیشہ جنرل مشرف کا تعاقب کرے گا۔ ابھی تو انہوں نے ملک واپس آنا ہے اور یہاں کے میڈیا کا سامنا کرنا ہے۔ تادم تحریر جنرل مشرف کے مشیر خاص شیخ رشید کا بھی وضاحتی بیان نہیں آیا کہ جنرل صاحب کا یہ بیان فلاں قومی مفاد میں تھا۔ لگتا ہے کہ پاکستان کے میڈیا میں آئے دن جنسی جرائم پر اٹھنے والے شور پر تنگ آ کر جو کہ پاکستان کے روشن خیال امیج کو ابھارنے کی تمام تر حکومتی کوششوں پر پانی پھیر دیتا ہے، جنرل مشرف نے کچھ سخت اقدامات اٹھانے کا فیصلہ کر لیا ہے۔ اسلام آباد میں ہونے والی سونیا ناز کی کانفرنس میں بھی چند صحافی تمام وقت ہلڑ بازی کرتے رہے اور پریس کانفرنس کا بائیکاٹ کرانے کی کوشش کرتے رہے۔ ان صحافیوں کا سونیا ناز کے ساتھ رویہ خاصا جارحانہ تھا اور وہ اس کو مشکوک کردار کی عورت ثابت کرنے کی کوشش بھی کرتے رہے۔ یہ یقینا کافی باضمیر صحافی ہوں گے جو کہ “قومی مفاد“ کی خاطر کچھ بھی کر گرزنے کو تیار ہوتے ہوں گے۔

میرے سامنے واقعات کا بہاؤ ایک اور منظر نامے کی تشکیل دے رہا ہے۔ اسے دور کی کوڑی کہیں یا دیوانے کی بڑ، مجھے تو یوں ہی لگتا ہے کہ جنرل مشرف اپنے لیے مستقبل کے سیاسی مدمقابل تیار کر رہے ہیں۔ ایک مرتبہ جب میں نے ضیا کے بلاگ پر مائی مختار برائے صدر پاکستان کے عنوان سے پوسٹ دیکھی تو شبہ مجھے بھی ہوا تھا کہ ایسا شاید دیکھنے میں آ جائے۔ سوچیں وہ کیا منظر ہو گا جب اگلے صدارتی انتخابات کے لیے مائی مختار جنرل مشرف کے مقابل بحیثیت امیدوار کھڑی ہوگی۔

جنرل مشرف کے اس بیان سے ایک تکلیف دہ حقیقت میرے اوپر پھر ایک مرتبہ آشکارا ہوئی ہے اور وہ ہے بحیثیت معاشرہ عورتوں کے ساتھ ہمارا رویہ۔ ہم اپنے آپ کو مسلمان کہیں یا پاکستانی، حقیقت یہ ہے کہ خواتین کے بارے میں ہمارا طرز فکر اور ان کے ساتھ سلوک ہندوانہ طرز معاشرت کا آئینہ دار ہے۔ اسلام میں عورتوں کو دیے گئے حقوق پر سینکڑوں مقالے بھی لکھ دیں لیکن ہم عورتوں کو پاؤں کی جوتی ہی سمجھتے ہیں۔ اس سلسلے میں ایک معاصر بلاگر کی پوسٹ، جس میں انہوں نے عورت کو فتنہ اور مرد کو جنت سے بے دخل کرانے کا مجرم قرار دیا ہے، سے عورتوں کے بارے میں ہماری ذہنی پستی کی پوری طرح سے عکاسی ہوتی ہے۔ ہم لوگوں کی تمام تر مذہبی سمجھ بوجھ عورت پر مرد کی برتری کا ثبوت پیش کرنے میں ختم ہو جاتی ہے۔ میں صرف اتنا جانتا ہوں کہ جنرل مشرف اس طرح کی سوچ رکھنے والا ہمارے معاشرے میں واحد شخص نہیں ہے۔ اس موضوع پر تو میں بعد میں لکھوں گا، فی الحال میں اس پوسٹ میں جنرل مشرف کے بیان پر ہونے والے تبصروں کے روابط اکٹھے کر رہا ہوں۔

اگر جان کی امان پاؤں تو عرض کروں۔۔۔

دولت اور شہرت کے لیے صدر مشرف کا نسخہ؟

فوجی ڈکٹیٹرشپ اور روحانی ڈکٹیٹرشپ

صدر مشرف کی تردید بھی متنازع

صدر کے بیان سے شدید دکھ پہنچا

مشرف کا بیان من و عن چھاپا

بلاگ پوسٹس:

افتخار اجمل بھوپال: Heads of Pakistanis are down due to shame

دختر: I am honored, Mr. President

دانیال؛ انصاف کرو

یوم دفاع کی حقیقت

2005-09-07T17:26:00.000+02:00

وائس آف اردو سروس جرمنی شروع ہونے کے بعد کچھ لوگوں نے سوچا ہو کہ شاید یہ ویب سائٹ بھی بی بی سی اردو ڈاٹ کام کی طرح آن لائن اردو صحافت میں ایک تازہ باب شروع کرے گی لیکن کچھ عرصہ گزرنے کے بعد اس پر نظر پڑی تو یوں معلوم ہوا جیسے نوائے وقت کا ٹیکسٹ ورژن پڑھ رہا ہوں۔ 6 ستمبر کو یوم دفاع کے موقعہ پر اس ویب سائٹ پر یوم دفاع۔ بھارت کیخلاف جنگ جینتے کی یاد
کے عنوان سے ایک مضمون شائع ہوا ہے جس میں پاکستان کی بہادر افواج کو خراج تحسین پیش کیا گیا ہے اور اس بات کی مذمت کی گئی ہے کہ تمام جیتا ہوا علاقہ بھارت کو واپس کر دیا گیا اور یہ کہ اب اسی بھارت سے پینگیں بڑھائی جا رہی ہیں جس سے کبھی جنگ رہتی تھی۔

مجھے وائس آف اردو سروس جرمنی پر موجد مواد کے بارے میں حسن ظن کبھی بھی نہیں تھا لیکن یہ مضمون پڑھ کر مجھے مکمل یقین ہو گیا ہے کہ یہ نیوز ویب سائٹ صحافتی اعتبار سے صفر کے برابر وقعت رکھتی ہے۔ اس اکسیویں صدی کے دور میں جب حقائق چھپانا ممکن نہیں رہا، مضون نگار اسی چالیس سالہ پرانی لائن کو اس یقین کے ساتھ پیٹ رہے ہیں کہ عوام الناس کے پاس خبروں اور معلومات کے اور کوئی ذرائع موجود نہیں ہیں اور وہ پوری فرمانبرداری کے ساتھ اس دھوکہ دہی پر یقین لے آئیں گے۔ 1965 کی جنگ بھٹو کے ایڈونچرازم اور اس وقت کے فوجی حکمرانوں کی ناعاقبت اندیشی کا شاخسانہ تھی جس نے پاکستان کی کمزور فوجی پوزیشن کو پوری طرح ایکسپوز کر دیا۔ کہا جاتا ہے کہ 1971 میں مشرقی پاکستان فوجی مداخلت کرتے ہوئے بھارت کو کسی قسم کی ہچکچاہت محسوس نہیں ہوئی کیونکہ اس بار اسے پاکستان کی بہادر افواج کی اوقات پتا تھی۔ اس بات میں کوئی شک و شبہ نہیں کہ یہ 1965 کی جنگ ہی تھی جو بالآخر بعد میں مشرقی پاکستان کی علیحدگی کا باعث بنی۔

پاکستان میں پڑھائی جانے والی تاریخ شرمناک حد تک مسخ شدہ ہے۔ اس پر مستزاد نظریہ پاکستان کے خود ساختہ ٹھیکیدار اخبارات اور دوسرا میڈیا ہے جو ہر اس شخص پر غدار کا لیبل لگا کر مطعون کرنا شروع کر دیتا ہے جو اصل حقائق کو عوام کے سامنے لانے کی کوشش کرے۔ اسی لیے بی بی سی کو بیکار بکواس کمپنی کہا جاتا تھا کہ وہ 1971 میں مشرقی پاکستان میں ہونے والے واقعات کی رپورٹنگ پاکستانی اخبارات سے مختلف کر رہی تھی۔ یہ تو بعد میں لوگ مخمصے میں مبتلا ہوگئے کہ پاکستان کی بہادر افواج نے ہر محاذ پر بہادری سے پیش قدمی کرتے ہوئے یکایک ہتھیار کیوں ڈال دیے۔ اسی بیکار بکواس کمپنی کے متذکرہ بالا موضوع پر ذیل کے روابط ملاحظہ فرمائیں:

بیس ہزار میں کیا ملا
کیا 1965 کی جنگ ضروری تھی؟
جنگ کی 40 سال پرانی پر تازہ کہانی

حماس کا احتجاج

2005-09-05T18:11:00.000+02:00

سنا ہے کہ فلسطینی تنظیم حماس نے پاکستان اور اسرائیلی رابطوں پر شدید احتجاج کرتے ہوئے کہا کہ اس طرح پاکستان نے ان کی پشت میں چھرا گھونپا ہے۔ شاید حماس والے ٹھیک ہی کہ رہے ہیں۔ پاکستان فلسطینیوں کے احسانات کو فراموش کر رہا ہے۔ مثال کے طور پر جب یاسر عرفات سے کشمیر کی جدوجہد آزادی کے بارے میں سوال کیا گیا تو وہ مسکرا کر طرح دے گئے کہ ان کو سوال کی صحیح طرح سمجھ نہیں آئی تھی اور وہ نہرو امن ایوارڈ وصول کرنے دہلی روانہ ہو گئے تھے۔ پاکستان نے تو اسرائیل سے محض رابطہ کرکے فلسطینیوں کی پشت میں چھرا گھونپ دیا ہے، سوال یہ پیدا ہوتا ہے کہ انڈیا کے اسرائیل سے سفارتی تعلقات قائم ہونے کو کیا نام دیا جائے۔ اس طرح توانڈیا نے فلسطینیوں کو توپ میں ڈال کر گولے کی طرح داغ دیا ہے۔ پاکستان کی خارجہ پالیسی ہمیشہ یوں رہی ہے جیسے سارے جہاں کا غم ہمارے جگر میں ہے۔ باقی دنیا کو کبھی پاکستان کی ذرا بھی پرواہ نہیں رہی اور پاکستانی دوسروں کے غم میں خوامخواہ دبلے ہوتے رہتے ہیں حالانکہ ان کے اپنے اندرونی مسائل بھی کم نہیں ہیں۔ کچھ لوگوں کو فکر ہے کہ ایران ان رابطوں کے بارے میں کیا سوچے گا۔ ایران جو کچھ پاکستان کے بارے میں سوچتا ہے وہ پاکستان کے نیوکلیر سکینڈل کے وقت سامنے آہی گیا تھا۔ ایران اور لیبیا نے پاکستان کے ساتھ اپنے ہوئے ہوئے تمام سودوں کی تمام تفصیلات فرض شناسی کے ساتھ امریکہ کے حوالے کردیں۔ ایک جریدے کے مطابق تو یوں لگتا تھا کہ یہ ممالک پاکستان کے ساتھ اپنا کوئی پرانا حساب چکانا چاہتے ہوں۔ کیا یہی وہ پان اسلامزم تھا جس جذبے کے تحت ان برادر مسلم ملکوں کو ایٹمی راز فراہم کیے گئے۔
پاکستانی تو ہمیشہ فلسطینیوں کی جدوجہد کی حمایت کرتے رہے لیکن انہوں نے کبھی کشمیر کی مزاحمت کو اپنی جدوجہد کے مترادف نہیں قرار دیا۔ کچھ فلسطینی علما تو اس بات پر شاکی تھے ک حکومت پاکستان نے انہیں کبھی مساجد کے افتتاح کے لیے مدعو نہیں کیا جبکہ واجپائی صاحب ہمیشہ انہیں ایسے مواقع پر بلاتے ہیں۔ یہ بات بھی کوئی راز نہیں ہے کہ یاسر عرفات اور اس کی پی ایل او بھٹو کے بیٹوں کی بنائی ہوئی دہشت گرد تنظیم الذولفقار کی سرپرست تھے۔ جدوجہد آزادی کے نام پر طرح طرح کے گل کھلا کر پی ایل او نے خود فلسطینیوں کو مزید مصائب میں دھکیلا ہے۔ 1972 کی اولمپکس میں اسرائیلی دستے کے کھلاڑیوں کو موت کے گھاٹ اتارنے جیسے اقدامات نے ہمیشہ فلسطینیوں کی کی کاز کو نقصان پہنچایا ہے۔
پاکستان بنے ساٹھ سال ہونے والے ہیں۔ ہم دوسروں کے مسائل کیا حل کرسکیں گے خود اپنا ملک دولخت ہونے سے نہیں بچا سکے۔ کیا یہ بہتر نہیں کہ ہم دوسروں کے ساتھ ساتھ اپنی بہتری کے لیے بھی سوچیں۔

واپسی

2005-09-05T15:57:00.000+02:00

عزیز دوستو، السلام علیکم

آج میں نے سوچا ہے کہ کیوں نا اپنے بلاگ پر کچھ پوسٹ کیا جائے۔ یوں تو یہاں پوسٹ کرنے کے لیے میرے پاس ان گنت موضوعات ہیں لیکن لکھنے کا وقت نہیں۔ جب سے محفل فورم سیٹ اپ ہوا ہے، زیادہ تر وہاں ہی لکھ رہا ہوں۔ فورم بھی ماشاءاللہ اپنی ارتقائی منزلیں بخوبی
طے کر رہی ہے۔ بلاگر حضرات وہاں زیادہ نظر نہیں آتے۔ وہ اپنے بلاگ میں زیادہ مصروف ہوتے ہوں گے۔ Fair enough.

ویسے تو میں نے کافی دنوں تک فورم پر بھی کچھ نہیں پوسٹ کیا۔ میں دراصل چھٹیاں گزارنے پاکستان گیا ہوا تھا۔ گرمیوں میں چھٹیاں لاہور سے بہتر کہاں گزرتی ہیں، وہ بھی جولائی اگست کے مہینوں میں۔ پاکستان میں اگرچہ ڈائل اپ کنکشن میسر تھا لیکن پھر بھی بوجوہ میرے لیے انٹرنیٹ کا رابطہ منقطع ہی رہا۔ اجمال اس تفصیل کا یوں ہے کہ میں پاکستان جاتے ہوئے اپنے ساتھ سی ڈیز پر وہ کچھ لے گیا جو کہ کمپیوٹر پر اردو لکھنے کے لیے ضروری ہے۔ گھر پہنچ کر پتا چلا کہ میرے والدین کے کمپیوٹر میں سی ڈی ڈرایئو خراب ہوگئی ہے۔ میں نے سوچا کہ اب صرف سی ڈی ڈرائیو کیا ٹھیک کرواؤں، چلو کمپیوٹر ہی اپ گریڈ کروا لیتے ہیں۔ میرے ایک برادر نسبتی (سالا صاحب) فارغ وقت میں اسی قسم کا کام کرتے ہیں۔ ان سے بات کی تو وہ فوراً کمپیوٹر اٹھا کر لے گئے۔ بدقسمتی سے کمپیوٹر پر توجہ دینے کا وقت انہیں قریباً ڈیڑھ ہفتے بعد ملا اور تب وہ اس نتیجے پر پہنچے کہ چھ سال پہلے خریدے گیا یہ کمپیوٹر اب کسی اپ گریڈ کے لائق نہیں، لہٰذا انہوں نے میرے لیے کم مالیت کا ایک نیا کمپیوٹر خرید لیا۔ مصیبت یہ تھی کہ اس نئے کمپیوٹر کی کنفیگریشن مجھے کچھ پسند نہ تھی۔ سالا صاحب نے کہا، کوئی بات نہیں میں یہ کمپیوٹر واپس بیچ دیتا ہوں۔ بعد میں جب مجھے پتا چلا کہ وہ یہ محض وضع داری میں کہ رہے تھے، واپس بیچنا کچھ آسان بھی نہیں تو بالآخر میں اس نئے کمپیوٹر کی ادائیگی کرکے اسے لے آیا۔ اس پر سالا صاحب نے Windows 2000 انسٹال کی ہوئی تھی۔ تو جناب کمپیوٹر لانے کے بعد ہم نے اسے اردو لکھنے پڑھنے کے قابل بنایا لیکن اس تمام عرصے میں میری چھٹیاں بیت گئیں۔ اس دوران میں نے ایک آدھ مرتبہ کسی انٹرنیٹ کیفے بھی جانے کی کوشش کی لیکن وہاں بھی پاکستان میں انٹرنیٹ کی پسماندگی کے نشان یعنی کہ Windows 98 اور Internet Explorer 5.0 کو پایا اور نامراد گھر واپس آیا۔

انٹرنیٹ کے بغیر میری حالت کے لیے ماہئ بے آب والا محاورہ استعمال کیا جا سکتا ہے۔ یہاں مجھے مشتاق احمد یوسفی کی کتاب آب گم میں مذکور ایک ہندو لڑکے کا ذکر یاد آ گیا جس کی بیوی نے اسے خط میں لکھا کہ “رام قسم ، میں راتوں کو تمہارے بنا ایسے تڑپتی ہوں جیسے چھپکلی کی کٹی ہوئی دم۔“ یقیناً ماہئ بے آب کی تشبیہ اس کے سامنے پانی بھرتی ہے۔ نہیں، میرا اتنا برا حال بھی نہیں ہوا تھا انٹرنیٹ کے بغیر۔

بہرحال میں اپنے والدین کے کمپیوٹر پر اردو نصب کر آیا ہوں اور اپنا لکھا ہوا اردو ایڈیٹر بھی انسٹال کر دیا ہے۔ جرمنی واپس آکر انہیں اردو میں ای میلز بھی کر رہا ہوں۔ اب تک تو سب کچھ بخوبی چل رہا ہے۔

انٹرنیٹ اور کمپیوٹر سے قطع نظر میرا پاکستان کا ٹور کافی چشم کشا رہا۔ اس کے بارے میں میں وقتاً فوقتاً لکھتا رہوں گا۔ جرمنی واپس آکر اردو سیارے کو دیکھا تو جان کر خوشی ہوئی کہ اردو بلاگرز کی تعداد میں خاطرخواہ اضافہ ہو گیا ہے۔ کئی دلچسپ موضوعات پر بحث بھی چلتی رہی۔ بلاگر حضرات شاید ان بحثوں کو اپنے طور ختم کر چکے ہوں لیکن میں کبھی نہ کبھی اس پر اپنا مصرعہ ضرور لگاؤں گا۔

میری غیر حاضری میں زکریا اور قدیر فورم کی دیکھ بھال کرتے رہے۔ ان کا بہت بہت شکریہ۔ جہانزیب اشرف کہاں غائب ہو گئے۔ وہ فورم پر نہیں آرہے اور نہ ہی ای میل کا جواب دیتے ہیں۔ ان کے بلاگ پر تبصرہ کرنے کی کوشش بھی ناکامی سے ہمکنار ہوئی ہے۔ اعجاز آسی نے ابھی تک فورم پر رجسٹر نہیں کیا۔ لگتا ہے وہ “رجسٹریشن کروائیے“ سے زیادہ متفق نہیں ہیں۔ میں کوشش کروں گا کہ جلد ہی فورم کے ترجمے میں تبدیلی کروں۔ آصف اقبال جہاں رہیں خوش رہیں۔ وہ آج کل اپنے امتحانات میں مصروف ہوں گے۔ اللہ تعالٰی انہیں کامیابی سے نوازے، آمین۔

انصاف کے تقاضے

2005-06-28T19:03:00.000+02:00

آج کل سپریم کورٹ میں مختار مائی کے مقدمے کی خبریں میڈیا پر چھائی ہوئی ہیں۔ عوام کی اکثریت مختار مائی سے ہمدردی دکھتی ہے اور لوگ چاہتے ہیں کہ اس واقعے کے مجرم کیفر کردار تک پہنچیں۔ مسئلہ یہ ہے کہ عدالتیں اپنے فیصلوں میں عوام کے جذبات کو ملحوظ خاطر نہیں رکھتی بلکہ واقعاتی شہادت پر فیصلہ دیتی ہیں۔ اگر مختار مائی کے کیس کے سلسلے میں ملزمان ابھی تک بچے ہوئے ہیں تو اس کی سب سے بڑی ذمہ دار پولیس ہے جس نے وقت پر واقعاتی شہادت کو محفوظ نہیں کیا۔

سپریم کورٹ میں پاکستان کے اٹارنی جنرل نے کہا ہے کہ اجتماعی زیادتی کے واقعات میں صرف زیادتی کا شکار ہونے والی کا بیان ہی ان ملزمان کو سزا دینے کے لئے کافی ہوتا ہے۔ اٹارنی جنرل کا یہ استدلال قطعی طور پر ناقابل فہم ہے۔ مجھے ڈر ہے کہ کہیں اٹارنی جنرل اس کیس کی بالکل ہی لٹیا نہ ڈبو دیں۔ گزشتہ دنوں حکومت مختار مائی کا نام ایگزٹ کنٹرول لسٹ میں شامل کرنے پر بین الاقوامی طور پر شدید تنقید کا شکار رہی ہے۔ مجھے لگتا ہے کہ اب اپنا امیج بنانے کی خاطر حکومتی کارندے دوسری انتہا پر جا رہے ہیں۔ اس قسم کی کیس کی پیروی سے مختار مائی کی کاز کو کوئی فائدہ پہنچنے کی امید سے زیادہ اسے نقصان پہنچنے کا اندیشہ ہے۔

عدالتوں کا فیصلہ قبول کرنا بھی مہذب قوموں کے شعار میں شامل ہوتا ہے۔ بعض اوقات یوں بھی ہوتا ہے کہ ملزم کے وکلا حقائق کو ایسے رنگ میں پیش کرتے ہیں کہ جیوری کو ملزم کو بری کئے بغیر چارہ نہیں رہتا۔ اس کی مثال امریکہ میں او۔جے سمپسن کا کیس ہے۔ اہ۔جے سمپسن کے اپنی بیوی کے قاتل ہونے کے بارے میں کسی کو کوئی شبہ نہیں تھا مگر اس کے وکلا نے کیس کو ایسا گھمایا کہ آخر میں او۔جے سمپسن بری ہوگیا۔ اس کے علاوہ حال ہی میں جرمنی میں ایک عدالت نے 11 ستمبر 2001 کے واقعے میں ملوث ہائی جیکرز کے ایک مبینہ معاون کو محض کافی ثبوت نہ ہونے کی بنا پر رہا کر دیا ہے۔ یہ فیصلہ اگرچہ قانون نافذ کرنے والوں کے لیے ایک دھچکا ہے مگر اسے قبول کیے بغیر انکے پاس چارہ نہیں ہے۔ وہ صرف یہ کرسکتے ہیں کہ اگلی مرتبہ زیادہ ٹھوس ثبوت کے ساتھ پیش ہوں۔

~~عام میڈیا اور~~ بالخصوص پاکستانی بلاگرز نے جس طرح مختار مائی کے معاملات پر اپنے جذبات کا اظہار کیا ہے وہ میرے لیے باعث تقویت ہے۔ میرا اندازہ ہے کہ مستقبل قریب میں بلاگنگ بھی پاکستان میں رائے عامہ ہموار کرنے میں اہم کردار ادا کرے گی۔

خبریں اور تبصرے

2005-06-20T01:32:00.000+02:00

بم لگا کر جنت کو چلے

آج کل پاکستان میں دو بہنوں کا خبروں میں کافی ذکر ہے جنہیں خود کش بمبار بہنوں کے نام سے یاد کیا جاتا ہے۔ ان بہنوں کا ذکر مجھے کچھ puzzling سا لگتا ہے۔ بمبار طیاروں کا تو سنا تھا، یہ بمبار بہنیں کیا ہوئیں؟ یہ بھی سننے میں آیا ہے کہ ان بہنوں نے خودکش بم دھماکوں کی تربیت حاصل کی تھی۔ یہ پہلی دفعہ سننے میں آیا ہے کہ خود کشی کی تربیت بھی دی جاتی ہے۔ کیا خودکشی کا کوئی simulator تیار کیا گیا ہے اس مقصد کے لیے؟ رپورٹس کے مطابق ان بہنوں کے ماموں گل حسن ، جو کہ پچاس کے قریب اہل تشیع لوگوں کو موت کے گھاٹ اتارنے کا ملزم ہے، نے انہیں اس بات کا قائل کیا کہ بم لگا لو، جنت تمہارے سامنے ہی ہے۔
مذکورہ بالا بہنوں کے طرز زندگی بھی چشم کشا ہے۔ جس طرح خبروں میں ان بہنوں کے گھر کا ماحول اور ان کے معمولات کے متعلق بیان کیا گیا ہے، اس کے مطابق تو یہ گھرانہ ایک مثالی اسلامی گھرانہ ہوگا اور ہمارے کچھ کرم فرماؤں کے نزدیک یہ بہنیں آئیڈ یل مسلم خواتین ہون گی۔ ان بہنوں کی والدہ کے مطابق ان بہنوں کی زندگی کی کوئی خواہش نہیں تھی۔ وہ پردے کی سخت پابند تھیں۔ وہ چھت پر تک نہیں جاتی تھیں ، ان کے گھر میں ٹی وی نہیں تھا، وہ اس حد تک پردہ کرتی تھیں کہ انہوں نے ہاتھوں پر دستانے چڑھائے ہوتے تھے اور علی ہذالقیاس۔ سچ پوچھیں تو مجھے ان خواتین کے بم دھماکوں پر آمادہ ہونے پر کوئی خاص حیرانی نہیں ہوئی۔ ایسی غیر فطری، قبرستان کے سناٹے جیسی زندگی گزارنے والی لڑکیاں اپنی زندگی کا خاتمہ ہی کرنا چاہیں گی۔ ملک بھر کے دماغی امراض کے ہسپتال ایسے ہی مذہبی جنونیوں سے بھرے پڑے ہیں۔ جو ان سے باہر ہیں، وہ جسم سے بم باندہ کر جنت کی راہ ڈھونڈ رہے ہیں۔

کند جنس با ہم جنس پرواز

ایک خبر کے مطابق سابق ٹیسٹ کرکٹر جاوید میانداد کے بیٹے کی داؤد ابراہیم کی بیٹی سے نسبت طے ہو گئی ہے۔ داؤد ابراہیم ممبئی کی انڈر ورلڈ کا ڈان ہے اور اطلاعات کے مطابق کراچی میں مقیم ہے۔ وہ ممبئی میں ہونے والے بم دھماکوں کے سلسلے میں بھارت کو مطلوب بھی ہے۔ اس خبر سے جہاں لوگوں کے ذہنوں میں کچھ سوال پیدا ہوں گے، وہاں ہو سکتا ہے کہ کچھ واقفان حال کے لیے واقعات کی کچھ کڑیاں جڑ جائیں۔ میرے لیے زیادہ قابل ذکر بات یہ ہے کہ یہ خبر میں نے ابھی تک بی بی سی میں پڑھی ہے۔ پاکستان کے اخبارات نے بالعموم اور کراچی کے اخبارات نے بالخصوص اس معاملے کے متعق ابھی تک چپ سادھ رکھی ہے۔ ہمارے ملک سے متعلق چند خبریں ہمیں باہر کے ذرائع اطلاعات سے ہی ملتی ہیں۔

مٹی پایا کرو

آج روزنامہ جنگ کے کالم نویس عبدالقادر حسن نے برہمی کا اظہار کیا ہے کہ اخبارات خوامخواہ مختار مائی کے معاملے کو بڑھا چڑھا کر بیان کر رہے ہیں۔ اس کے بعد وہ ان امریکی نژاد این جی اوز پر بھی برسے ہیں کہ انہوں نے پاکستان کو بد نام کرنے میں کوئی کسر نہیں چھوڑی ہے۔ عبدالقادر حسن کے خیال میں مختار مائی کو بلاوجہ ملنے والی کوریج سے زیادہ ضروری خبریں پس منظر میں چلی گئی ہیں۔ موصوف کی باتیں پاکستان کے معاشرتی رویے کی عکاس ہیں جہاں مختار مائی جیسے مظلوموں کے لیے واحد راستہ اپنی زندگی کا خاتمہ ہوتا ہے۔ پاکستان میں گینگ ریپ کی خبریں پڑھ کر لگتا ہے کہ یہ اب جنگلیوں کا معاشرہ بن گیا ہے۔ مختار مائی کا کیس اس لیے زیادہ دردناک ہے کہ اس میں باقاعدہ ایک پنچایت نے فیصلہ سنایا کہ اجتماعی آبرو ریزی ہوگی اور اس کے بعد تمام افراد کی موجودگی میں یہ خاتون برہنہ اپنے گھر جائےگی۔ اس کے بعد پولیس کا رویہ حسب معمول شرمناک رہا ہے۔ اگر اس کیس کے ملزمان رہا ہوئے ہیں تو اس کی وجہ واقعاتی شہادت کی عدم موجودگی ہی ہوگی۔ انفارمیشن ٹیکنالوجی کے اس دور میں ایسی خبریں آنا فانا تمام دنیا کی توجہ حاصل کر لیتی ہیں۔ اس میں این جی اوز کوئی کمال نہیں دکھاتی۔ عبد القادر حسن اور ان جیسا موقف رکھنے والے چند اور لکھاری اچھل اچھل کر اعدادو شمار کے ذریعے ثابت کر رہے ہیں کہ امریکہ اور یورپی ممالک میں کہیں زیادہ جنسی زیادتی کے واقعات رونما ہوتے ہیں اور یہ کہ مختار مائی کے واقعے کو محض پاکستان کو بدنام کرنے کے لیے استعمال کیا جا رہا ہے۔ ان نظریہ سازش کے دلدادہ حضرات نے مغربی ممالک میں ہونے والے جنسی زیادتی کے واقعات کا ذکر تو کر دیا لیکن یہ نہیں بتایا کہ کہ ان ملکوں میں بھی کوئی درندہ صفت پنچائیتیں اجتماعی زیادتی کے فیصلے سناتی ہیں؟ کیا ان ملکوں میں بھی سینکڑوں لوگوں کی موجودگی میں چند افراد ایک بے یار و مدد گار غریب عورت کو گینگ ریپ کرتے ہیں؟ کیا ان ممالک میں بھی پولیس اس وقت حرکت میں آتی ہے جب تمام واقعاتی شہادت ضائع ہو جاتی ہے؟ دنیا میں کونسا ایسا ملک ہے جہاں حکومتی سطح کی پہلی ترجیح ایک ریپ کی شکار عورت کے بیرون ملک سفر پر پابندی لگانا ہے؟ بجائے اس کے کہ ہم اپنے معاشرے میں عورتوں کے ساتھ ہونے والے غیر انسانی سلوک کا ادراک کریں، یہاں کے لوگ محض مٹی پاؤ پالیسی پر عمل پیرا ہیں۔

سمر آف کوڈ

2005-06-10T17:56:00.000+02:00

مجھے آج معلوم ہوا ہے کہ گوگل ان گرمیوں میں پروگرامنگ میں دلچسپی رکھنے والے سٹوڈنٹس کے لیے سمر آف کوڈ کا اہتمام کر رہا ہے۔ اس کا مقصد سٹوڈنٹس کو مختلف اوپن سورس پراجیکٹس پر کام کرانا ہے۔ مقررہ وقت پر کامیابی سے اپنا کام مکمل کرنے والوں کو 4500 ڈالر دیے جائیں گے۔ میرے خیال میں یہ سٹوڈنٹس کے لیے ایک معقول رقم کمانے کا سنہری موقع ہے۔ گرمیوں کی چھٹیوں میں بے کار وقت ضائع کرنے کہیں درجے بہتر ہے کہ creative کام کیا جائے اور جس سے کچھ پیسے بھی ہاتھ آ جائیں- اس پروگرام میں شرکت کے لیے گوگل کو درخواست بھیجنا ضروری ہے جس کی آخری تاریخ 14 جون 2005 ہے۔ دن تھوڑے ہی رہ گئے ہیں، لہذا جلدی کریں۔

!!!یس

2005-06-07T18:30:00.000+02:00

اور پاکستان نے ویسٹ انڈیز کے خلاف سیریز کا دوسرا ٹیسٹ جیت کر سیریز برابر کر دی ہے۔ شاباش انضمام الحق اینڈ کمپنی۔ ویسٹ انڈیز میں ویسٹ انڈیز کو ہرانا کوئی معمولی بات نہیں ہے۔ یہاں کا کراؤڈ بھی انڈیا کے کراؤڈ کی طرح شکست کو اتنے ٹھنڈے پیٹوں قبول نہیں کرتا۔ پاکستان ویسٹ انڈیز میں منعقد ہونے والے ماضی کے کئی ون ڈے اور ٹیسٹ میچوں میں فتح کے نہایت قریب پہنچنے کے باوجود نہیں جیت سکا۔ اس کی وجہ یہ تھی کہ اپنی ٹیم کو شکست کے نزدیک دیکھ کر تماشائی ستیڈیم کو نذر آتش کرنے کے لیے تیار ہوتے تھے۔ ویسٹ انڈین امپائر بھی اس صورتحال سے آگاہ ہوتے تھے۔ پاکستانی بالرز ویسٹ انڈین بیٹسمینوں کو آؤٹ کرنے کے بعد literally اس طرح اپیلیں کرتے رہے جیسے کوئی عاشق گھٹنے ٹیک کر اپنی محبوبہ کے سامنے التجا کر رہا ہو، لیکن امپائر بھی ناراض صنم بنے رہے اور یوں اپیلیں رائگاں جاتی رہیں حتی کہ ویسٹ انڈیز میچ جیت گیا۔ پہلی مرتبہ ایسا 1988 میں ہوا جب پاکستان کے کپتان عمران خان تھے جبکہ ویسٹ انڈیز کی قیادت ویوین رچرڈ نے کی تھی۔ دوسری مرتبہ پاکستان کے کپتان وسیم اکرم اور ویسٹ انڈیز کے کپتان رچی رچرڈسن تھے۔ سال مجھے یاد نہیں آ رہا۔

وسیم اکرم سے یاد آیا کہ انہوں نے پاکستانی کرکٹ ٹیم کے ڈریسنگ روم میں ہونے والے واقعے پر کڑی تنقید کی ہے۔ انہوں نے کہا ہے کہ ہر نائب کپتان کپتانی کے خواب دیکھنا شروع کردیتا ہے۔ وسیم اکرم کو شاید اپنا وقت یا آ رہا ہو گا جب انہوں نے دوسرے کھلاڑیوں کے ساتھ مل کے جاوید میانداد کے خلاف بغاوت کی تھی اور انہیں کپتانی سے ہٹا کر خود کپتان بن گئے تھے۔ وسیم اکرم نے اس واقعے میں ملوث افراد کے خلاف سخت ڈسپلینیری ایکشن کا بھی مطالبہ کیا ہے۔ خوب فرمایا ہے انہوں نے۔ جب وسیم اکرم ٹرینیڈاڈ کی بیچ پر نشے میں دھت پکڑے گئے تھے تو ان پر پندرہ ہزار روپے کا بھاری جرمانہ عائد کیا گیا تھا۔

امپائر ڈیوڈ شیپرڈ کے لیے یہ آخری میچ تھا۔ جاتے جاتے وہ پاکستان کی جیت میں کچھ نہ کچھ کردار ادا کر گئے۔ خیر ایسا تو چلتا ہے۔ انہی شیپرڈ نے اپنے کئی فیصلوں سے پاکستان کو میچ ہروائے بھی ہوئے ہیں۔ بہر خیر ایک اچھی خبر سننے کو ملی، ورنہ ہر وقت اخباروں میں ذہنی مریض قسم کے کالم نویسوں کے خوکش بم دھماکوں کی افادیت پر لیکچر سننے کو ملتے رہتے ہیں۔ اس موضوع پر پھر کبھی سہی۔

اردو ایڈیٹر لائٹ UrduEditor Lite

2005-05-29T23:18:00.000+02:00

عزیز دوستو۔ السلام علیکم۔ مجھے یہ عرض کرنا تھی کہ آپ لوگوں کی خدمت میں ایک اور اردو ایڈیٹر (UrduEditor Lite) حاضر ہے۔ اس کی خاص بات یہ ہے کہ یہ ونڈوز 98 پر بھی کام کرتا ہے۔ دراصل میں نے اس ایڈیٹر کے بارے میں کل اردو بلاگنگ پر پوسٹ کیا تھا مگر بوجوہ یہ پوسٹ اردو سیارے پر نمودار نہیں ہو سکی۔ لہذا اپنے بلاگ پر اس کے بارے میں اطلاع دے رہا ہوں۔ اسے استعمال کریں اور اور مجھے اپنے تاثرات سے آگاہ کریں۔ والسلام۔

اور دو فتوی

2005-05-27T17:43:00.000+02:00

پاکستان میں بری امام کے مزار پر ایک بم دھماکے سے 18 افراد جاں بحق ہو گئے ہیں۔ کچھ ابھی بھی جاں بلب ہوں گے۔ ایک اور خود کش دھماکہ ہو گیا۔ زیادہ تر شیعہ زائرین اکٹھے تھے۔ سنی لوگ بھی موجود ہوں گے۔ اب ان دانش فروشوں اور دین کے نام سیاست کی دکان چمکانے والوں کی یقینا باچھیں کھلی ہوں گی جن کے نزدیک خودکش حملوں کو حرام دینے کا فتوی قطعی غیر ضروری تھا۔ جنگ کے کالمسٹ عبدالقادر حسن کا کہنا تھا کہ اسلام کی رو سے پہلے یہ فتوی طلب کیا جانا چاہیے تھا، پھر اس پر سوچ بچار جائز ہوتی۔ مجھے اب عبدالقادر حسن کے کالم کا انتظار رہے گا جس میں وہ اس بم دھماکے پر تبصرہ کریں گے۔ کیا پتا کہ وہ اس خو کش حملہ آور کو خراج تحسین پیش کریں کہ کس طرح اس نے علما کے فتوی دینے کا منہ چڑایا ہے۔ بری امام پر بکھرے ہوئے عورتوں اور بچوں کے جسموں کے اعضا ان نام نہاد مولویوں اور کالم نویسوں کی لاجواب بصیرت کا ناقابل تردید ثبوت پیش کر رہے ہوں گے۔ سچ بات تو یہ ہے کہ ہم مکافات عمل سے گزر رہے ہیں۔ پاکستان کے عوام اور مقتدر طبقے نے عشروں تک جہادیوں کو بہ صرف برداشت کیا بلکہ ان کی کاروائیوں کی حوصلہ افزائی بھی کی۔ ہم لوگوں کے خواب و خیال میں بھی نہیں تھا کہ کبھی یہ لوگ ہم پر بھی حملہ آور ہو سکتے ہیں۔ یہ ہم لوگوں کی چشم پوشی کا نتیجہ ہے کہ اب برین واشڈ جہادیوں کی پوری فوج تیار ہے جو زیر زمین رہ کر کام کرنا جانتی ہے۔ مجھے تو کبھی یہ لگتا ہے کہ عالم اسلام پر ویسا ہی نازک وقت آیا ہوا ہے جیسا کہ صلیبی جنگوں اور حسن بن صباح کے فدائین کے زمانے میں آیا تھا۔ شاید ہمیں بھی ایسے ہلاکو خان کا انتظار کرنا پڑے جو ان فدائین کو ٹھکانے لگا دے۔ مسئلہ یہ ہے کہ اس میں ہم بھی بیچارے رگڑے جائیں گے۔

خبریں اور تبصرے

2005-05-23T00:06:00.000+02:00

خودکش حملوں پر فتوی

آج جنگ کے کالم نویس عبدالقادر حسن نے حسب معمول ادارتی صفحے کی سپیس ضائع کرتے ہوئے ایک فتوے پر تنقید کی ہے جس کی رو سے خوکش حملوں کو حرام قرار دیا گیا ہے۔ یہ فتوی کئی ممتاز علما نے متفقہ طور پر جاری کیا تھا۔ عبدالقادر حسن کے مطابق اس فتوی کے پیچھے برے ارادے کار فرما ہیں۔ ان کے مطابق دنیا میں جہاں جہاں مسلمان آزادی کی تحریکیں چلا رہے ہیں وہاں ان کے پاس اب خوکش حملوں کے علاوہ کوئی چارہ نہیں رہ گیا۔ عبدالقادر حسن کی اس فکر انگیز تحریر نے مجھے واقعی سوچنے پر مجبور کر دیا۔ کیا فلسطینیوں کے خود کش حملے انہیں ایک آزاد فلسطینی ریاست کی جانب ایک قدم بھی نزدیک لا سکے ہیں؟ اور خود ہمارے وطن عزیز میں کونسی حریت پسندی کی تحریک چل رہی ہے جس کے لیے آئے روز خودکش دھماکے ہوتے رہتے ہیں؟ کیا مختلف مکاتب فکر کی عبادت گاہوں پر خود کش دھماکے کسی اعلی مقصد کے حصول کی خاطر ہیں؟

شعیب اختر اور سرفراز نواز

پاکستانی کرکٹ ٹیم کے سابق کپتان عمران خان نے شعیب اختر کو ٹیم سے ڈراپ کرنے کے فیصلے کو غلط قرار دیا ہے اور کہا کہ اگر شعیب اختر کو ڈسپلن کرنا ہے تو ٹیم میں شامل رکھ کر کرنا چاہیے۔ اس سلسے میں ماضی سے مثال لاتے ہوئے عمران خان نے کہا کہ شعیب اختر رویے کے سلسلے میں سرفراز نواز سے بدتر نہیں ہو سکتے۔ سرفراز نواز نے آصف اقبال کے منہ پر گالیاں نکالیں، اسکے باوجود آصف اقبال نے سرفراز نواز کو ٹیم میں کھلایا۔ اب یہ واضح نہیں کہ اس بیان سے عمران خان کا مقصد شعیب اختر کی حمایت تھی یا سرفراز نواز کی بھد اڑانا تھی۔ عمران خان نے آصف اقبال کی قوت برداشت کا ذکر تو کر دیا لیکن یہ نہیں بتایا کی خود ان میں اختلافی رائے برداشت کرنے کی کتنی استطاعت رہی ہے۔ کئی کھلاڑیوں کو محض عمران خان سے اختلاف رائے کی بنا پر اپنے کیریر سے ہاتھ دھونے پڑے تھے۔ ویسے اگر پاکستانی کرکٹرز کی متلون مزاجی کو دیکھا جائے تو عمران خان کی طرز عمل اتنا غلط بھی نہیں تھا۔

پیر تسمہ پا

شیخ رشید نے قوم کو نوید سنائی ہے کہ صدر جنرل پرویز مشرف ٢٠٠٧ کے بعد بھی صدر رہیں گے۔ پاکستانیوں نے یقینا چین کا شانس لیا ہوگا کہ ٢٠٠٧ کے بعد بھی حقیقی جمہوریت برقرار رہے گی۔ اب اس اعلان کو عمل جامہ پہنانے کے لیے قومی اسمبلی جلد ہی ایک آئینی ترمیم کرے گی۔ ہو سکتا ہے کہ جناب پرویز مشرف کو تاحیات صدر بنا دیا جائے۔ اس آئینی ترمیم کی منظوری کے لیے جو عددی اکثریت درکار ہے وہ ایم ایم اے والے ویسے ہی مہیا کر دیں گے۔ اس سے پہلے وہ اسی طرح کا میں نہ مانوں والا ڈرامہ رچائیں گے جس طرح انہوں نے سترہویں ترمیم کی منظوری سے پہلے رچایا تھا۔

شیخ رشید کے اس بیان سے میرے ذہن میں ١٩٩٣ کا سیاسی منظر گھوم گیا جب اس وقت کے وزیر اعظم نواز شریف سے یہ گستاخی ہو گئی تھی کہ انہوں نے غلام اسحاق خان کو اگلی ٹرم کے لیے صدر نامزد کرنے میں تاخیر کر دی تھی۔ بس پھر کیا تھا۔ بھاڑ میں گیا ملک اور سیاسی استحکام۔ ایک ایسا شرمناک سیاسی ڈرامہ کھیلا گیا کہ پاکستانی سیاست دانوں کا مکروہ کردار پوری دنیا کے سامنے مکمل طور پر عیاں ہو گیا۔ بزعم خود جمہوریت کا پرچار کرنے والی دختر مشرق بھی اپنے اصل چہرے میں نظر آئیں، یعنی ہمیں صرف اقتدار سے غرض ہے، جمہوریت وہی ہے جس میں میری پارٹی کو اقتدار ملے۔ اس پورے ڈرامے میں قابل ذکر بات یہ تھی کہ غلام اسحاق خان نے لگتا تھا ہر طرف سے دیکھنا اور سننا چھوڑ دیا تھا۔ اخباری اداریوں کے چیخ چیخ کے گلے بیٹھ گئے تھے لیکن غلام اسحاق خان کے کان پر جوں تک نہ رینگی۔ ایسے میں ایک کارٹون شائع ہوا جس میں غلام اسحاق خان کو پیر تسمہ پا کی مانند پاکستان پر مسلط ظاہر کیا گیا تھا۔ ایک غلام اسحاق خان پر ہی کیا موقوف ہے، پاکستان میں اقتدار کے ایوانوں سے لوگ عزت سے کم ہی نکلتے ہیں، زیادہ تر سنگینوں کی نوک پر ہی نکالا جاتا ہے۔

مڈل ایجز

میں نے کہیں پڑھا تھا کہ مولوی کسی شخص کا نہیں بلکہ ایک کیفیت کا نام جو کسی پر کسی وقت بھی طاری ہو سکتی ہے۔ مجھے تو کچھ یوں لگتا ہے کہ ہم تمام لوگ بحیثیت قوم مولوی پنے میں مبتلا ہیں۔ یہ خیال مجھے لاہور ہائیکورٹ کا فیصلہ سن کر آیا جس میں کہا گیا ہے کہ محض ڈی این اے ٹیسٹ کی بنیاد پر حدود کا فیصلہ نہیں سنایا جا سکتا ہے۔ واضح رہے کہ اس سلسلے میں عدالت کو ایک اسلامی سکالر کی رہنمائی بھی حاصل رہی جن کا کہنا تھا کہ زنا کے مقدمے کے فیصلے کے لیے اسلامی رو سے چار گواہوں کا ہونا ہی ضروری ہے۔ اس فیصلے کو سن کر لگتا ہے کہ یہ اسلامی سکالر ابھی تک مڈل ایجز میں ہی جی رہے ہیں اور اپنے ساتھ پوری قوم کو بھی پتھر کے زمانے میں گھسیٹنا چاہتے ہیں۔ اکیسویں صدی کا زمانہ جا رہا ہے اور یہ لوگ ڈی این اے ٹیسٹ کے واضح فیصلے کو چھوڑ کر چار گواہوں کے انتظار میں بیٹھے ہوئے ہیں۔

اردو کو فیل پا کی بیماری

2005-05-20T22:53:00.000+02:00

ذیل کی تحریر مشتاق احمد یوسفی کی کتاب آب گم سے اقتباس ہے۔
بشارت نے ان دنوں بی-اے کا امتحان دیا تھا اور پاس ہونے کا امکان بقول ان کے ففٹی ففٹی تھا۔ ففٹی ففٹی اتنے زور، فخر اور وثوق سے کہتے تھے گویا اپنی کانٹا تول نصفا نصف نالائقی سے ممتحن کو کڑی آزمائش میں ڈال دیا ہے۔ فرصت ہی فرصت تھی ۔ کیرم اور کوٹ پیس کھیلتے۔ روحوں کو بلاتے اور اور ایسے سوال کرتے کہ زندوں کو حیا آتی۔ کبھی دن بھر بیٹھے نظیر اکبر آبادی کے کلیات میں وہ نقطے والے بلینک پر کرتے رہتے جو منشی نول کشور پریس نے بتقاضائے تہذیب و تعزیرات ہند خالی چھوڑ دیے تھے۔ گفتگو میں ہر جملے کے بعد شعر کا “ٹھیکا“ لگاتے۔ افسانہ نویسی کی مشق و مشقت بھی جای تھی۔ نیاز فتح پوری کی اطلسی فقرہ طرازی اور ابوالکلام کی جھومتی جھامتی گج گامنی نثر کی چھاپ، ایک انہی پر موقوف نہیں، اچھے اچھوں کی طرز تحریر پر تھی۔ بعضوں پر ماتھے کی جھومر کی مانند۔ کچھ پر دھوبی کے نشان کی طرح۔ اور کچھ پر اس طرح جیسے انگریز ملاح اپنی محبوبائوں کی تصویریں جسم پر گدوا لیتے ہیں۔ جب ذرا گردن جھکائی دیکھ لی۔ کسی کی محتاجی نہیں۔ اردو نثر اس زمانے میں فیل پا میں مبتلا تھی۔ اس میں کچھ افاقہ ہوا تو معجون فلک سیر کھا کر ٹیگوری ادب پاروں کے اڑن غالیچوں پر سوار ہو گئی۔ بشارت کے اک افسانے کا کلائمکس کچھ اس طرح تھا؛
انجم آرا کی حسن آفرینیوں، سحر انگیزیوں اور حشر سامانیوں سے مشام جاں معطر تھا۔ وہ لغزیدہ لغزیدہ قدموں سے آگے بڑھی اور فرط حیا سے اپنی اطلسی بانہوں کو اپنی ہی دزدیدہ دزدیدہ آنکھوں پر رکھا۔ سلیم نے انجم آرا کے دست حنائی کو اپنے آہنی ہاتھ میں لے کر پتھرائی ہوئی آنکھوں سے اس کی ہیرا تراش کلائی اور ساق بلوریں کو دیکھا اور گلنار سے لبوں پر ۔۔۔۔چار نقطے ثبت کر دیے۔ اس ذمانے میں لفظ بوسہ فحش سمجھا جاتا تھا لہذا اس کی جگہ نقطے لگا دیے جاتے تھے۔ بشارت گن کر اتنے ہی نقطے لگاتے جن کی اجازت اس وقت کے حالات، حیا یا ہیروئن نے دی ہو۔ ہمیں اچھی طرح ہے کہ اس زمانے میں انجمن ترقی اردو کے رسالے مین ایک مضمون چھپا تھا۔ اس میں جہاں جہاں لفظ بوسہ آیا، وہاں وہاں مولوی عبدالحق نے بربنائے تہذیب اس کے ہجے یعنی ب و س ہ چھاپ کر الٹا اس کی لذت و طوالت میں اضافہ فرما دیا۔ یہاں ہمیں ان کا یا اپنے حیب لبیب کی طرز نگارش کا مذاق اڑانا مقصود نہیں۔ ہر زمانے کا اپنا اسلوب اور آہنگ ہوتا ہے۔ لفظ کبھی انگرکھا، کبھی عبا و عمامہ، کبھی ڈنر جیکٹ یا فولس کیپ، کبھی پیر میں پائل یا بیڑی پہنے نظر آتے تھے۔ اور کبھی کوئی مداری اپنی قاموسی ڈگڈگی بجاتا ہے تو لفظوں کے سدھے سدھائے بندر ناچنے لگتے ہیں۔

خبریں اور تبصرے

2005-05-12T00:02:00.000+02:00

کلچرل ڈفرنس

آج کل پاکستان میں ایک کارٹون کی اشاعت پر کافی لے دے ہو رہی ہے جس میں پاکستان کو ایک کتے سے مشابہت دی گئی ہے جسے ایک امریکی فوجی شاباش دے کر کہ رہا ہے کہ جاؤ اب اسامہ کو پکڑ کر لاؤ۔ اس سلسلے میں طرح طرح کی باتیں سننے میں آ رہی ہیں۔ پاکستانی پارلیمنٹ امریکی صدر سے معذرت کا مطالبہ یوں کر رہی ہے جیسے وہ اس اخبار کے مدیر ہوں۔ اگر امریکی صدر امریکی اخبارات پر اتنا کنٹرول رکھتے تو سب سے پہلے ان کارٹونوں کی اشاعت رکواتے جن میں انہیں بندر کی مانند دکھایا جاتا ہے۔ آج کئی امریکی جرائد میں پاکستان میں اس سلسے میں پیدا ہونے والے رد عمل پر افسوس کا اظہار کرتے ہوئے اسے ثقافتوں میں فرق کا مظہر قرار دیا ہے۔ ایک آرٹیکل میں لکھا گیا ہے کہ مغربی دنیا میں کتے کو انسان کا بہترین دوست سمجھا جاتا ہے اور یہ کہ اس کارٹون کی اشاعت کا مقصد پاکستان کی بے توقیری نہیں تھا۔ یہ تو اب جناب صدر سے پوچھنا چاہیے، کیا معلوم وہ اسے اپنے لیے عزت افزائی تصور کرتے ہوں۔ اب امریکی جرائد کو اس بات پر بھی روشنی ڈالنی چاہیے کہ گوانتاناموبے میں قران کی بے حرمتی مغرب کی کونسی ثقافتی روایت کے مطابق ہے۔ ہم لوگ تو ٹھہرے جاہل، ہمیں اس کلچرل ڈفرنس کی کہاں سمجھ آتی ہے۔

قومی وقار کی علامتیں

آج جنگ کے کالم نویس جناب عبدالقادر حسن نے پبلک مقامات سے میزائلوں اور ایٹمی دھماکون سے متعلقہ ماڈلز ہٹانے پر کافی واویلا کیا ہے اور آخر میں حقارت سے مشورہ دیا ہے کہ اب مینار پاکستان کو بھی ہٹا دو۔ پاکستان غالبا وہ واحد ملک ہے جہاں پبلک مقامات کو بیلسٹک میزائلوں اور ایٹمی دھماکوں کے ماڈلز سے آراستہ کیا جاتا ہے۔ میری نظر میں یہ محض خود فریبی ہے۔ ہم اس طرح خود کو اپنے ناقابل تسخیر ہونے کا یقین دلاتے رہتے ہیں۔ ایٹمی طاقت کا حصول اگرچہ خوش آئند بات ہے لیکن اس کے لیے ظرف بھی چاہیے۔ ہمارے کالم نویس نہ جانے کن لایعنی باتوں کو ہمارے قومی وقار کا مسئلہ بنا کر اخبار کی سپیس ضائع کرنا شروع کر دیتے ہیں۔ پاکستان کے ایٹمی طاقت ہونے کو ہمارے تبصرہ نگار اور کالم نویس عجیب رنگ دے دیتے ہیں۔ ایک مرتبہ بھارتی کرکٹ ٹیم پاکستان کے دورے پر تھی۔ بھارتی بیٹسمین ٹنڈولکر نے تاخیر سے ٹیم میں شمولیت اختیار کی تو ٹنڈولکر کو اگلا ٹیسٹ میچ کھیلانے کے لیے بھارتی ٹیم نے پاکستانی کرکٹ بورڈ سے اجازت مانگی جو کہ اس نے بخوشی دے دی۔ اس پر ایک تجزیہ نگار کا تبصرہ تھا، ہاں ہاں کھیلنے دو ٹنڈولکر کو، ہم اس سے کیا ڈرتے ہیں، آخر ہم ایٹمی طاقت ہیں۔ چھوڑیں آپ کہیں گے کہ کیا ہر بات میں کرکٹ کو لے بیٹھتا ہوں۔

علامہ اسد

جنگ ہی کے ارشاد حقانی صاحب آج کل ایک نومسلم جرمن سکالر علامہ اسد کے بارے میں لوگوں کو معلومات فراہم کر رہے ہیں۔ حقانی صاحب اپنے روابط استعمال کرتے ہوئے علامہ اسد کی نایاب تصانیف کا کھوج لگا رہے ہیں۔ اس سلسلے میں حقانی صاحب کا کہنا ہے کہ آج کے دور میں عالم اسلام کو جن چیلنجز کا سامنا ہے، علامہ اسد کے افکار سے ان سے نمٹنے میں بہت مدد مل سکتی ہے۔ یہاں تک تو بات ٹھیک ہے۔ دراصل حقانی صاحب ایک سے زیادہ مرتبہ جسٹس جاوید اقبال سے منسوب ایک بات کا ذکر کر چکے ہیں کہ علامہ اقبال واضح طور پر مغربی تہذیب کے بارے میں فیصلہ نہیں کر پائے تھے۔ حقانی صاحب کے نزدیک یہ علامہ اقبال پر ایک مستندفیصلہ ہے اور اس لیے وہ مشورہ دیتے ہیں کہ علامہ اسد کے افکار سے استفادہ کیا جائے۔ حقانی صاحب کے مطابق یہ بات جسٹس جاوید اقبال نے انہیں ایک ملاقات میں بتائی تھی جس میں محض تین یا چار افراد شریک تھے۔ حیرانی کی بات ہے کہ حقانی صاحب ایک مرتبہ کی کی گئی اس بات کی بنا پر علامہ اقبال کے بارے میں فیصلہ سنا دیتے ہیں۔ علامہ اسد یقینا ایک عظیم سکالر ہوں گے اور ان کے افکار سے استفادہ بھی زمانے کی اشد ضرورت ہوگا لیکن اس کے لیے علامہ اقبال کو پس منظر میں دھکیلنا کیا ضروری ہے۔ محض اقبال کا فرزند ہونا اس بات کی دلیل نہیں ہے کہ جسٹس صاحب اقبال پر سند بھی ہیں۔ لگتا ہے کہ خود جاوید اقبال مغربی تہذیب کے بارے میں واضح فیصلہ کر چکے ہیں۔ اس سلسلے میں وہ شراب کے جائز ہونے کے بارے میں بھی دلائل دیتے ہیں۔ حقانی صاحب کو جاوید اقبال کا حوالہ دینے سے پہلے تسلی کر لینا چاہیے کہ وہ اس وقت مغربی تہذیب کے زیر اثر ہیں یا ہوش میں ہیں۔

پاک فضائیہ کی خواتین

بی بی سی کے ویب پیج پر یہ خبر پڑھ کر مجھے خوشگوار حیرت ہوئی کہ کئی پاکستانی خواتین نے کامیابی سے پاک فضائیہ کی ٹریننگ مکمل کر لی ہے اور اب وہ باقاعدہ لڑاکا ہوائی جہازوں کی پائلٹ بن گئی ہیں۔ افواج پاکستان کی جانب سے اچھی خبریں سننے کو کم ہی ملتی ہیں اور یہ ایسی ہی اچھی خبر ہے۔ اگر ہم ترقی یافتہ اقوام میں اپنا مقام حاصل کرنا چاہتے ہیں تو ہمیں خواتین کو تمام زندگی کے شعبوں میں مساوی مواقع فراہم کرنا ہوں گے۔

شکوک کے سائے

2005-05-01T11:19:00.000+02:00

پاکستانی کرکٹ ٹیم کی بھارت میں عمدہ کارکردگی جہاں میرے لیے باعث مسرت تھی، وہاں میرے ذہن میں خدشات بھی اٹھ رہے تھے۔ یہ بات شک و شبہ سے بالا تر ہے کہ پاکستانی ٹیم انتہائی باصلاحیت کھلاڑیوں پر مشتمل ہے۔ اس کے باوجود پاکستان میں کرکٹ کی تاریخ اس بات کی شاہد ہے کہ ہماری ٹیم کو فتوحات بھی راس نہیں آتیں۔ کسی بھی کامیابی کے بعد میڈیا کی تعریفوں اور انعامات کی بھرمار سے کچھ کھلاڑی کھیل کی سپرٹ کو فراموش کر دیتے ہیں اور اپنی شخصیت کے سحر میں مبتلا ہو جاتے ہیں۔ یہ چیز ہمیشہ ٹیم سپرٹ کے لیے زہر قاتل رہی ہے۔ پاکستانی ٹیم نے 1992 میں ورلڈ کپ جیتا تھا۔ اس کامیابی پر ٹیم کے ہر کھلاڑی کو تقریبا نصف کروڑ روپے کے لگ بھگ انعامات ملے تھے۔ پاکستانی کھلاڑیوں کے میدان سے باہر رویے کا اس بات سے اندازہ لگایا جا سکتا ہے کہ وہ محض مزید رقوم کے حصول کی خاطر اس وقت کے کپتان عمران خان سے باغی ہو گئے۔ اس سلسلے میں سلیم ملک کا بیان بھی ریکارڈ پر ہے جس میں انہوں نے کہا تھا کہ آئندہ کوئی کھلاڑی عمران خان کی قیادت میں نہیں کھیلے گا۔ یہ بیان اس کپتان کے متعلق دیا گیا تھا جس کے زیر قیادت ایک صرف ایک ماہ قبل ورلڈ کپ جیتا گیا تھا۔ عمران خان نے بھی از خود ریٹائرمنٹ کا اعلان کر دیا۔ اس کے بعد اسی ورلڈ کپ کی فاتح ٹیم نے یکے بعد دیگرے اپنی تارخ میں ون ڈے میں کم سے کم سکور پر آؤٹ ہونے کے کئی ریکارڈ قائم کیے۔

پاکستان میں ہونے والے ٹوئنٹی ٹوئنٹی ٹورنامنٹ کی ایک خبر سے میرے خدشات کی تصدیق ہوتی ہے۔ شعیب ملک نے انڈیا میں پاکستان کی بیٹنگ لائن کے لیے ریڑھ کی ہڈی کا کردار ادا کیا، لیکن پاکستانی ٹورنامنٹ میں ان کا رویہ نہایت غیر مناسب تھا۔ یہ نہ صرف پاکستانی کرکٹ کے لیے نقصان دہ ہے بلکہ اس سے ان کا اپنا کیریر خطرے میں پڑ سکتا ہے۔ یہ وہ رویہ ہے جس کا مظاہرہ ماضی کے کھلاڑی باسط علی اور راشد لطیف بھی کر چکے ہیں اور اس کا خمیازہ بھی بھگت چکے ہیں۔ ضرورت اس بات کی ہے کہ اس وقت کرکٹ بورڈ کی اتھارٹیز اور ٹیم کے کپتان ڈسپلن پر سختی سے عمل کروائیں۔ شعیب ملک کو جرمانہ کیا جا چکا ہے۔ شاید انہیں کچھ میچوں کی پابندی کا سامنا بھی کرنا پڑے۔ میں دعا ہی کر سکتا ہوں کہ ٹیم کے کھلاڑی ذاتی انا کو کھیل کی سپرٹ کے آڑے نہ آنے دیں۔ یہ وہ پہلو ہے جس پر ٹیم کے کوچ کو بھی خصوصی توجہ دینی چاہیے۔

مستقبل کا لائحہ عمل

2005-05-01T09:46:00.000+02:00

آج سے چند ماہ قبل چند اردو بلاگرز نے انٹرنیٹ پر اردو کی ترویج کے لیے ایک مربوط کاوش کا فیصلہ کیا جس کے نتیجے میں اردو بلاگنگ اور اردو وکی پیڈیا سیٹ اپ کیے گئے۔ یہ زکریا اور آصف کی دریا دلی کے باعث ہی مکن ہو سکا جنہوں نے اپنی ویب سپیس اردو کی ترویج کے کام کے لیے مختص کی۔ اب ایک بار پھر زکریا کی جانب سے ایک انقلابی تجویز پیش کی گئی ہے کہ اردو کی ترویج کے سلسلے میں کی جانے والی کاوشوں کو ایک جگہ پر اکٹھا کیا جائے اور اس کے لیے ایک علیحدہ ڈومین کا بندوبست کیا جائے۔ زکریا نے اس ڈومین کے نام کا انتخاب کے ووٹ بھی طلب کرلیے ہیں۔ اس کے لیے ان کی بلاگ پر جا کر اپنے پسند کے نام کا انتخاب کیجیے۔ اس ڈومین پر اردو سے متعلقہ مختلف ذرائع اکٹھے کیے جائیں گے جن میں اردو بلاگرز کی فہرست، اردو بلاگز کا فیڈ ایگریگیٹر (اردو سیارہ) ، اردو فورم اور اردو وکی پیڈیا وغیرہ شامل ہوں گے۔

میری دانست میں یہ ڈومین ایک اردو پورٹل کی جانب پہلا قدم ہے۔ بہتر ہوگا کہ اس کے لیے ایک ایسے کونٹینٹ مینیجمنٹ سسٹم کا انتخاب کیا جائے جو مذکورہ بالا تمام ذرائع کو بآسانی اکٹھا پیش کرسکتا ہو اور جس کے ذریعے بعد میں بھی حسب ضرورت مختلف سیکشن شامل کیے جاتے رہ سکیں۔ یہ اردو پورٹل مکمل طور پر یونیکوڈ اردو پر مبنی ہونا چاہیے۔ اس مقصد کے لیے content management system یا CMS میں ردو بدل کی ضرورت بھی پیش آئے گی۔ اگرچہ CMS کا مکمل اردو ترجمہ بھی مستقبل کے لائحہ عمل میں شامل کیا جا سکتا ہے لیکن میرے خیال میں شروع میں محض اردو کی سپورٹ فراہم کرنا ہی کافی ہوگا۔ یہ کام بھی اگرچہ آسان نہیں ہے لیکن پھر بھی کچھ سٹائل شیٹس اور ٹیمپلیٹس میں ردو بدل کرکے CMS کو اردو ڈسپلے کرنے کے قابل بنایا جا سکتا ہے۔ PHP اور MySQL پر مبنی کونٹینٹ مینیجمنٹ سسٹمز کی مثالیں Drupal, Typo3 اور Mambo ہیں۔ مجھے اس بات کا اعتراف ہے کہ CMS کے سلسلے میں میرا عملی تجربہ نہ ہونے کے برابر ہے۔ اس سلسلے میں ہمیں اگر کوئی صاحب اس سلسلے میں موثر رہنمائی فراہم کر سکیں تو کمال عنایت ہوگی۔

اب تک ہم اردو کی ترویج کے سلسلے میں زیادہ تر تکنیکی کام کرتے آئے ہیں۔ میری خواہش ہے کہ اردو میں ادبی کام کا بھی کوئی سلسلہ شروع کیا جائے۔ انٹرنیٹ پر پہلے سے ہی کئی آن لائن اردو جرائد موجود ہیں جو تصویری اردو پر مبنی ہیں۔ میرے ذہن میں یہ خیال تھا کہ ان میں سے اگر کسی کو تکنیکی مدد فراہم کی جائے تو وہ ہمارے اردو پورٹل پر ایک الگ ادبی سیکشن کا انتظام سنبھال سکیں گے۔

مجھے ایک یونیکوڈ اردو فورم کا بھی انتظار ہے۔ اس فورم کے نام کے لیے ممکنہ نام محفل، انجمن یا بزم ہو سکتا ہے۔

ریڈار کی غلطی

2005-04-29T18:35:00.000+02:00

کل کا واقعہ ہے کہ امریکہ کے خاندان بشیہ کے شہنشاہ جارج بش نہایت کروفر سے اپنے تخت طاؤس پر بیٹھے امریکہ کے کئی کھرب ڈالر کے دفاعی بجٹ کی منظوری دے رہے تھے۔ ظاہر ہے کہ تمام دنیا پر اپنی طاقت کا سکہ بٹھانا کوئی سستا تو نہیں پڑتا۔ تو جناب مابدولت کے سامنے میز پر نقشہ تھا جس پر تیل کے ذخائر رکھنے والے ممالک پر سرخ دائرہ لگا ہوا تھا۔ نہ صرف یہ بلکہ ایسی جگہیں جہاں مستقبل میں تیل نکلنے کا شائبہ بھی تھا، ان جگہوں پر بھی شہنشاہ بش نے نشان لگائے اور اپنے نورتن ڈک چینی کی طرف اشارہ کیا۔ پردھان منتری ڈک چینی نے اپنے بادشاہ کا اشارہ سمجھتے ہی پریس کانفرنس سے خطاب کرنا شروع کر دیا۔ پریس کانفرنس میں ایران اور شام وغیرہ کے لتے لیے جانے لگے۔ ڈک چینی نے الزام لگایا کہ عراق سے غائب ہونے والے وسیع تباہی کے ہتھیار شام اور ایران نے آپس میں آدھے آدھے بانٹ لیے ہیں، لہذا جلد ہی امریکہ ان دونوں ممالک کو مزا چکھا دے گا۔ یہ پریس کانفرنس براہ راست ٹیلی کاسٹ ہو رہی تھی اور دنیا دہشت سے لرزہ براندام ہو رہی تھی۔ یکایک کیا ہوا کہ وہائٹ ہاؤس کی سیکیورٹی پر مامور افراد بھاگے بھاگے آئے اور چلانے لگے ، بادشاہ سلامت، بادشاہ سلامت۔۔غضب ہو گیا۔ اس دخل در معقولات پر آگ بگولا ہو کر شہنشاہ جارج بش چلائے، کیا بکواس ہے، کیوں شور مچا رکھا ہے۔ سیکیورٹی پرسنل نے تھر تھر کانپتے ہوئے عرض کیا، بادشاہ سلامت وہائٹ ہاؤس کے ریڈار پر ایک میزائل نظر آ رہا ہے جس کا رخ سیدھا وہائٹ ہاؤس کی طرف ہی ہے۔ شہنشاہ سلامت کے ذہن میں فورا 11ستمبر 2001 کا منظر گھوم گیا جب امریکہ میں ورلڈ ٹریڈ سنٹر پر ہائی جیک کیے گئے جہاز ٹکرائے تھے۔ تب شہنشاہ سلامت ریاست نبراسکا میں ایک چوہے کی طرح بل میں گھس کر چھپے رہے جب تک انہیں یقین نہیں ہو گیا کہ تمام امریکہ میں تمام پروازیں معطل کر دی گئی ہیں۔ یہ سوچنا تھا کہ تمام کانفرنس ہال میں ایک ناخوشگوار بو پھیل گئی۔ یہ دراصل بادشاہ سلامت کی ریح خارج ہوئی تھی۔ پریس کانفرنس میں موجود لوگوں کا سانس لینا دشوار ہو گیا۔ بادشاہ سلامت اپنا تمام کروفر بھول کر حواس باختہ ہوگئے اور چلانا شروع کر دیا، یہ میزائل ضرور اسامہ بن لادن نے چلایا ہے، ارے مجھے کسی طرح بچا لو۔

یکایک تمام وہائٹ ہاؤس کی سیکیورٹی حرکت میں آ گئی۔ بادشاہ سلامت کے محل کے آس پاس کھڑے عوام کو کوڑے پڑنا شروع ہو گئے۔ خود شہنشاہ بش کے محافظوں نے روتے چلاتے بادشاہ کو پالکی میں ڈالا اور پناہ گاہ کی طرف دوڑ لگا دی۔ نورتن ڈک چینی نے بھی پالکی میں سوار ہونے کی کوشش کی تو بادشاہ سلامت نے ٹھڈا مار کر باہر نکال دیا، ابے تو نے تو ابھی پریس کانفرنس سے خطاب کرنا ہے۔ مجبورا پردھان منتری کو کسی اور پناہ گاہ کی جانب لیجایا گیا۔ اس اثناء میں محافظ فوج نے وہائٹ ہاؤس کے باہر مورچے سنبھال لیے اور ہیلی کاپٹرز نے پرواز کرنا شروع کردی۔

کچھ دیر بعد کسی نے ایک عجیب سی بات نوٹ کی کہ ریڈار پر حملہ آور میزائل ساکت نظر آ رہا ہے جیسے وہ حملے کا انتظار کر رہا ہوں۔ اس شخص نے دوسرے شخص کو بلایا، دوسرے نے تیسرے کو بلایا اور یوں دیکھتے ہی دیکھتے ریڈار سکرین کے قریب جھمگٹا لگ گیا لیکن پاس جانے کی کسی کی ہمت نہیں ہو رہی تھی، جیسے میزائل ریڈار سکرین سے نکل کھا ہی جائے گا۔ اتفاق سے ادھر سے صفائی کرنے والی خادمہ کا گزر ہوا۔ وہ ریڈار سکرین دیکھ کر ٹھٹک گئی، اس نے صفائی والا کپڑا برآمد کیا اور اس سے ریڈار کی سکرین پونچھ دی۔ یکایک حملہ آور میزائل سکرین سے غائب ہو گیا۔ خادمہ نے باقی لوگوں کی طرف مڑ کر دیکھا اور معذرت خواہانہ لہجے میں کہنے لگی، معاف کیجیے گا، جلدی میں یہ سکرین صاف کرنا بھول گئی تھی۔ یہ کہ کر وہ سب کو سکتے کے عالم میں چھوڑ کر چلی گئی۔ کچھ لحظے بعد جب لوگوں کو صورتحال کی آگاہی ہوئی تو انہوں نے اپنی شرمندگی مٹانے کے لیے آئیں بائیں شائیں کرنا شروع کر دیا۔ ادھر بادشاہ سلامت اپنے چوہے کے بل جیسی پناہ گاہ میں تھر تھر کانپتے ہوئے منہ میں انگوٹھا لے کر چوس رہے تھے۔ انہیں اصل صورتحال سے آگاہ کیا گیا مگر وہ اپنی پناہ گاہ سے نکلنے کو تیار نہ ہوئے۔ مجبورا ڈک چینی نےان کی گچی میں ہاتھ ڈال کر جھٹکا دیا، تب وہ باہر آئے۔ پھر بادشاہ سلامت کو پر سکون کرنے کے لیے تھوڑی سی مے نوشی کرائی گئی۔ کچھ اوسان بحال ہوئے تو ہمت کرکے ڈک چینی نے دنیا پر حکومت کی منصوبہ بندی کے لیے درکار چار کھرب ڈالر کا چیک منظوری کے لیے شہنشاہ بش کے سامنے رکھا، جس پر مابدولت نے فورا دستخط کر دیے۔

اس تحریر کا محرک دراصل یہ خبر تھی۔ میں نے ذرا نمک مرچ لگا کر بیان کر دیا۔ میرا خیال ہے کہ میں غائب ہو جاؤں، کہیں NSA والے IP-Address کے ذریعے ہی میرا پتا چلا کر مجھ پر میزائل فائر نہ کر دیں۔

ایک اردو نوٹ پیڈ

2005-04-24T12:14:00.000+02:00

عزیز دوستو، اردو ایڈیٹر آپ کی خدمت میں حاضر ہے۔ آپ اس کے بارے میں تفاصیل اردو بلاگنگ پر ملاحظہ کر سکتے ہیں۔ مجھے آپ کی رائے کا انتظار رہے گا۔ فی الحال تو میں نے Visual Studio کی کولیکشن میں سے ہی ایک آئکون استعمال کیا ہے۔ اگر مجھے کوئی بہتر گرافکس ملے تو میں انہیں پروگرام میں شامل کر دوں گا۔

کامیابی کے عناصر

2005-04-19T23:23:00.000+02:00

پاکستان نے انڈیا کے خلاف ون ڈے سیریز 2-4 سے جیت لی۔ میرے خیال میں تو دو-صفر کے خسارے سے نکل کر اور مزید دو میچ جیت کر سیریز جیتنے کی سنسنی خیزی اور خوشی کی بات ہی اور ہے۔ ویسے تو پاکستان نے 1987 میں انڈیا کو چھ ون-ڈے کی سیریز میں 1-5 سے ہرایا تھا، لیکن اس زمانے میں ٹیم میں عمران خان، میانداد اور وسیم اکرم شامل تھے۔ اس زمانے میں پاکستان کے لیے انڈیا کو کرکٹ کے میدان میں شکست دینا معمول کی بات تھی۔ حالیہ سیریز سے پہلے سب کا یہ مشترکہ خیال تھا کہ پاکستان کی ٹیم انڈیا کے لیے تر نوالہ ثابت ہوگی۔ انڈیا کی ٹیم بلاشبہ دنیا کی بہترین ٹیموں میں شمار ہوتی ہے اور اس کی بیٹنگ لائن اپ کافی مرعوب کر دینے والی ہے۔ اس کے مقابلے میں پاکستان کی ٹیم زیادہ تر نسبتا ناتجربہ کار کھلاڑیوں پر مشتمل ہے اور تعمیر نو کے مراحل سے گزر رہی ہے۔

پاکستان کی جیت سے ٹیم ورک اور لیڈرشپ کے سبق ملتے ہیں۔ یہ وہ بنیادی رہنما اصول ہیں جنہیں نظر انداز کرکے پاکستان کی ماضی کی اس سے کہیں زیادہ باصلاحیت اور تجربہ کار ٹیمیں ناکامیوں سے دوچار رہیں۔ اس سیریز میں میں ہمارے ہر کھلاڑی نے اپنی انفرادی کارکردگی سے ٹیم کی مجموعی طاقت میں اضافہ کیا ہے۔ پاکستان کے فاسٹ بالر 100 میل فی گھنٹہ کی رفتار سے بال کراکر تاریخ میں اپنا نام ثبت کرانے نہیں نکلے تھے۔ بلکہ انہوں نے نپی تلی لائن اور لینتھ کے ذریعے سہواگ، ٹنڈولکر اور ڈریوڈ جیسے بیٹسمینوں کو قابو کیا۔ سب سے بڑی بات یہ کہ اس مرتبہ کھلاڑی بک میکرز کی تنخواہ پر نہیں کام کر رہے تھے بلکہ اپنے ملک کے لیے کھیل رہے تھے۔ ٹیم کی فائٹنگ سپرٹ کا منبع کپتان کی انسپریشن ہوتی ہے۔ انضمام نے کسی مرحلے پر بھی اپنی ٹیم کو انڈیا کی ٹیم سے کم تر نہیں سمجھا۔ انضمام کے پرسکون مزاج اور یونس خان کے سیماب صفت انداز نے ٹیم کو فائٹنگ یونٹ بنا دیا۔ میری دعا ہے کہ ٹیم کمیں یہ اتحاد باقی رہے۔

پاکستانی کرکٹ کی تاریخ سے معلوم ہوتا ہے کہ ٹیم کی کامیابیوں میں کپتان کا ہمیشہ کلیدی کردار رہا ہے۔ ٹیم کو ہمیشہ کپتان کے روپ میں ایک فادر فگر کی ضرورت رہی ہے۔ جب تک عمران خان پاکستانی ٹیم کے کپتان تھے، ٹیم متحد تھی اور یہی اس کی کامیابیوں کا راز تھا۔ جاوید میانداد اگرچہ تکنیکی اعتبار سے عمران خان کی نسبت بہتر کپتان تھے لیکن وہ ٹیم کو متحد نہ رکھ سکے۔ عمران خان کے ریٹائر ہونے کے بعد یکے بعد دیگرے کپتانوں کے خلاف بغاوت کا سلسلہ شروع ہو گیا۔ اس سلسلے میں پاکستان کرکٹ بورڈ بھی ہمیشہ بے بس نظر آیا۔ یوں دنیا کی ایک بہترین اور با صلاحیت ٹیم زوال کا شکار ہوتی چلی گئی۔ اب بالآخر انضمام الحق اور یونس خان کی صورت میں پاکستانی ٹیم کو اچھے لیڈر مہیا ہو گئے ہیں۔

ون ڈے میچوں کی اختتامی تقریبوں میں پاکستانی کھلاڑیوں کے بات کرنے کے انداز میں سادگی نے سب کے دل موہ لیے ہیں۔ میری دعا ہے کہ ان کھلاڑیوں کے انداز میں یہ منکسرالمزاجی باقی رہے۔ جب بھی کوئی کھلاڑی سٹار بننے لگتا ہے تو یہ ٹیم کے لیے خطرے کا نشان ہوتا ہے۔ اب یہ سلیکٹر حضرات، کپتان اور کوچ کی ذمہ داری ہے کہ وہ کھلاڑیوں پر ان کی ذاتی انا کو حاوی نہ ہونے دیں۔

آخر میں کچھ ذکر اپنے ذرائع ابلاغ کا بھی ہو جائے۔ روزنامہ جنگ میں ون ڈے سیریز جیتنے کی خبر کی سرخی یوں لگی ہوئی تھی دہلی میں فتح کے پرچم گاڑ دیے گئے۔ یہ وہی طرز تخاطب ہے جو گزشتہ سال انڈیا کے پاکستان میں سیریز جیتنے پر انڈیا کے جرائد نے اختیار کیا تھا اور جس پر پاکستانی کالم نویسوں کو دو قومی نظریہ خطرے میں نظر آنے لگا تھا۔ میں نے اپنی ایک گزشتہ پوسٹ میں لکھا تھا کہ وقت آنے پر پاکستانی صحافی بھی بڑھکیں لگانے میں کم نہیں ہوتے۔ میں تو یہی استدعا کر سکتا ہوں کہ خدا کے لیے کھیل کو کھیل رہنے دیں اور مہربانی کرکے دہلی میں پرچم گاڑنے کا خیال بھی دل سے نکال دیں۔

طوفانی اننگ

2005-04-15T10:43:00.000+02:00

کیا طوفانی اننگ ہے۔ شاہد آفریدی نے 20 گیندوں پر ففٹی بنائی ہے جس میں چھ چھکے اور پانچ چوکے شامل ہیں۔ میں نے cricinfo.com کے ویب پیج کے ذریعے میچ پر نظر رکھی ہوئی ہے اور میری حالت غیر ہو رہی ہے۔ جب سے جرمنی آیا ہوں پہلی مرتبہ ٹی وی پر لائیو کرکٹ میچ دیکھنا نصیب ہو رہا ہے۔ کسی سے پتا چلا تھا کہ سونی چینل پر میچ دکھائے جا رہے ہیں۔ میں نے ادھر ادھر سے منت سماجت کر کے فریکوئنسی کا پتا کیا اور چینل سیٹ کیا تو واقعی کرکٹ میچ آ رہا تھا۔ مسئلہ صرف اتنا ہے کہ مزدوری کا وقت ہے یعنی آفس میں ہوں۔ میرے لکھتے لکھتے شاہد آفریدی نے دو چھکے اور لگا دیے ہیں۔ یا اللہ میں کیا کروں۔ کام کروں تو کیسے کروں۔ ایسا کرتا ہوں کہ کچھ دیر میں کھانے کے وقفے کے بہانے فرار ہو جاؤں گا، میرا مطلب ہے اگر شاہد آفریدی ابھی تک کھیل رہا ہوا تو۔ ایک اور چھکا ، نو چھکے۔

اپ ڈیٹ؛ اب گھر جانے کی ضرورت نہیں رہی۔ شاہد آفریدی کی سنچری ہوگئی اور شاہد آفریدی آؤٹ ہو گیا۔ انتہائی نامعقول طریقہ تھا آؤٹ ہونے کا۔ شاہد نے محض دفاع کرنے کی کوشش کی تھی مگر بال لڑھکتی ہوئی وکٹوں سے جا ٹکرائی۔ اب میری دعا ہے کہ کسی طرح پاکستان کا مومینٹم برقرار رہے۔

اپ ڈیٹ؛ اور پاکستان نے بالآخر میچ جیت لیا ہے اور اسے سیریز میں سبقت حاصل ہو گئی ہے۔ اب کئی دنوں تک میڈیا کے حواس پر شاہدآفریدی سوار رہے گا۔ میچ کے دوران cricinfo.com پر شاہد آفریدی کی اننگ کو سونامی کے مترادف قرار دیا گیا۔ مجھے اتوار والے سیریز کے آخری میچ کا انتظار ہے۔

آئکون کی تلاش

2005-04-12T12:46:00.000+02:00

عزیز دوستو۔ السلام علیکم۔ ناراض نہ ہوں، میں کہیں غائب نہیں ہوا، آپ کی خدمت میں ہی مشغول ہوں۔ دراصل میں ایک اردو نوٹ پیڈ پر کام کر رہا ہوں جس میں اردو بالکل اردو ویب بیسڈ ایڈیٹر کی طرح ایڈٹ کی جا سکے گی۔ فرق یہ ہے کہ اس پروگرام کے ذریعے اردو ٹیکسٹ کی فائلیں save اور load بھی کی جا سکیں گی۔ میرے اندازے کے مطابق ابھی ایک ہفتے کا کام اور باقی ہے۔ اب یہ میری ملازمت کی اور گھر کی دوسری مصروفیات پر منحصر ہے کہ میں کتنی جلد یہ کام مکمل کرسکتا ہوں۔ آپ لوگ بھی اگر چاہیں تو میرا اس کام میں ہاتھ بٹا سکتے ہیں۔ مجھے اس پروگرام میں شامل کرنے کے لئے کچھ گرافکس کی ضرورت ہے جس کی تفصیل ذیل میں ہے۔
ایک 32x32 آئکون مین ایپلیکیشن کے لیے
ایک 32x32 آئکون ڈاکومنٹ ٹائپ کے لیے
ایک bitmap گرافک سپلیش سکرین کے لیے
ان گرافکس کا تھیم اردو سے متعلقہ ہونا چاہیے۔ اگر کوئی صاحب یا صاحبہ اس سلسلے میں میری مدد کر سکیں تو بہت ممنون ہوں گا ورنہ میں خود ہی کوئی آئکونز بنا کر شامل کر لوں گا۔

انٹرویو کے سوال

2005-04-04T00:37:00.000+02:00

آصف کے سوالوں کے جواب دے کر میرا بوجھ تو ہلکا ہو گیا ہے، اب دوسروں کی باری ہے۔ جہانزیب میاں تبصرہ کرکے پھنس گئے۔ ان کے لیے انٹرویو کے سوالات درج ذیل ہیں۔

پہلا معمول کا لیکن اہمیت کا حامل سوال آپ کے اپنے بارے میں ہے۔ آپ ہمیں اپنے تعلیمی اور پیشہ ورانہ پس منظر سے آگاہ کریں۔

آپ کی نظر میں مستقبل میں اردو بلاگنگ کا مستقبل کیا ہے اور یہ لوگوں کی رائے پر کس حد تک اثر انداز ہوگی؟

اگر آپ کو پاکستان کا وزیراعظم بنا دیا جائے تو آپ ملک کی بھلائی کے لیے سب سے پہلے کیا کام کریں گے؟

آپ کی نظر میں اسلامی دنیا کو عصر حاضر میں کن بڑے چیلنجز کا سامنا ہے؟

امریکہ کے حالیہ صدارتی انتخابات میں مذہبی عنصر نے اہم کردار ادا کیا۔ کیا امریکہ میں مذہبی انتہا پسندوں کے زور پکڑنے کا امکان ہے؟

انٹرویو

2005-04-02T08:06:00.000+02:00

سب سے پہلے تو میں آصف سے معذرت خواہ ہوں کہ اتنی تاخیر سے جواب لکھ رہا ہوں۔ بالاخر میرے جوابات حاضر ہیں۔ ملاحظہ فرمائیے اور اگر کوئی صاحبہ یا صاحب اپنے انٹرویو کے خواہش مند ہیں تو کمنٹس میں پیغام چھوڑ دیں۔

اپنے پس منظر اور اپنی تعلیم کے بارے میں ہمیں کچھ بتائیں۔

میرا نام نبیل حسن نقوی ہے اور میرا تعلق لاہور سے ہے۔ میں نے اپنی سکول، کالج اور الیکٹریکل انجینیرنگ کی تعلیم بھی لاہور سے ہی حاصل کی۔ اس دوران میرا سفر کا تجربہ بھی بہت محدود رہا ہے۔اس پر مستزاد یہ کہ مجھے ملازمت بھی لاہور میں مل گئی۔ میری زندگی میں بڑی تبدیلی اس وقت آئی جب 1996 میں مجھے ایک پاکستانی کمپنی میں ملازمت ملی جس نے مجھے جرمنی ایک سال کے لیے بھیجا۔ یوں یہ ماں باپ کا اکلوتا لاڈلا ایک دوسرے ملک چلا آیا۔ جرمنی آنے سے یقینا میری زندگی کے ایک نئے دور کی ابتدا ہوئی۔

1997 میں میں پاکستان واپس آیا۔ اسی دوران میری شادی بھی ہوئی۔ پاکستان واپسی کے بعد میں نے نہ صرف اپنی ملازمت تبدیل کی بلکہ اپنی فیلڈ بھی تبدیل کر لی۔ میں نے ایک سوفٹوئر ہاؤس Systems Pvt Ltd میں ملازمت شروع کردی۔ سوفٹوئر ڈیویلپمنٹ کا کام بھی مجھے بہت پسند آیا۔ میں نے سوچا کیوں نہ مزید تعلیم حاصل کرکے اپنی کوالیفیکیشن بہتر بنائی جائے۔ میں نے انٹرنیٹ کے ذریعے ماسٹرز پروگرامز کا جائزہ لینا شروع کیا تو کیا دیکھا کہ جس شہر میں میں پہلی مرتبہ جرمنی میں رہا تھا، وہاں کی ہی یونیورسٹی Computational Engineering میں ایک ماسٹرز پروگرام آفر کر رہی تھی۔ یہ ایک انٹرڈسپلینری فیلڈ ہے اور اس میں انجینیرنگ کے میدان میں کمپیوٹر سائنس کی ایپلیکیشن کے بارے میں پڑھا جاتا۔ یہ کورس گویا میرے خوابوں کی تعبیر تھا۔ میں نے فورا اس میں داخلے کی درخواست بھیجی۔ مجھے اس ماسٹرز میں داخلہ مل گیا اور خوش قسمتی سے ایک سکالرشپ کا بندوبست بھی ہوگیا۔ اس طرح میں 1998 میں دوبارہ جرمنی آیا، اس مرتبہ سٹوڈنٹ کی حیثیت سے۔ میں نے دو سال کے عرصے میں اپنی ماسٹرز مکمل کی اور اس کے بعد سال 2000 میں یہاں ہی ایک کمپنی میں بحیثیت سوفٹویر انجینیر کام کرنا شروع کر دیا اور یہ ملازمت ابھی تک جاری ہے۔

جہاں تک اس سوال کا تعلق ہے کہ میں انجینیرنگ سے سوفٹویر کی فیلڈ میں کیسے آیا تو اس کی تفصیل مختصرا یوں ہے کہ میں نے ایف ایس سی کے امتحان کے بعد وقت گزاری کے لیے بیسک پروگرامنگ لینگویج سیکھی۔ یہ کام مجھے دلچسپ لگا تو میں نے والد صاحب سے ضد کرکے ایک PC-XT خرید لیا۔نئی نسل نے تو شاید یہ دیکھا بھی نہ ہو۔ اس کے بعد میں نے خود سے کتابوں کے ذریعے دوسری پروگرمنگ لینگویجز اور کمپیوٹر سائنس کا علم حاصل کیا۔ Computaional Engineering کی ماسٹرز سے بلاشبہ میں نے بہت سیکھا ہے۔

کیا آپ پاکستان کو صحیح معنوں میں ایک آزاد و خود مختار ملک سمجھتے ہیں؟ اگر ہاں تو کس بناء پر، اگر نہیں تو کیوں نہیں؟

پاکستان کی تاریخ کے ابتدائی دور کو چھوڑ کر باقی تمام تر عرصہ میں پاکستان کی معاشی پالیسیاں ورلڈ بینک اور آئی ایم ایف کے کنٹرول میں رہی ہیں۔ یہ کافی مشہور بات ہے کہ موجودہ دور میں ملک فتح نہیں کیے جاتے، ان کی معیشت پر قابض ہوا جاتا ہے۔ اس کے بعد ملٹی نیشنل کمپنیاں حکومتوں کو کنٹرول کرتی ہیں۔ پاکستان کی صورتحال تو اس سے بھی کئی ہاتھ آگے ہے، یہاں پر عالمی مالیاتی اداروں کے عہدیدار براہ راست حکومتی عہدوں پر فائز کردیے جاتے ہیں۔ سابقہ نگراں وزیراعظم معین قریشی پاکستان پر عالمی طاقتوں کی گرفت کی بدترین مثال ہیں۔ ابتدا میں پاکستان کی معاشی ترقی کی رفتار اچھی تھی۔ یہ بھی سننے میں آیا ہے کہ جنوبی کوریا نے اپنی معاشی ترقی کا آغاز کرتے ہوئے پاکستان کے پہلے پانچ سالہ ترقیاتی منصوبے سے بھی استفادہ کیا تھا۔ اس کے بعد کی تایخ میں شعیب قریشی، غلام اسحاق خان، محبوب الحق اور اب شوکت عزیز جیسے افراد کی آمد ہوئی جو اس بات کو یقینی بناتے ہیں کہ ہمارا ملک کبھی سیاسی اور معاشی استحکام نہ حاصل کر سکے۔وطن عزیز کی تاریخ آمریت، جاگیرداری نظام اور ملائیت یا سرخ انقلاب کے داعیوں کا ایک شیطانی چکر ہے جہ کہ اب تک جاری ہے۔ اس صورتحال میں پاکستان کو صحیح معنوں میں آزاد اور خودمختار نہیں قرار دیا جا سکتا۔

پاکستان کی اصلاح میں سب سے زیادہ کیا چیز ممد و معاون ثابت ہو گی؟ (اگر آپ سمجھتے ہیں کہ پاکستان کو کسی اصلاح کی ضرورت نہیں تو اپنے موقف کے حق میں دلائل پییش کیجئے)

اس سوال کا جواب دینے سے پہلے میں ذرا نگاہ تصور سے دیکھتا ہوں کہ آخر ایک اصلاح شدہ پاکستان کیسا نظر آئے گا۔ میرے خوابوں کا پاکستان جہالت سے پاک ہوگا، یہ معاشی طور پر مستحکم ہوگا اور اس میں عوام کی حکومت عوام کے نمائندے کریں گے نہ کہ سی آئی اے ایجنٹ۔ میرے خوابوں کی تعبیر ملک میں لوگ مذہبی اور فرقہ وارانہ ہم آہنگی کا مظاہرہ کریں گے اور قانون کا احترام کریں گے۔

ایک مثالی پاکستان کی خوبیاں بیان کرنے کے بعد ان عوامل پر غور کیا جا سکتا ہے جو اس خواب کو حقیقت بنانے میں کارآمد ثابت ہوسکتے ہیں۔ میری دانست میں کسی بھی معاشرے کی ترقی کی بنیاد تعلیم اور جمہوریت ہیں۔ جمہوریت بھی تعلیم کے بغیر بےکار ہے۔ لہذا میں اس نتیجے پر پہنچوں گا کہ ہمیں سب سے پہلے تعلیم کو عام کرنا ہوگا۔

ہمارے سامنے زمانہ حاضر کی وہ مثالیں بھی ہیں جن میں کچھ ترقی پذیر ملک خوشحالی کی راہ پر گامزن ہوئے۔ ایسی ایک مثال ملائشیا کی بھی ہے۔ ملائشیا کی ترقی کا کریڈٹ مہاتیر محمد کو دیا جاتا ہے۔ پاکستان بھی کسی ایسے ہی مسیحا کے انتظار میں آس لگائے ہوئے ہے۔ حالیہ دور میں ترقی کرنے والے ممالک کی تاریخ کا جائزہ لیا جائے تو یہ بات واضح طور پر مشاہدے میں آتی ہے کہ ان ممالک کی ترقی میں مذہب کا کوئی کردار نہیں تھا۔ اس سے مراد یہ نہیں ہے کہ مذہب کی نفی کی گئی تھی بلکہ یہ کہ مذہب کو سیاسی معاملات سے الگ تھلگ رکھا گیا تھا۔ یہ آگہی بھی تعلیم کا نتیجہ ہوتی ہے۔ حالی دور میں مذہبی حکومتوں کی مثالیں افغانستان اور ایران کی حکومتیں ہیں۔ اگر چاہیں تو پاکستان میں دو صوبوں میں قائم مذہبی جماعتوں کی حکومتوں کی کارکردگی کا جائزہ لے سکتے ہیں۔ دوسری جانب میری نظر میں مکمل سیکولرازم بھی تباہی کا رستہ ہے۔

کیا آپ کے خیال میں اسلام کے حالیہ فہم کو کسی بنیادی اصلاح و درستگی کی ضرورت ہے؟ اگر ہے تو سب سے اشد کس چیز میں؟

اللہ تعالی نے اسلام کو ہمارے لیے بطور دین پسند کیا ہے اور یہ ایک مکمل دین ہے۔ (الیوم اکلمت لکم دینکم واتممت علیکم نعمتی ورضیت لکم الاسلام دینا)۔ ہمارے لیے قران اور سنت قیامت کے دن تک ہدایت کا سرچشمہ رہیں گے۔ دین کا فہم بھی باقی مضامین کے فہم کی طرح ہے، اس کے لیے ضروری ہے کہ اس کے منبع ہدایت یعنی قران اور سنت سے رجوع کیا جائے۔ بد قسمتی سے یہ اصول جتنا سادہ ہے لوگ اتنا ہی اسے نظر انداز کرتے ہیں۔ مسلمانوں کی تاریخ اس بات کی شاہد ہے کہ وقت گزرنے کے ساتھ ساتھ اسلام کے بنیادی اصولوں کو فراموش کرتے جاتے ہیں اور محض اسی کو دین سمجھتے ہیں جو انہیں ورثے میں ملتا ہے۔ اسے تقلید کہتے ہیں۔ اس کے نتیجے میں وقت گزرنے کے ساتھ ساتھ مذہب پر ثقافتی رنگ چھا جاتا ہے غیرمذہبی رسومات کو مذہبی اہمیت مل جاتی ہے۔ اس پر مستزاد یہ کہ نام نہاد علما ان غیر اسلامی رویوں کی مذہبی وضاحت پیش کرنے کی کوشش کرتے ہیں۔ آپ کو اکثر مولوی مل جائیں گے جو قرانی آیات سے عورتوں کو زدوکوب کرنے کی وضاحت کرتے ہیں۔ جو جید علما دین کی جدید طرز سے وضاحت کرتے ہیں انہیں ان مولویوں کی شدید مخالفت کا سامنا کرنا پڑتا ہے۔ اس کی ایک مثال دور حاضر کے عظیم اسلامی سکالر پروفیسر حمید اللہ کی ہے۔ جسٹس جاوید اقبال نے جب انہیں پاکستان آنے کی دعوت دی تو پروفیسر صاحب نے غصے سے کہا کہ وہ جب ایک مرتبہ پاکستان گئے تھے تو وہاں کے مولوی ان کے پیچھے پڑ گئے تھے اور طرح طرح کی الزام تراشیاں شروع کردیں تھیں۔ مفکر اسلام علامہ اقبال کو مولوی برملا کافر قرار دیتے تھے۔

اسلام آج سے ڈیڑھ ہزار سال پہلے کا ہی مذہب نہیں، یہ آج کا بھی عالمگیر مذہب ہے۔ ہم لوگوں کو آج کے تقاضوں کے مطابق قران و سنت سے رہنمائی چاہیے۔ میں یہاں یہ کہنے کی جرات کروں گا کہ مختلف مسالک کے ائمہ نے اگرچہ اسلام کی عظیم خدمت سرانجام دی ہے لیکن ان کی بات حرف آخر نہیں ہے۔ ضرورت اس بات کی ہے ہم آج کے دور کے جدید تقاضوں کو مد نظر رکھتے ہوئے اسلام سے رہنمائی حاصل کریں۔ اگرچہ ہر دور میں احیائے دین کی کوششیں ہوتی رہی ہیں، وقت گزرنے کے ساتھ ساتھ ان کوششوں کے اثرات بھی ماند پڑتے جاتے ہیں۔

قران اور حدیث کے محض الفاظ پڑھنا کسی طور سے دین کے فہم کے لیے فائدہ مند نہیں ہے اس کے ان کی کوئی اچھی تشریح پڑھنا ضروری ہے۔ ہو سکتا ہے کہ لوگ مولانا مودودی سے سیاسی یا نظریاتی اختلاف رکھیں لیکن ان کی ”تفہیم قران” دین کی ایک عظیم خدمت ہے اور اس سے کم از کم قران کے بنیادی مفہوم کا علم حاصل ہوتا ہے۔ علامہ اقبال کے کلام میں بھی مومن کا غیر روایتی تصور موجود ہے۔ میری نظر میں اقبال کے کلام کا مطالعہ جدید دور کے مطابق اسلام کی سمجھ بوجھ کے لیے اشد ضروری ہے۔

دین کی جدید تقاضوں کے مطابق تشریح میں احتیاط برتنا بھی ضروری ہے۔ اجتہاد کے دروازے کھلے رکھنے سے مراد زمانے کی علتوں سے کمپرومائز کرنا نہیں ہے۔

میرا مشاہدہ ہے کہ آج کے زمانے مین اسلام کی سچی سپرٹ ان مسلمانوں میں ملتی ہے جنہوں نے اپنے مطالعے کے بعد خود سے سمجھ کر اسلام قبول کیا۔ اس کی مثالیں ابوبکر سراج الدین (Martin Lings) ، مریم جمیلہ اور Gai Eaton ہیں۔ یہ سب دنیا کے بڑے اسلامی سکالرز میں شمار ہوتے ہیں اور ان لوگوں کی دین کی سمجھ ہم لوگوں سے جو کہ محض مسلمان گھرانوں میں پیدا ہونے کے باعث مسلمان ہیں، کہیں آگے ہوتی ہے۔

جرمنی میں قیام آپ کو کیسا لگا۔ کچھ تاثرات جن سے آپ ہمیں مستفید کرنا چاہیں؟

جرمنی میں قیام اور یہاں حصول تعلیم بلاشبہ میری زندگی کا حاصل ہے۔یہاں مجھے ایک نئی زبان سیکھنے کا موقعہ ملا اور میری ایک نئے کلچر سے واقفیت ہوئی۔ ذاتی طور پر بھی مجھے دنیا کی بہتر آگہی ہوئی۔ میں سمجھتا ہوں کہ یہاں لوگوں سے گفتگو کرکے مذہب کے بارے میں میرا سوچنے کا انداز بہتر ہوا ہے۔ مجھے یہ معلوم ہوا ہے کہ اپنے مذہب کو سمجھنے کے لیے دوسرے مذاہب کا تقابلی جائزہ بھی ضروری ہے۔

مغرب کے ترقی یافتہ ممالک میں رہنے والے محب الوطن پاکستانیوں کی طرح یہاں کی ترقی دیکھ کر میرے دل میں بھی خواہش جاگتی ہے کہ کاش میرے ملک کو بھی ایسی ترقی نصیب ہو۔ میرا دل چاہتا ہے کہ پاکستان کی یونیورسٹیاں بھی یہاں کی طرح علم کا گہوارہ بنیں، پاکستان کی صنعت و زراعت اسی طرح ترقی کرے۔ پاکستان آبادی اور رقبے کے لحاظ سے جرمنی سے دگنا ہے۔ پاکستان قدرتی وسائل سے مالامال ہے اور دنیا کے غریب ممالک میں شمار ہوتا ہے۔ جرمنی میں قطعی طور پر کوئی خام مال نہیں پایا جاتا اور یہ دنیا کا سب سے بڑا ایکسپورٹر ہے۔

مجھے جرمنی کی ترقی کے ساتھ ساتھ یہاں کے معاشرے کا تاریک پہلو بھی نظر آتا ہے۔ میرا اندازہ یہ ہے کہ پاکستان کا معاشرہ ٹوٹ پھوٹ کے اس ابتدائی دور میں ہے جس کی انتہا کو یورپ پہنچ گیا ہے۔اوپر سے مغرب کی اندھی تقلید کو ہم نے ترقی کے مترادف سمجھ لیا ہے۔ مغربی ممالک کی ترقی کا راز علم کی ترویج اور جمہوریت ہے جس کو اپنانا ہمارے لیے زیادہ مشکل نہیں ہونا چاہیے۔ اس کے ساتھ ساتھ کوئی ایسا رستہ بھی نکالنا ہوگا کہ مادی ترقی کے ساتھ ساتھ ہم روحانی پستی کے راستے پر نہ چل پڑیں۔

میرے جو دوست جرمنی میں ملازمت یا حصول تعلیم کے سلسلے میں رہ رہے ہیں، ان سے گزارش ہے کہ کم از کم یہاں کی زبان ضرور سیکھیں۔ یہ یہاں کے لوگوں کے ساتھ رابطے اور یہاں کے کلچر کو سمجھنے کے لیے اشد ضروری ہے۔ جو دوست یہاں تعلیم حاصل کر رہے ہیں انہیں چاہیے کہ وہ پاکستان میں اپنے جاننے والوں کو بھی مزید حصول تعلیم کے لیے اکسائیں اور یہاں آنے کے لیے رضاکارانہ طور پر رہنمائی فراہم کریں۔

پاکستان زندہ باد

2005-03-28T14:56:00.000+02:00

آج ایک فلک شگاف نعرے سے میرے اپارٹمنٹ کے درودیوار لرز اٹھے۔میرے ہمسائے اپنے آرام میں خلل کی وجہ سے یقینا میرے خلاف شکایت رجسٹر کرائیں گے۔ میں دھڑکتے دل کے ساتھ cricinfo.com کا پیج لوڈ ہونے کا انتظار کر رہا تھا۔ آخر وہ خبر سامنے آ ہی گئی جس سے گویا سوکھے دھانوں پر پانی پڑ گیا۔ پاکستان نے انڈیا کے خلاف بنگلور میں تین ٹیسٹ کی سیریز کا آخری میچ جیت لیا۔ میچ کے آخری دن انڈیا کو 353 رنز بنانے تھے اور اس کی ساری وکٹیں باقی تھیں لیکن پاکستان نے آخر میں یہ میچ 168 رنز سے جیت لیا۔ میرے لیے جیت کی خبر کافی ہے اور باقی تفصیلات غیر متعلقہ ہوگئی ہیں۔ اس فتح سے 1987 کے بنگلور ٹیسٹ کی یادیں تازہ ہوگئی ہیں جب عمران خان کی قیادت میں پاکستان نے پانچ ٹیسٹ کی سیریز کا آخری میچ جیتا تھا۔ میں نے بلاشبہ اپنی زندگی میں اتنا سنسنی خیز میچ نہیں دیکھا۔ اس میچ میں پاکستانی ٹیم کا مقابلہ محض انڈیا کی ٹیم سے ہی نہیں، انڈین امپائرز سے بھی تھا۔ میچ کا فیصلہ کھیل کے چوتھے روز ہوا۔ یہ فتح اس لحاظ سے بھی اہم تھی کہ اس کی بدولت پاکستان یہ سیریز جیت گیا۔ میچ کی سنسی خیزی کا اندازہ اس بات سے لگایا جا سکتا ہے کہ اس روز پاکستان اور اور انڈیا میں کئی کرکٹ کے شائقین کو دل کا دورہ پڑنے کی خبریں آئیں۔ اس میچ کی یادیں انشاءاللہ پھر کبھی پوسٹ کروں گا۔

یہاں جرمنی میں کرکٹ میچ ٹی وی پر مفت نہیں دیکھا جا سکتا، اس کے لیے subscription خریدنی پڑتی ہے۔ لہذا میں محض انٹرنیٹ پر کرکٹ کی خبروں پر گزارا کرتا ہوں۔ یہ پاکستان میں رہنے والے خوش نصیب ہی ہیں جو پورے پانچ دن فل ٹائم کرکٹ میچ دیکھتے ہیں۔ بعد میں ضروری نہیں کہ میچ کا کوئی نتیجہ بھی برآمد ہو۔ میں نے سنا ہے کہ کسی زمانے میں جرمنی میں بھی کرکٹ کھیلی جاتی تھی۔ ایک مرتبہ ہٹلر نے بھی کوئی میچ دیکھا جو پانچ دن تک جاری رہا اور ڈرا پر منتج ہوا۔ وقت کے اس زیاں پر آگ بگولہ ہو کر ہٹلر نے اپنی کرکٹ ٹیم کو فائرنگ سکواڈ کے حوالے کر دیا۔ اس کے بعد جرمنی میں کرکٹ نہیں کھیلی گئ۔

لو از ان دی ائر

2005-03-23T11:54:00.000+01:00

جرمنی کا موسم خوشگوار ہوتا جا رہا ہے۔ طویل اور روشن ہوتے ہوئے دن، کھلتے ہوئے پھول اور پرندوں کے نغمے موسم بہار کی آمد کی نوید دے رہے ہیں۔ جرمن لوگ بہت بے صبری سے موسم بہار کی آمد کا انتظار کرتے ہیں۔ موسم بہار تو ماہ اپریل کے لگ بھگ آتا ہے جبکہ اس کی آمد کی خوشی میں گیت کرسمس سے ہی گائے جانے لگتے ہیں۔ بلاگنگ کا سین بھی موسم کی اس تبدیلی سے متاثر دکھائی دے رہا ہے۔ آصف کے بلاگ کے پس منظر پر سنوڈراپ نمودار ہوگئے ہیں جبکہ کنول نے اپنے بلاگ پر گل بنفشہ (ڈیفوڈلز) کی شان میں ولیم ورڈزورتھ کا قصیدہ پوسٹ کیا ہے۔

جرمنی میں ایک بات جو کافی مشہور ہے وہ یہ ہے کہ خوشگوار موسم کے ملک کی معیشت پر بھی خوشگوار اثرات مرتب ہوتے ہیں۔ جب موسم اچھا ہوتا ہے تو ٹورزم انڈسٹری کے بھی دن پھر جاتے ہیں۔ تمام ہالیڈے ریزورٹس اور بیچز کھچا کھچ بھر جاتی ہیں۔ شہروں میں بیر گارڈنز اور پبز میں رونق آ جاتی ہے۔ پھر جب جام سے جام ٹکرائے گا تو پیسہ بڑا آئے گا۔

جس طرح موسم بہار لوگوں کے لیے باعث مسرت ہوتا ہے وہاں کئی لوگ اس کی وجہ سے بیمار بھی پڑ جاتے ہیں۔ موسم بہار کراس پالینیشن کا سیزن ہے اور آدھی سے زیادہ جرمن آبادی پالنز سے شدید الرجک ہے۔ ایسے لوگ محض کسی درخت کے پاس سے بھی گزر جائیں تو ان پر نزلے اور زکام کا حملہ ہو جاتا ہے۔

موسم بہار میں فضا میں محض پھولوں کی خوشبو ہی نہیں چھائی ہوتی۔ جرمنی میں اور ایک کہاوت مشہور ہے کہ موسم بہار میں ہوا میں فلرٹ کی خوشبو شامل ہو جاتی ہے۔ یعنی خوشگوار موسم کے باعث لوگوں میں رومانویت کا عنصر بڑھ جاتا ہے۔ ڈسکوز اور پبز کی رونق بڑھنے کی ایک وجہ ماحول میں رومینس کا چھانا بھی ہے۔ نتیجتا محبتوں کی پینگیں بڑھانے، محبتوں میں کامیابی اور دل ٹوٹنے کی داستانوں میں بھی اضافہ ہو جاتا ہے۔

گڈ ول ہنٹنگ

2005-03-16T18:09:00.000+01:00

گڈ ول ہنٹنگ میری پسندیدہ فلم ہے۔ اگرچہ یہ فلم ٹی وی پر کئی مرتبہ لگ چکی ہے اور یہ ایک نسبتا طویل فلم ہے ، لیکن مجھے ہر مرتبہ اسے دیکھنے میں لطف آیا ہے۔ اس فلم کی کہانی ایک حیرت انگیز ذہنی صلاحیتوں کے مالک نوجوان لڑکے اور اس کے نفسیاتی معالج کے گرد گھومتی ہے۔ اس فلم کا مرکزی کردار میٹ ڈیمن اور اس کے بھائی کا کردار بین افلیک نے ادا کیا جبکہ نفسیاتی معالج کے رول میں رابن ولیمز جلوہ گر ہوئے۔
گڈ ول ہنٹنگ کے طویل اور نسبتا پیچیدہ پلاٹ ہونے کے باعث مجھے ایک مرتبہ میں پوری فلم مکمل طور پر سمجھ نہیں آتی۔ یہی وھہ ہے کہ میں اسے بار بار دیکھ کر لطف اندوز ہوتا ہوں۔ چند روز یہ فلم دوبارہ ٹی وی پر لگی۔ اتفاقا میری ٹائٹلز پر نظر پڑی تو مجھے اپنی آنکھوں پر یقین نہیں آیا۔ ٹائٹلز کے مطابق اس فلم کا سکرپٹ میٹ ڈیمن اور بین افلیک نے لکھا ہے۔ میں نے فورا غیر یقینی کے عالم میں گوگل پر سرچ کی۔ کہاں میٹ ڈیمن اور بین افلیک جیسے کھلنڈررے لڑکے اور کہاں گڈ ول ہنٹنگ کا خوبصورت سکرپٹ۔ لیکن گوگل کی سرچ نے بھی اس بات کی تصدیق کر دی۔ نہ صرف یہ کہ اس فلم کا سکرپٹ ان دونوں نے لکھا تھا بلکی انہیں اس کی وجہ سے بہترین سکرپٹ کا آسکر ایوارڈ بھی دیا گیا جبکہ رابن ولیمز کو بہترین معاون اداکار کا آسکر ایوارڈ دیا گیا۔
غیر معمولی ذہانت کی کہانیاں ہمشہ مجھے فیسی نیٹ کرتی ہیں اورمیں ہمیشہ شوق سے جینیس شخصیات کے حالات زندگی پڑھتا ہوں۔ گڈ ول ہنٹنگ ایک جینیس لڑکے ول ہنٹنگ کی کہانی ہے جو ایم آئی ٹی کے شعبہ ریاضی میں صفائی کا کام کرتا ہے اور چوری چھپے طلبہ کو دی گئی میتھیمیٹکس کی انتہائی پیچیدہ اسائنمنٹس حل کرتا رہتا ہے۔ جب ایک پروفیسر بالاخر ول ہنٹنگ کی اس صلاحیت کا سراغ لگا لیتا ہے تو وہ اسے ایک ماہر نفسیات کے پاس لیجاتا ہے تاکہ وہ اس کی ذہنی مشکلات کو سلجھا کر اسے تحقیقی کام کرنے پر آمادہ کرے۔ یہاں سے فلم کا سب سے دلچسپ حصہ شروع ہوتا ہے جو کہ ول ہنٹنگ اور اس کے ذہنی معالج کے درمیان تعمیر ہونے والے رشتے کے بارے میں ہے۔ رابن ولیمز جو کہ زیادہ تر جمن جی اور پیٹر پین جیسی فلموں میں کردار ادا کرتے رہے ہیں، اس فلم میں بالکل مختلف رول میں نمودار ہوئے ہیں اور انہوں نے بہت خوبصورتی سے اپنے رول کو نبھایا ہے۔ میٹ ڈیمن نے اس فلم میں یادگار پرفارمنس پیش کی ہے۔

ہائی جیکنگ کی تعلیم

2005-03-14T00:21:00.000+01:00

11 ستمبر 2001 کو ورلڈ ٹریڈ سنٹر کی تباہی نے جہاں ساری دنیا کو ہلا دیا وہاں جرمنی میں خاص طور پر سنسنی پھیل گئی تھی۔ دہشت گردی کے اس واقعے کے 24 گھنٹے کے اندر یہ بات منظر عام پر آ چکی تھی کہ اس میں ملوث تمام ہائی جیکرز جرمنی کی یونیورسٹیوں سے فارغ التحصیل تھے یا ابھی زیر تعلیم تھے۔ ورلڈ ٹریڈ سنٹر اور پنٹاگون پر حملوں کا منصوبہ ہیمبرگ میں تیار کیا گیا۔ اکثر ہائی جیکرز کا تعلق ہیمبرگ یونیورسٹی سے تھا۔

دہشت گردی کے اس واقعے سے یہ بات ایک مرتبہ پھر ثابت ہوئی کہ حقیقت فکشن سے کہیں زیادہ سنسنی خیز ہوتی ہے۔ ورلڈ ٹریڈ سنٹر کی تباہی کے بعد ساری دنیا کا پرنٹ اور سکرین میڈیا سناٹے میں آگیا۔ اس واقعے میں ہونے والی تباہی یقینا اب تک لکھے گئے ناولوں اور فلموں کے سکرپٹس پر حاوی تھی۔ اب میڈیا کی کوشش تھی کہ کسی طرح اس واقعہ کے پس منظر میں زیادہ سے زیادہ سنسی پھیلائی جائے۔ تمام ٹی وی چینلز، جرائد اور نیوز ویب سائٹس پر سنسنی خیز انکشافات اور رپورٹس کا راج تھا۔ لیکن ان میں سے صرف کچھ فیصد ہی حقیقت پر مبنی تھا، باقی سب کچھ لوگوں کے دلوں پر بیٹھ جانے والے خوف سے فائدہ اٹھانے کی کوشش تھی۔ اس طرح کی کہانیاں گھڑی جا رہی تھیں کہ دہشت گرد sleepers ہیں جو عام انسانوں کی طرح زندگی بسر کرتے ہیں اور جیسے ہی ایک دن ان کو ایک ٹیلیفون کال موصول ہوتی ہے، یہ خاموشی سے اپنے خودکش مشن پر روانہ ہو جاتے ہیں۔ غرضیکہ تمام کہانیاں جو کہ مغربی میڈیا نے سرد جنگ کے زمانے میں کمیونسٹ روس کے متعلق گھڑی تھیں وہ 11 ستمبر کے ہائی جیکرز پر فٹ کر دی گئیں۔

اس ہسٹریا میںً کسی بزرجمہر کو خیال آیا کہ تمام ہائی جیکرز میں ایک قدر مشترک ہے کہ یہ سب یونیورسٹیوں سے فارغ التحصیل ہیں، ہو سکتا ہے کہ ان کی تعلیم کا ان کے دہشت گردی کے مشن سے کوئی تعلق ہو۔ ہائی جیکروں کا سرغنہ محمد عطا نے الیکٹریکل انجینیرنگ کی تعلیم حاصل کی تھی۔ رپورٹر حضرات نے یونیورسٹیوں کی ویب سائٹس پر الیکٹریکل انجینیرنگ کا سلیبس چیک کیا تو معلوم ہوا کہ الیکٹریکل انجینیرنگ میں ایک سبجیکٹ کنٹرول انجینیرنگ کا بھی ہوتا ہے۔ اگر یہ رپورٹر حضرات مزید جانچ پڑتال کی زحمت گوارا کرتے تو انہیں کنٹرول انجینیرنگ میں پڑھائے جانے والے موضوعات کی تفصیل بھی مل جاتی۔ لیکن یہ رپورٹرز اس کے بغیر ہی اس نتیجے پر پہنچ گئے کہ یقینا اس سبجیکٹ کے مواد کا ہائی جیکرز کے ہوائی جہاز اڑانے سے کوئی تعلق ہے۔ اس کے بعد یکایک میڈیا میں رپورٹس آنے لگیں کہ جرمنی میں بیرون ملک طلبہ ایسے مضامین پڑھ رہے ہیں جو دہشت گردی کے عزائم میں معاون ثابت ہو سکتے ہیں۔ ثبوت کے طور پر ٹی وی پر الیکٹریکل انجینیرنگ کے سلیبس میں کنٹرول انجینیرنگ کا سبجیکٹ دکھایا جاتا۔ میں اس ساری کاروائی کو شدید حیرت اور اضطراب کے عالم میں دیکھ رہا تھا۔ میں نے بھی الیکٹریکل انجینیرنگ پڑھی ہوئی ہے اور کنٹرول انجینیرنگ بھی میرے سبجیکٹس میں شامل تھی۔ کنٹرول انجینیرنگ میں ہوائی جہاز اڑانا نہیں سکھایا جاتا۔کنٹرول انجینیرنگ انتہائی پیچیدہ Linear Algebra اور Systems Theory پر مشتمل مضمون ہے۔ خدا گواہ ہے کہ یہ سبجیکٹ پڑھنے کے دوران ہوائی جہاز کے کاک پٹ تو کیا، ہمیں اس کے ٹوائلٹ میں بیٹھنا بھی نصیب نہیں ہوا۔ مجھے سب سے زیادہ اس بات کی حیرانی تھی کہ جرمنی جیسے ترقی یافتہ ملک میں اتنے تواتر سے اتنی بے سروپا خبر کیسے گردش کرتی رہی۔ اگر میں اس زمانے میں بلاگ لکھ رہا ہوتا تو یقینا اس کی دھجیاں اڑا دیتا۔ میرا خیال ہے کہ کسی نے اس معاملے کے احمقانہ پن کا احساس کرلیا کیونکہ یہ خبر کچھ دوں بعد تمام میڈیا سے یکسر غائب ہوگئی

میری غیر حاضری

2005-03-11T12:08:00.000+01:00

مجھے یہ گمان بھی نہیں تھا کہ لوگ میرے بلاگ پر نئی تحاریر کا انتظار کریں گے۔ برادران شعیب اور قدیر سے گزارش ہے کہ الحمدللہ اب مجھے زکام سے افاقہ ہے۔ آج صبح ڈینٹسٹ کے پاس ایک دانت میں فلنگ کے چکر میں جانا پڑا۔ ظالم نے اس غضب کا سن کرنے والا ٹیکا لگایا کہ دانت کے ساتھ ساتھ آدھا چہرہ سن ہو گیا ہے۔ بولتا ہوں تو لگتا ہے کہ پی ہوئی ہے۔ ڈاکٹر نے اس زور سے منہ کھلوایا کہ کہ بعد میں بند ہی نہیں ہو رہا تھا۔

دراصل گزشتہ دنوں قدیر میاں کی فرمائش یعنی ویب بیسڈ اردو ایڈیٹر پر کام میں اتنا مصروف رہا کہ اپنے بلاگ پر پوسٹ کرنے کا وقت ہی نہیں ملا۔ اب ویک اینڈ آ رہا ہے تو میں انشاءللہ ایک یا دو شذرات پوسٹ کروں گا۔

میں نے ایک مرتبہ اپنے والد صاحب سے عرض کیا کہ میں کسی اخبار میں مکتوب جرمنی کے زیر عنوان کالم لکھنا چاہتا ہوں۔ والد صاحب نے فرمایا کہ بہت اچھا خیال ہے، میں تمہاری کسی اخبار میں بات بھی کرا دیتا ہوں۔ لیکن شرط یہ ہے کہ تمہیں باقاعدگی سے لکھنا ہوگا۔ باقاعدگی کا سنتے ہی میرا لکھنے کا شوق جھاگ کی طرح بیٹھ گیا۔ میں اپنی موجودہ مصروفیات میں فری لانس لکھنے کو باقاعدگی سے وقت نہیں دے سکتا۔ بلاگ لکھنے کا یہی فائدہ ہے کہ اس میں آزادی سے جب چاہے لکھا جا سکتا ہے۔

اسلامی جمہوریہ پاکستان

2005-03-05T00:28:00.000+01:00

میرے اکثر دوست اس وقت مجھ سے ناراض ہو جاتے ہیں جب میں پاکستانی معاشرے کو اسلامی معاشرہ ماننے سے انکار کر دیتا ہوں۔ دوستوں کے استفسار پر میں عرض کرتا ہوں کہ میری دانست میں اسلامی معاشرے کی بنیاد انصاف اور مساوات پر ہوتی ہے۔ کوئی معاشرہ اسلامی معاشرہ کہلانے کا اسی وقت اہل ہو سکتا ہے جب اس میں دولت کا ارتکاز نہ ہو یعنی غریب غریب تر اور امیر امیر تر نہ ہوتا جائے۔ محض لوگوں کے عبادات کی پابندی کرنے پر معاشرے کو اسلامی معاشرہ نہیں قرار دیا جا سکتا۔ ایسے معاشرے کو، جہاں کسی کی عزت و آبرو محفوظ نہ ہو اور جہاں آئے روز بھوک اور بے روزگاری کے مارے لوگ خودکشی پر آمادہ ہوں، اسلامی معاشرہ قرار دینا قرین انصاف نہیں ہے۔

گزشتہ سال کے ایک واقعے نے پاکستان میں قانون اور انصاف کی صورتحال کو واضح طور پر پوری دنیا کے سامنے ایکسپوز کر دیا۔ یہ واقعہ پنجاب میں ایک پنچایت کا فیصلہ تھا جس کی رو سے مختاراں مائی کو پانچ مردوں نے گینگ ریپ کیا۔ ایک خبر کے مطابق اس واقعہ میں ملوث ایک شخص کے سوا تمام افراد کو رہا کر دیا گیا ہے۔ ابھی تک واضح نہیں ہے کہ اس واحد شخص کی بریت میں کیا مشکل حائل ہے۔ اس وقت تک ان افراد کی ان کے گاؤں میں واپسی ہو چکی ہو گی اور ان کے سرپرست ان کو شاباش دیتے ہوئے کہہ رہے ہوں گے کہ ”تو نے مردوں والا کام کیا ہے”۔

میں یہ بھی نہیں جانتا تھا کہ پاکستان کے عام لوگ اس واقعہ کے بارے میں کیا سوچتے ہیں۔ بی بی سی اردو کے ایک فورم سے اس پورے معاملے پر عام لوگوں کا ذہنی کرب ظاہر ہوتا ہے۔ ہو سکتا ہے کہ عدالتوں نے یہ فیصلہ اپنے دائرہ کار کے مطابق دیا ہو، جس میں وہ حق بجانب بھی ہیں۔ اس کے باوجود سوال باقی رہتا ہے کہ کیا یہ دائرہ کار تمام لوگوں کے لیے یکساں ہے۔ پاکستانی میڈیا نے دبے الفاظ میں عدلیہ کو بھی کرپٹ قرار دینا شروع کر دیا ہے۔ ریٹائرڈ جسٹس جاوید اقبال اپنی خود نوشت سوانح حیات ”اپنا گریباں چاک” میں جج صاحبان کی کرپشن کا کچھ احوال بیان کرتے ہیں۔ جسٹس جاوید اقبال کے مطابق کچھ جج حضرات مرضی کافیصلہ سنانے کے لیے اپنے بیرون ملک اکاؤنٹس میں ڈالرز میں پے منٹ لیتے ہیں۔

کیا پاکستان میں جہادی تنظیموں کو محض دوسرے فرقوں کی عبادت گاہوں کو خودکش دھماکوں کے ذریعے اڑانا آتا ہے؟ کیا مظلوموں کی مدد کرنا جہاد کے ضمن میں نہیں آتا؟ کیا پاسپورٹ میں مذہب کے خانے کے معاملے پر ملک کے طول و عرض میں مظاہرے کرنے والی سیاسی اور مذہبی جماعتوں کو معاشرے میں سراسر ناانصافی نظر نہیں آتی؟

موزی مرض

2005-03-04T21:08:00.001+01:00

میں ان دنوں ایسی بیماری میں مبتلا ہوں جس کی وجہ سے میں نہ کوئی کتاب پڑھ سکتا ہوں اور نہ کمپیوٹر پر کام کر سکتا ہوں۔ محض ایک تاریک کمرے میں میں لیٹا خلاؤں میں گھورتا رہتا ہوں۔ ڈاکٹر نے بھی میرا معائنہ کرنے کے بعد مایوسی کا اظہار کیا اور کہا کہ یہ بیماری لا علاج ہے۔ میں گھر والوں کو بھی پاس نہیں پھٹکنے دیتا کہ وہ بھی کہیں اس بیماری میں مبتلا نہ ہو جائیں۔ بس ہر وقت چھینکیں مارتا رہتا ہوں اور ناک پونچھتا رہتا ہوں۔ نزلہ اور زکام میں گرفتار آدمی کی زندگی بھی کیا زندگی ہے۔

غیرت کے نام پر قتل

2005-02-21T10:06:00.000+01:00

یورپ میں سیٹل ہونے والے تیسری دنیا کے باشندوں کی زندگی کا عجیب نمونہ ہے۔ یہ لوگ اپنی ساری زندگی مغرب کے آزادانہ ماحول سے لطف اندوز ہوتے ہیں لیکن جیسے ہی ان کی اولاد جوان ہوتی ہے اور وہ مغربی اقدار اپناتی ہے تو انہی لوگوں کو اپنی روایات یاد آنے لگتی ہیں۔ اس وقت بڑھاپے کے ناسٹیلجیا میں انہیں یاد آتا ہے کہ مذہب بھی کوئی چیز ہوتا ہے۔ اس کے بعد جو واقعات پیش آتے ہیں وہ روز مرہ کی خبروں کا حصہ ہیں۔ غچہ دے کر لڑکیوں کو وطن واپس لایا جاتا ہے اور زبردستی کہیں شادی کر دی جاتی ہے۔ ہر ہفتے کسی نہ کسی ترک یا پاکستانی لڑکی کا عزت یا غیرت کے نام پر قتل ہوتا ہے۔
میرا جرمنی میں یہ مشاہدہ ہے کہ یہاں کے ترک الگ کمیونٹی بنا کر رہتے ہیں اور جرمنوں سے زیادہ میل جول رکھنا پسند نہیں کرتے۔ ترک اور عرب خاندانوں کی ایک نہایت عجیب روایت یہ ہے کہ ان میں بچپن ہی سے بھائیوں کو اپنی بہنوں کا سرپرست قرار دے دیا جاتا ہے۔ اس کا مطلب یہ ہوتا ہے کہ لڑکیاں کہیں جانے کے لیے پہلے اپنے بھائیوں سے اجازت لیتی ہیں۔ میرے ایک فلسطینی ہمسائے کی بیٹی میری بیٹی کے ساتھ کھیلنے ہمارے گھر آتی تھی۔ کئی مرتبہ یہ ہوتا تھا کہ اس پانچ سالہ لڑکی کا بھائی جو اس سے صرف دو سال بڑا ہے، اس کے آنے پر پابندی لگا دیتا تھا یا اسے محض تھوڑی دیر کے لیے آنے دیتا تھا۔ مجھے یہ بات پسند نہیں آئی اور میں نے اس لڑکی کا اپنے گھر آنا مکمل بند کرا دیا۔ بعد میں میرے فلسطینی ہمسائے کو hint مل گیا اور پھر اس کی بیٹی بغیر کسی قدغن ہمارے گھر آنے لگی۔
لڑکوں کو بچپن سے دی گئی تربیت میں کہیں یہ نکتہ بھی موجود ہے کہ اپنی روایات سے انحراف کی صورت میں اپنی بہنوں کو قتل بھی کر دیا جائے۔ آج ایسی ہی ایک خبر پڑھ کر میری طبیعت خراب ہے۔ ایک جوان ترک عورت کو برلن میں کھلے عام گولیوں سے چھلنی کردیا گیا۔ اس لڑکی کا قصور یہ تھا کہ وہ اپنے خاوند سے طلاق لینے کے بعد اپنے بیٹے کے ساتھ اکیلی رہتی تھی۔ اس کے والدین نے اس کی سولہ سال کی عمر میں اس کے کزن سے ، جو استنبول میں رہتا تھا، شادی کر دی تھی۔ یہ مغربی ممللک میں غیر ملکیوں کی شادی کا کلاسیک پیٹرن ہے۔ جوان ہونے کے بعد لڑکیوں کے رشتے اپنے ملک میں تلاش کیے جاتے ہیں۔ یہی نہیں بلکہ اپنے آبائی گاؤں میں خاندان کا کوئی جاہل اور اجڈ لڑکا ڈھونڈا جاتا ہے جس کے ساتھ اپنی بیٹی کی قسمت پھوڑنا مقصود ہوتا ہے۔
مذکورہ بالا ترک لڑکی جس کا نام خبر میں ھاتن بتایا جاتا ہے ، آزادانہ ماحول کی عادی تھی، خود کو رسم ورواج میں پابند زندگی کے مطابق نہیں ڈھال سکی۔ ھاتن نے اپنے خاوند سے طلاق لے لی اور برلن میں اپنے بیٹے کے ساتھ علیحدہ رہنا شروع کردیا۔ یہی بات ھاتن کے لیے موت کا پروانہ بن گئی۔ جرمنی میں ترکوں کے ایک ترجمان نے اس واقعے پر افسوس کا اظہار کیا ہے اور اسے مذہبی تعلیمات کے منافی قرار دیا ہے۔ سوال یہ ہے کہ کیا ہر ایسے واقعہ میں مذہب کا ہاتھ ہوتا ہے۔ لوگ اپنی زندگی میں فرسودہ رسم و رواج کے پابند رہتے ہیں اور اسی کو مذہب سمجھتے ہیں۔ پاکستان میں لڑکیوں کی قراٰن سے شادی اور کاروکاری جیسی رسومات پر عمل شاید انہیں جائز سمجھ کر ہی کیا جاتا ہے۔
قتل ہونے والی ترک لڑکی ھاتن ایک پولی ٹیکنیک کالج سے پیشہ ورانہ تعلیم حاصل کر رہی تھی۔ اس سکول میں زیرتعلیم تین ترک طلبا کے مطابق ھاتن کو قتل ہی ہو جانا چاہیے تھا کیونکہ وہ ایک جرمن کی طرح رہتی تھی اور سر پر حجاب بھی نہیں لیتی تھی۔ یہ بات کسی طرح کالج کے ڈائریکٹر تک پہنچ گئی جس نے اس پر سخت ردعمل کا اظہار کیا۔ ان طلبا کی ان کے والدین کے ہمراہ جواب طلبی ہوگی۔
عزت کے نام پر قتل جیسے واقعات کے باعث یورپ کے لوگ ترک اور پاکستانیوں کو نفرت اور حقارت کی نظر سے دیکھتے ہیں۔ ان کی نظر میں ان کے ترقی یافتہ معاشرے میں ساری عمر سوشل ہیلپ پر گزارہ کرنے کے بعد یہ لوگ انہی کی معاشرتی اقدار کو نفرت سے دیکھتے ہیں۔ اس طرح کے واقعات کے بعد ان لوگوں کو مشورہ دیا جاتا ہے کہ اپنی رسوم ورواج کی پابندی واپس اپنے ملک میں جا کر کرو۔
یہ بات کوئی ڈھکی چھپی نہیں ہے کہ مغرب میں اسلام کے خلاف تعصب موجود ہے۔ میری نظر میں ایسا کام بہت تھوڑا ہو رہا ہے جس سے لوگوں کو اسلام کے بارے صحیح معلوم ہو سکے جبکہ عزت کے نام پر قتل جیسے واقعات کے باعث یہ تعصب بڑھتا جا رہا ہے۔
یہ بات مجھے بھی نہیں پسند ہے کہ ہمارے بچے مغرب کے رنگ میں رنگے جائیں لیکن والدین کو بھی وقت پر اپنی ذمہ داری سمجھنی چاہیے۔ مغربی ماحول میں اولاد کی تربیت ایک چیلنج ضرور ہے لیکن جو والدین اپنی ذمہ داری کا احساس رکھتے ہیں ان کے بچے مغربی ماحول کی غلط باتوں سے بچنے کے ساتھ ساتھ یہاں کی اچھی باتوں یعنی تعلیم کے بہتر مواقع سے بھی بھر پور فائدہ اٹھاتے ہیں۔ یہ بھی میری نظر میں خام خیالی ہے کہ اپنے ملک واپس جا کر ہم اپنے بچوں کو غلط اثرات سے محفوظ رکھ سکیں گے۔ پاکستان میں رہنے والدین کی ذمہ داری کسی طرح کم نہیں ہوتی۔ کیبل ٹی وی اور انٹرنیٹ کے اس دور میں بچوں کی تربیت پہلے سے کہیں بڑا چیلنج ہے اور اپنی ذمہ داری سے غفلت کرنے والدین کے پاس محض پشیمانی رہ جاتی ہے یا پھر غیرت کے نام پر قتل کا راستہ۔

بلاگ کا فونٹ

2005-02-10T23:47:00.000+01:00

آصف اور دانیال کئی مرتبہ مجھ سے کہ چکے تھے کہ نبیل بھائی آپ معقول آدمی معلوم ہوتے ہیں، یہ اپنے بلاگ پر فونٹ کونسا استعمال کرتے ہیں، نفیس ویب نسخ کیوں نہیں استعمال کرتے۔ آصف کے نشاندہی کرنے پر میں نے دیکھا تو واقعی اردو نسخ ایشیا ٹائپ کاپی رائٹڈ ہے اور قانونی طور پر اسے بلا اجازت استعمال نہیں کیا جا سکتا۔ اس کے باوجود اردو کی کئی ویب سائٹس اسی فونٹ کو استعمال کر رہی ہیں۔ ایک ویب سائٹ پر تو اسے ونڈوز کا فونٹ قرار دیا گیا ہے اور لوگ بلا جھجک اسے اپنی ویب سائٹ پر ڈاؤنلوڈ کے لیے رکھ رہے ہیں۔ میں نے بہرحال اپنے بلاگ پر نفیس ویب نسخ فونٹ کا استعمال شروع کر دیا ہے۔ اگرچہ یہ اچھا فونٹ ہے اور ویب سائٹس پر استعمال کے لیے موزوں بھی ہے لیکن ایک قباحت جو اس میں ہے وہ یہ کہ اس میں اعراب اور تشدید نہیں ہیں۔

اردو کی خدمت

2005-02-10T23:35:00.000+01:00

جب سے دوستوں نے اردو بلاگ اور اردو وکی پیڈیا سیٹ اپ کیا ہے میرے دن کا چین اور راتوں کی نیند ختم ہو گئی ہے۔ میں اب خواب میں بھی بلاگنگ اور وکی۔انگ کرتا رہتا ہوں۔ آفس میں بھی آنکھ بچا کر انٹرنیٹ پر ویب پروگرامنگ کے متعلق پڑھتا رہتا ہوں۔ نتیجتا دیر تک آفس میں بیٹھنا پڑتا ہے۔ ظاہر ہے جس کام کی تنخواہ ملتی ہے وہ کام بھی تو کرنا ہے ورنہ نوکری سے نکالا جاؤں گا۔ گھر میں بیگم الگ نالاں ہیں۔ کہتی ہیں کیا بے کار بلاگنگ کی لت ڈال لی ہے۔ انہیں کیا بتاؤں کہ زندگی آرام سے گزر رہی تھی حتی کہ بلاگ لکھنے کا پتا لگ گیا۔ اردو بلاگ میں نے اس لیے سیٹ اپ کیا تھا کی میں اپنے دل کا غبار نکال سکوں۔ اس وقت میرے نزدیک میرا بلاگ ہائیڈ پارک کی طرح تھا جہاں کھڑے ہو کر میں حکومت وقت کے خلاف باغیانہ تقاریر کر سکوں اور سننے والے اسے محض دیوانے کی بڑ سمجھ کر نظر انداز کردیں اور آگے بڑھ جائیں۔ اصل صورتحال اس کے کچھ برعکس نکلی ہے اور میں دوسرے کچھ بلاگرز کے ساتھ مل کر اردو زبان کی خدمت انجام دے رہا ہوں۔

جیسا میں اپنی ایک پرانی پوسٹ میں بیان کر چکا ہوں کہ کچھ بلاگر مل کر انٹرنیٹ پر اردو سے متعلق معلومات کا ذخیرہ اکٹھا کرنا چاہتے ہیں۔ ہمارا مقصد یہ بھی ہے کہ اس سمت میں دلچسپی رکھنے والوں کو ایک مشترکہ کاوش کا پلیٹ فارم مہیا کریں۔ میں اب لوگوں کے بلاگز پر جا جا کر انہیں اس پراجیکٹ سے آگاہ کر رہا ہوں اور انہیں اس میں شامل ہونے کی ترغیب دے رہا ہوں۔

توجہ کا فقدان میرا پرانا مسئلہ رہا ہے۔ بجائے اس کے کہ میں اردو وکی پیڈیا پر تحریری کام کرتا، میں اس کے پس منظر میں فعال سوفٹویر انفراسٹرکچر سے مسحور ہو گیا۔ نتیجتا میں نے اپنے کمپیوٹر پر اپاچی ویب سرور، مائی ایس کیو ایل ڈیٹا بیس اور پی ایچ پی سکرپٹنگ کا نظام سیٹ اپ کیا۔ اس کے علاوہ میں نے WikkaWiki اور phpBB بھی اپنے کمپیوٹر پر انسٹال کیے۔میرا مقصد یہ دیکھنا تھا کہ اردو کی انٹرنیٹ پر ترویج کے لیے پروگرامز میں کیا ردو بدل ضروری ہے۔ ہم لوگوں کا یہ عزم بھی ہے کہ ہم ایک خالص اردوفورم شروع کریں گے۔موجودہ اردو فورم یا تو رومن اردو استعمال کرتے ہیں یا پھر تصویری اردو۔ ایک ساتھی بلاگر قدیر احمد رانا کا دعوی ہے کہ وہ 50 فیصد کام مکمل کر چکے ہیں۔ میری کوشش ہے کہ ایک ایسا پراجیکٹ سیٹ اپ ہو جائے جہاں سب لوگ مل کر قدیر کا اس کام میں ہاتھ بٹا سکیں۔

اردو وکی کی آہستہ اہستہ صورت نکلتی آ رہی ہے۔ اگرچہ اس وقت یہاں زیادہ مواد موجود نہیں ہے لیکن امید کی جا سکتی ہے کہ وقت گزرنےاور مزیدلوگوں کی شمولیت کے ساتھ مواد کی مقدار اور کوالٹی میں اضافہ ہوتا جائے گا۔ ایک اور بلاگر اعجاز آسی جو کہ اب تک انگریزی میں بلاگ لکھتے آئے تھے، نے اپنی اردو میں پہلی پوسٹ لکھی ہے اور کیا خوب لکھی ہے۔ اعجاز کا اردو کی ترویج کی کاوشوں میں سرگرم ہونا یقینا اچھا شگون ہے۔ میں امید کرتا ہوں کہ وقت گزرنے کے ساتھ ہماری مہم زور پکڑتی جائے گی۔

کرکٹ اور سیاست

2005-02-10T20:46:00.000+01:00

پاکستان کرکٹ بورڈ نے بھارت میں ہونے والی سیریز کے سلسلے میں احمدآباد میں ٹیسٹ کھیلنے سے انکار کر دیا ہے۔ اس کی وجہ سیکیورٹی سے معلقہ خدشات بتائے جاتے ہیں۔ یہ بھی سننے میں آیا ہے کہ پاکستان کرکٹ بورڈ حکومت پاکستان کی ہدایت پر یہ قدم اٹھا رہا ہے۔ آج کے زمانے میں کھیل محض کھیل نہیں رہا بلکہ سیاست اور سفارت کاری کا موثر ذریعہ بن گیا ہے۔ گزشتہ ورلڈ کپ میں برطانیہ کی ٹیم نے زمبابوے میں میچ کھیلنے سے انکار کر دیا تھا۔ نتیجتا اسے ٹورنامنٹ سے باہر ہونا پڑا۔ یہ تھی ٹونی بلیر کی سفارتی کامیابی۔

گزشتہ سال بھارت کرکٹ بورڈ نے بھی پشاور اور کراچی میں ٹیسٹ میچ کھیلنے سے انکار کر دیا تھا جبکہ ون ڈے کھیلنے پر انہیں کوئی اعتراض نہیں تھا۔ اس طرح کے نامعقول اعتراضات کے نتائج بعد میں بھگتنے پڑتے ہیں۔ 1980 میں امریکہ اور اسکے اتحادی ممالک نے روس کے افغانستان پر حملے پر بطور احتجاج ماسکو میں ہونے والے اولمپک گیمز میں شرکت سے انکار کر دیا تھا۔ چار سال بعد 1984 میں جواب آں غزل کے طور پر روس اور اس کے اتحادی ممالک نے لاس اینجلس میں ہونے والی اولمپک گیمز میں شرکت سے کنارہ کشی کرلی۔

پاکستان اور بھارت کے درمیان کرکٹ سیریز تقریبا پورے برصغیر کو اپنی لپیٹ میں لے لیتی ہے۔ کرکٹ سیریز کے دوران سیاستدان بھی اپنے زوردار بیانات سے عوام کے دل گرمائے رکھتے ہیں۔ اسی طرح کا ایک بیان گجرات کے گورنر نریندر مودی کا منظرعام پر آیا ہے۔ مودی نے پاکستانی کرکٹ ٹیم پر چوٹ کرتے ہوئے کہا ہے کہ وہ شکست کے ڈر سے احمدآباد میں نہیں کھیل رہی۔ مودی جیسے بیان بازوں کا دم غنیمت ہے، ہم جیسے بلاگرز کو لکھنے کے لیے کچھ مل جاتا ہے۔ سوال یہ ہے کہ مودی کو کیسے معلوم ہے کہ پاکستانی ٹیم کو احمدآباد میں شکست ہوگی۔ کیا مودی بھی ان صلاحیتوں کے حامل جن سے انہیں میچ کا نتیجہ پہلے ہی پتا چل جاتا ہے۔ پھر تو وہ یقینا چاہتے ہوں گے احمدآباد میں میچ ضرور ہو تاکہ ان کے لگائے ہوئے سٹوں پر منافع ہو۔ دوسرا امکان یہ بھی ہو سکتا ہے کہ مودی کا اس میچ میں میں خود میدان میں کود پڑنے کا ارادہ ہو اور وہ اس کے لیے ابھی سے گوگلی، دوسرا اور تیسرا کی پریکٹس کر رہے ہوں۔ اب مودی کو کوئی سمجھائے یہ کرکٹ ہے کوئی پٹرول چھڑک کر آگ لگانے والا کھیل نہیں ہے۔

پاکستانی سیاستدان اور صحافی بھی اس معاملے میں کسی سے پیچھے نہیں ہیں۔ کئی کالم نویسوں کو بھارت کے ساتھ کرکٹ کھیلنے سے دوقومی نظریہ خطرے میں نظر آتاہے۔ ظاہر ہے جب ایک دوسرے کے ساتھ کرکٹ ہی کھیلنی تھی تو الگ ملک حاصل کرنے کی کیا ضرورت تھی۔ کچھ مذہبی علما بھی بوجوہ کرکٹ پر ناک بھوں چڑھاتے ہیں۔ ڈاکٹر اسرار احمد نے مرحوم جنرل ضیاالحق کو کرکٹ پر پابندی لگانے کا مشورہ دیا تھا۔ ان کے نزدیک بیٹسمین بیٹنگ کرتے ہوئے فحش پوزیشن اختیار کرتے ہیں۔ کرکٹ کے کھیل کا اس زاویے سے مشاہدہ یقینا کسی عام مولوی کے بس کی بات تو نہیں، اس کے لیے کوئی بلند پایہ عالم ہی چاہیے۔

گزشتہ سال پاکستان سے سیریز جیتنے کے بعد بھارت پر شادی مرگ کی کیفیت طاری تھی۔ بھارتی جرائد پاکستان پر طرح طرح کی چوٹیں لگا رہے تھے۔ اس طرح کے بیانات اور مضامین سامنے آ رہے تھے جیسے پاکستان کے خلاف جنگ میں فتح حاصل ہوگئی ہو۔ یہ صورتحال یقینا کئی لوگوں کے لیے کافی آزردگی کا باعث تھی۔ ہم یہ بھول جاتے ہیں کہ یہ محض ایک کھیل ہے۔ ہم یہ بھی بھول جاتے ہیں ہمارا رویہ بھی اس معاملے میں کچھ زیادہ مختلف نہیں ہے۔ 1987 میں عمران خان کے زیر قیادت پاکستانی ٹیم نے بھارت میں تاریخی کامیابی حاصل کی تھی۔ بنگلور ٹیسٹ کی یاد اب بھی لوگوں کا دل گرما دیتی ہے۔ مجھے یاد پڑتا ہے کہ اس سیریز میں کامیابی کے بعد کئی پاکستانی کالم نویس بھارت کو کشمیر کا مسئلہ کرکٹ کے میدانوں میں حل کرنے کا مشورہ دیتے تھے۔

روشن خیالی

2005-02-02T11:46:00.000+01:00

کچھ روز قبل میں نےچپاتی مسٹری کا بلاگBaring my Religion پڑھا۔ اس بلاگ میں پولینڈ کے جریدے فورم کا حوالہ ہے جس میں حافظ بعادہ (Hafid Bouazza) کا مضمون ”قراٰن میں کتنا کاماسوترا ہے” شائع ہوا ہے۔فورم کے اس مخصوص شمارے میں اس مضمون کی مناسبت سے سرورق پر ایک ماڈل کی تصویر چھپی ہوئی ہے جس کا اوپر کا دھڑ برہنہ ہے اور اس نے سر پر حجاب لیا ہوا ہے۔ اس ماڈل کے پس منظر میں شٹل کاک برقعے والی عورتیں نظر آ رہی ہیں۔ اب اللہ بہتر جانتا ہے کہ ان برقعوں کے اندر واقعی عورتیں ہیں یا جریدہ فورم کا عملہ ہے۔ مذکور بالا مضمون کے بارے میں چپاتی کا کہنا ہے کہ حافظ نے باقاعدہ تاریخ کے حوالے دے کر ثابت کیا ہے کہ اسلام سیکس کے بارے میں بہت حوصلہ افزاء رویہ رکھتا ہے اور یہ کہ مذہبی انتہا پسندوں نے بلا وجہ دین کو ہائی جیک کرکے اپنی من مانی تشریح کی ہوئی ہے۔ چپاتی کے مطابق یہ ایک دلچسپ مضمون ہے۔ بدقسمتی سے مجھے یہ مضمون مل نہیں سکا۔ پولش مجھے پڑھنی نہیں آتی اور جس فرنچ جریدے میں اس مضمون کا فرانسیسی ترجمہ شائع ہوا ہے وہ صرف ممبران کے لئے میسر ہے۔ مضمون کو بغیر پڑھے اس پر تبصرہ قرین انصاف نہیں ہے۔ جہاں تک سرورق کا تعلق ہے تو چپاتی کے خیال میں جریدہ فورم نے یہ محض سستی پبلسٹی حاصل کرنے کی خاطر کیا ہے اور اس کا مضمون کے موضوع سے کوئی تعلق نہیں ہے۔ تعلق جوڑنا کونسا مشکل ہے۔ میرا اندازہ ہے کہ سرورق پر شٹل کاک برقعہ مذہبی انتہا پسندوں کے اسلام کو ظاہر کر رہا ہے جس میں جنس کے جذبات کا پردے کے پیچھے گلا گھوٹ دیا جاتا ہے جبکہ نیم برہنہ خاتون جنسی جذبات کی آزادی کا نشان ہیں۔ چپاتی کا کہنا ہے کہ اس سرورق پر بلاوجہ ناراض ہونے کی ضرورت نہیں ہے۔ چپاتی بھائی ناراضگی کیسی، ہمیں تو ان خاتون کے نچلے دھڑ پر اعتراض ہے جس پر لباس ہے۔آجکل تو ویسے بھی ہم سب موڈریٹ اور روشن خیال بن رہے ہیں۔ اگر ہمیں غصہ آ بھی گیا تو کسی کا کیا بگاڑ کیں گے۔ خود ہی پیچ و تاب کھا کر سکون سے بیٹھ جائیں گے۔ سلمان رشدی کی شیطانی آیات پر احتجاج کے دوران محض اس کتاب کی اشاعت ہی بڑھی ہے یا پھر وہ بیچارے مظاہرین پولیس کی گولیوں کا شکار ہوئے تھے جو کہ اسلام آباد میں امیریکن سینٹر کے باہر احتجاج کر رہے تھے۔ سلمان رشدی نے شیطانی آیات سی آئی اے کے کہنے پر جو لکھی تھی۔ ہالینڈ میں فلمساز وان گو کو دہشت گردی کا نشانہ بنایا گیا۔ وان گو کی فلم میں ایک عریاں عورت کے جسم پر قراٰنی آیات لکھی ہوئی دکھائی گئی ہیں۔ وان گو کے قتل کے بعد ہالینڈ میں چالیس سے زیادہ مساجد کو جلا دیا گیا ہے

فورم کے سرورق پر پوزکرنے کے لئے کسی پاکستانی ماڈل کی خدمات بھی حاصل کی جاسکتی تھی۔ انیتا ایوب کے جسم کی نمائش کرنے پر جب مولویوں نے اعتراض کیا تو اس کے جواب میں انیتا ایوب کی تصویر شائع ہوئی جس میں انہوں نے حجاب لیا ہوا تھا ، سویمنگ کاسٹیوم کے اوپر۔
بعادہ کا مضمون پڑھے بغیر اس پر تبصرہ اندھیرے میں تیر چلانے کے مترادف ہے۔ لہذا یہ قصہ ہم یہیں ختم کرتے ہیں۔

غیرت کے نام پر

2005-01-30T18:04:00.000+01:00

اہل پاکستان کو مبارک ہو کہ وہاں غیرت کے نام پر ایک اور باب رقم ہونے والا ہے۔ بلوچستان میں سوئی کے مقام پر ریپ کا شکار ہونے والی ڈاکٹر شازیہ کو کاری کرنے کا فیصلہ ہو گیا ہے۔ یہ فیصلہ ڈاکٹر شازیہ کے خاوند کے دادا وڈیرہ رحیم بخش کی موجودگی میں ہونے والے جرگے میں کیا گیا ہے۔جرگے میں کہا گیا کہ ڈاکٹر شازیہ کا معاملہ ان کی عزت کا معاملہ ہے اور اسے مرنا ہی ہوگا۔
بات تو سمجھ آنے والی ہے۔ وڈیرہ رحیم بخش کی نام نہاد عزت پر جو داغ پڑا ہے، ڈاکٹر شازیہ کے روح اور جسم کو پہنچنے والی اذیت کی اس کے سامنے پرکاہ کی اہمیت بھی نہیں ہے اور اس داغ کو ڈاکٹر شازیہ کے خون سے ہی دھویا جا سکتا ہے۔اس قسم کے انسان نما درندے ملک کے ایوان اقتدار میں بھی موجود ہیں جہاں سیاسی حمایت حاصل کرنے کے لیے ان کے ناز نخرے بھی اٹھائے جاتے ہیں۔ ایسے ہی ایک وڈیرے ممبر قومی اسمبلی نے پارلیمنٹ میں یہ سمجھانے کی کوشش کی تھی کی کاروکاری کے خلاف قانون سازی کی کوئی ضرورت نہیں ہے اور یہ کہ کاروکاری ان کی اہم روایت ہے جسکی اہمیت کا عام لوگ ادراک نہیں کر سکتے۔
ہمارے ملک میں ان جرگوں اور پنچایتوں کے نام پر ظلم کی مشینیں چل رہی ہیں جن کا ایندھن بے گناہ مائیں، بہنیں اور بیٹیاں ہیں۔ ایسی ہی ایک پنچایت نے کچھ عرصہ قبل فیصلہ دیا کہ مائی مختار کو پانچ مرد ریپ کریں گے۔ یہ اس بات کی سزا تھی کہ مائی مختار کے بھائی کے کسی اعلیٰ خاندان کی لڑکی سے تعلقات قائم ہو گئے تھے۔ بعد میں پتا چلا کہ یہ الزام بھی جھوٹ تھا۔لیکن اس سے کیا فرق پڑتا ہے۔ ہم لوگ اپنی ماؤں، بہنوں اور بیٹیوں کو اپنی غیرت کی بھینٹ چڑھنے کا خاموش تماشہ دیکھتے رہتے ہیں۔ ظلم کے خلاف کوئی آواز کون اٹھائے، مذہبی جماعتیں؟ ان کی حیثیت تو میری نظر میں اس طوائف سے زیادہ نہیں ہے جو ہر فوجی حکمران کے اقتدار کو دوام بخشنے کے لیے اس کے بستر میں کودنے کو بے چین رہتی ہے۔ جہاں تک ان مذہبی جماعتوں کے عام کارکنوں کا تعلق ہے تو وہ غیظ و غضب سے بھرپور تمام شہر کا چکر لگاتے ہیں اور جہاں جہاں عورت کی تصویر والا اشتہاری بورڈ نظر آتا ہے اسے نیست و نابود کر دیتے ہیں۔ اس لمحے بھی ملک کے کسی حصے میں کسی جہادی تنظیم کا رکن اپنے جسم سے بم باندھے مخالف فرقے کی مسجد کے باہر گھات لگا کر انتظار کر رہا ہو گا کہ جیسے ہی جماعت کھڑی ہو تو حملہ کرکے سب نمازیوں کو جہنم واصل کردے اور اس کے بدلے جنت میں داخل ہو جائے۔ ان کو دین کی یہی تعلیم ملی ہے۔
جرگے کے فیصلے کے بعد اسلحہ بردار غیرت کے رکھوالے ڈاکٹر شازیہ کے کھوج میں نکل کھڑے ہوں گے۔ اللہ تعالیٰ ڈاکٹر شازیہ کو اپنے حفظ و امان میں رکھے۔

اردو کی ترویج

2005-01-29T13:11:00.000+01:00

عزیزی آصف کے بلاگ پر اردو بلاگنگ کی ترویج کے سلسلے میں ایک مشترکہ کاوش کرنے کی تجویز پیش کی گئی ہے۔ اس تجویز کو دوسرے بلاگرز زکریا اور دانیال نے روشنی کی رفتار سے عملی جامہ پہنانا شروع کر دیا ہے۔ زکریا نے اس مقصد کی خاطر ایک بلاگ بھی سیٹ اپ کر دیا ہے جہاں مختلف لوگ معلومات اکٹھی کر سکتے ہیں۔ اردو کی انٹرنیٹ پر ترویج کا دارومدار یقینا ایسے ہی رضاکارانہ کام کرنے والے لوگوں کے جوش وجذبہ پر ہے۔ میری خواہش تھی کی یہ مشترکہ کاوش اردو بلاگنگ تک ہی محدود نہ رہے بلکہ اردو سے متعلق تمام ممکنہ معلومات کا ایک ذخیرہ مرتب کیا جائے۔ میری دانست میں وکی پیڈیا (Wikipedia) اس مقصد کے لئے ایک مناسب پلیٹ فارم فراہم کرتا ہے جہاں مختلف لوگ ایک مربوط انداز میں معلومات ذخیرہ کر سکتے ہیں۔ یہ تجویز میں نے آصف کے بلاگ پر پیش کی اور انہوں نے بھی پلک جھپکتے میں ایک اردو وکی سیٹ اپ کر دیا۔

یہ سب کچھ یہ ظاہر کرتا ہے کہ اردو پڑھنے لکھنے والے اردو کی خاطر کچھ کر جانے کے کئے بے چین ہیں۔ دیکھا جائے تو اب اس مقصد کے لئے حالات بھی سازگار ہیں۔ ونڈوز اور لینکس آپریٹنگ سسٹم اردو یونیکوڈ اور اردو ٹائپنگ کو سپورٹ کرتے ہیں۔ متعدد اردو یونیکوڈ فونٹ بھی تیار ہو چکے ہیں۔ آصف نے ایک اچھا کام کیا ہے کہ ونڈوز کے لئے ایسے فونٹس کی ایک انسٹالیشن پروگرام تیار کر دیا ہے۔ یہ پروگرام تمام معروف اردو فونٹس ونڈوز میں انسٹال کر دیتا ہے۔

ہو سکتا ہے کہ میں اپنی زندگی میں ہی دیکھ لوں کہ پراجیکٹ گٹن برگ (Project Gutenberg) کی طرز پر اردو لٹریچر کا ذخیرہ انٹرنیٹ پر موجود ہو۔کیا معلوم کہ کل کو داستان طلسم ہوشربا باقاعدہ نستعلیق میں انٹرنیٹ پر موجود ہو۔ یہ اگرچہ دیوانے کا خواب لگتا ہے لیکن آج کے دور میں ایسے خواب جلد ہی شرمندہ تعبیر ہو جاتے ہیں۔ بڑے پیمانے پر اردو مواد کی ترویج محض چند بلاگرز کے بس کی بات نہیں ہے لیکن وہ ایک مضبوط بنیاد فراہم کر سکتے ہیں۔ میں امید رکھتا ہوں کہ دنیا بھر میں اردو سے محبت رکھنے والے اس کاوش میں شریک ہوں گے اور اردو کی ترویج کو فروغ دیں گے۔ میں تو یہ چاہوں گا بھارت کے لوگ بھی اس کام میں شریک ہوں۔ یہ کام اردو کے فروغ کے لئے کیا جا رہا ہے اور اس کا پاکستان بھارت مخاصمت سے کوئی تعلق نہیں ہے۔ جو صاحب یا صاحبہ اپنے سیاسی نظریات کا اظہار کرنا چاہیں اس کے لئے آن لائن رسالہ چوک موجود ہے۔

سونامی کے متعلق آیت

2005-01-19T22:33:00.000+01:00

آج ایک جرمن ٹی وی چینل پر ایک رپورٹ نشر ہوئی۔اس رپورٹ میں انڈونیشیا میں سونامی کی تباہی کے بعد کے حالات دکھائے جا رہے تھے۔ ایک دلچسپ بات جو دکھائی گئی وہ یہ تھی کہ ایک مولوی صاحب بچوں کو قراٰن کا درس دے رہے تھے۔ قراٰن کی حقانیت کے ثبوت کے طور پر ان مولوی صاحب نےباقاعدہ قراٰن مجید کا ایک صفحہ کھول کر دکھایا کہ یہ دیکھو یہ لکھا ہوا ہے کہ 26دسمبر 2004کو سمندری طوفان سونامی آئے گا۔ درس کے بعدجرمن رپورٹرز نے بھی قراٰن میں وہ آیت دیکھنا چاہی تو مولانا نے درشتگی سے منع کر دیا کہ غیر مسلموں کا قراٰن کو دیکھنا ممنوع ہے۔ مجھے قدرے اطمینان ہواکہ اس طرح کے مولوی حضرات صرف ہمارے ہاں ہی نہیں پائے جاتے باقی ملکوں کو بھی یہ شرف حاصل ہے۔ اس طرح کی رپورٹ آنے کے بعد میری دعا ہوتی ہے کہ میرے کسی جرمن جاننے والے نے یہ رپورٹ نہ دیکھ لی ہوورنہ وضاحتین پیش کرنی پڑتی ہیں۔

َِِِِعبد الستار ایدھی اور اعزازی ڈاکٹریٹ

2005-01-10T18:57:00.000+01:00

کچھ روز قبل روزنامہ ڈان کے ویب پیج پر اردشیر کاؤس جی کا کالم پڑہنے کا اتفاق ہوا۔ اپنے کالم میں کاؤس جی نے ایک دلچسپ واقعہ کا ذکر کیا ہے۔ واقعہ کچھ یوں ہے کہ سندہ کے گورنر عشرت العباد عبدالستارایدھی کو گرینوچ یونیورسٹی کی جانب سے اعزازی ڈاکٹریٹ کی ڈگری پیش کر رہے ہیں۔ مزے کی بات یہ ہے کہ کچھ روز قبل ہائرایجوکیشن کمیشن نےجن جعلی یونیورسٹیوں سے خبردار کیا تھا ان میں گرینوچ یونیورسٹی کا نام بھی شامل تھا۔اب سوال یہ پیداہوتا ہے کہ ایدھی صاحب جیسے نیک نام شخص کوایک جعلی یونیورسٹی کی اعزازی ڈگری پیش کرنے کا کیا مقصد ہو سکتا ہے۔ دورکی کوڑی لانے کا ہمیں صدا سے شوق ہے۔ ایک ممکنہ وجہ پرانی غلطیوں کا ازالہ ہو سکتی ہے۔ ایک عید قربان کے موقعہ پر ایم کیو ایم کے کارکنوں نے ایدھی ٹرسٹ کے قربانی کی کھالوں کے عطیات کے ٹرک لوٹ لئے تھے۔
اعزازی ڈاکٹریٹ کی ڈگریاں پیش کرنے کا سلسلہ اگر یونہی جاری رہا تو ممکن ہے کہ کل عشرت العباد عمران خان کو بھی اعزازی ڈاکٹریٹ کی ڈگری پیش کر رہے ہوں۔ عمران خان کوکراچی میں ایم کیو ایم کے کارکنوں نے گالیاں دیں تھی۔ اسی طرح ہو سکتا ہے کہ کل کو مرحوم صلاح الدین (مدیر تکبیر) اور مرحوم حکیم محمد سعید کی قبروں پر اعزازی ڈگریوں کے نذرانے چڑھائےجائیں۔

تفنن بر طرف، کاؤس جی نے اپنے کالم میں ایک اور دلچسپ واقعہ کا ذکر کیا ہے جو یوں ہے کہ مرحوم صدرپاکستان جنرل ضیالحق کو ان کے حواریوں نے مشورہ دیا کہ ملک و قوم کی خدمات کے پیش نظر انہیں اعزازی ڈاکٹریٹ کی ڈگری ملنی چاہئے۔ اس مقصد کے لئے تھائی لینڈ کے دورے کا موقع چنا گیا اور تھائی لینڈ کی ایک مشہور یونیورسٹی سے رابطہ کیا گیا لیکن اس یونیورسٹی نے جنرل صاحب کو اعزازی ڈاکٹریٹ کی ڈگری دینے سے انکار کر دیا۔ اس یونیورسٹی نے خود تھائی لینڈ کے وزیراعظم کو بھی اعزازی ڈاکٹریٹ کی ڈگری دینے سے انکار کر دیا تھا۔ مجبوراً جنرل صاحب کے لئے کسی گمنام سی یونیورسٹی کی اعزازی ڈاکٹریٹ کی ڈگری کا بندوبست کیا گیا۔ ہمارے ملک کے حکمران بھی اپنے خوشامدیوں کی باتوں میں آ کر کتنی گری ہوئی حرکتیں کرتے ہیں۔ کاؤس جی کے کالم میں اس بات کا بھی انکشاف کیا گیا ہے کہ آکسفورڈ یونیورسٹی نے بھٹو کو بھی اعزازی ڈاکٹریٹ کی ڈگری دینے سے انکار کر دیا تھا۔ بھٹو کی مسلط کی ہوئی جمہوریت آکسفورڈ کے معیار پر پوری نہیں اتری تھی۔ یہی سلوک آکسفورڈ نے مارگریٹ تھیچر کے ساتھ کیا تھا۔
کاؤس جی اپنے کالم میں ایک واقعہ کا ذکر کرنا بھول گئے اور وہ یہ کہ سابق وزیر اعظم بے نظیر کو ان کے فلپائن کے دورے کے موقع پر منڈاناؤ یونیورسٹی کی جانب سے اعزازی ڈاکٹریٹ کی ڈگری پیش کی گئی۔ یہ بھی سننے میں آتا ہے کہ اس یونیورسٹی کے قیام کا واحد مقصد اس اعزازی ڈاکٹریٹ کا اجراء تھا۔ واللہ اعلم بالصواب۔

میرا اردو بلاگ

2005-01-02T13:59:00.000+01:00

میری ہمیشہ سے دیرینہ خواہش تھی کہ اردو کو بھی انفارمیشن ٹیکنالوجی کی دنیا میں اپنا مقام ملے۔ مجھے یوں معلوم ہوتا ہے کہ اپنے مخصوص رسم الخط کے باعث اردوکی کمپیوٹر کی دنیا میں بہت پیچھے رہ گئ ہے۔ اب خداخدا کر کے نہ صرف نسخ اور نستعلیق فونٹ تیار ہو گئے ہیں بلکہ ہر یونیکوڈ کمپیٹیبل ایڈیٹر اور ورڈپروسیسر میں اردو مواد کی تخلیق بھی ممکن ہو گئ ہے۔یونیکوڈ اور اوپن ٹائپ فونٹ کی سپورٹ مائکوسوفٹ ونڈوز اور لینکس دونوں میں موجود ہے۔

اب جبکہ بنیادی ضروری ٹیکنالوجی میسر ہے، اردو کی ترویج کا دارومداراردوسے محبت کرنے والوں کے جوش و جذبہ پر ہے۔اس موقع پر میں دانستہ پاکستانیوں کا ذکر نہیں کر رہا۔ اردو کو سمجھنے اور اس سے محبت کرنے والے انڈیا میں بھی کثیر تعداد میں موجود ہیں۔ اردوپاکستان کی قومی زبان ہےاور پاکستانیوں کی شناخت کا اہم حصہ ہے۔ اس بناءپرمختلف ادوار میں اردو کی بنیاد پر حملے ہوتے رہے ہیں۔ لیکن یہ ایک بالکل الگ موضوع ہے اوراسے کسی اور وقت کے لئے اٹھا رکھتے ہیں۔ اگرچہ کئ اردو ویب سائٹس اور پورٹل منظرعام پر آگئےہیں لیکن اردو کونٹینٹ کی دنیا میں ابھی تک بی بی سی کی ویب سائٹ کا راج ہے۔گوگل پر کسی بھی اردومواد کی تلاش کے نوے فیصد سے زیادہ لنکس بی بی سی کی ویب سائٹ کے ہوتے ہیں۔ اب اردو بلاگز کا دم غنیمت ہے۔

دوسروں کے اردو بلاگ پڑھ کے میرے دل میں بھی خواہش جاگی کہ میں اپنا اردو بلاگ سیٹ اپ کروں۔اردو بلاگ سیٹ اپ کرنا میری توقعات سے مشکل نکلا۔ مناسب طور پر اردو دکھانے کے لئے blogger.com کی templates میں تبدیلی کئے بغیر گزارا نہیں ہے۔ اس کے لئے(Cascading Style Sheets (CSS کا علم ہونا ضروری ہے۔ مرتا کیا نا کرتا انٹرنیٹ پر CSS کے ٹیوٹوریل ڈھونڈے اور اس کی بنیادی باتیں سیکھی۔ اب جبکہ میرے بلاگ کا بنیادی ڈھانچہ تیار ہو گیا ہے، میں بلاگز پوسٹ کرنا شروع کر دی ہیں۔ میں CSS اور blogger tags کے بارے میں مزیدسیکھتا رہوں گا اور اپنے بلاگ کی نوک پلک سنوارتا رہوں گا۔کسی موقع پر میں اپنے اردو بلاگ سیٹ اپ کرنے کے تجربات اکٹھے کر کے ”رہنمائے اردوبلاگنگ” کے زیرعنوان پوسٹ کروں گا۔ مختلف فونٹس کے ساتھ تجربات کرنے کے بعد میں اپنے بلاگ کے لئے Urdu Naskh Asiatype فونٹ استعمال کر رہا ہوں۔

میرا ارادہ اردو اور انگریزی دونوں میں بلاگ پوسٹ کرنے کا ہے۔ میرا بلاگنگ کا مقصد کوئی دانشوری بھگارنا نہیں ہے، محض اپنے خیالات کا اظہارہے یا دوسرے الفاظ میں اپنے دل کی بھڑاس نکالنا ہے۔ مئوثربلاگنگ کی راہ میں مجھے ابھی کئی رکاوٹوں کو عبور کرنا ہے۔ سب سے پہلی بات تو اردو ٹائپنگ کی مشق کرنا ہے۔اس کے علاوہ میری اردو میں روانگی بھی وقت اور مشق کے ساتھ پیدا ہو گی۔ عرصہ دراز سے انگریزی اور جرمن میں لکھ پڑھ رہا ہوں، اردو کی مشق نہیں رہی۔

اردو اور انٹرنیٹ

2004-12-28T21:55:00.000+01:00

ذیل کے واقعات میری دانست میں اردو انفامیشن ٹیکنالوجی کی تاریخ میں سنگ میل کی حیثیت رکھتے ہیں۔

بی بی سی کی ویب سائٹ کااجراء۔ بی بی سی کی ویب سائٹ بلا شبہ اردو کی بہترین ویب سائٹ ہے۔
نستعلیق نفیس فونٹ کی تکمیل نستعلیق نفیس فونٹ میرے بہت پرانے خواب کی تعبیر ہے۔ اس فونٹ کی شکل میں بالآخر وہ ٹیکنالوجی دستیاب ہو گئ ہے جس کے ذریعے اب کسی بھی یونیکوڈکمپیٹیبل ایڈیٹر میں اصل نستعلیق اردو لکھی جا سکتی ہے۔

الطاف حسین اور گریٹر پنجاب

2004-12-23T17:39:00.000+01:00

چند روز قبل میں نے روزنامہ جنگ کی ویب سائٹ کھولی تو پھر سے الطاف حسین کا بیان پڑھ کر میرا دل ڈوب گیا۔ بیان یہ تھا کہ اگر گریٹر پنجاب کی بات ہوئ تو گریٹر سندھ کی بات بھی ھوگی۔ اس بیان میں پنجاب کے دانشوروں کے بھی لتے لۓ گۓ تھے جو کہ گریٹر پنجاب کی کاز کو آگے بڑھا رہے ہیں۔نہ جانے یہ گریٹر پنجاب کس کھیت کی مولی کا نام ہے۔یوں معلوم ہوتا ہے کہ اپنی سیاست میں نئی روح پھونکنے کی خاطر الطاف حسین گریٹر پنجاب کا ایک خود ساختہ عفریت کھڑا کرکےاس پر چاند ماری کر رہے ہیں۔کیا پورے کراچی کے عوام کو اکٹھا کر کے الطاف حسین کوکہنے کے لئے اس سے زیادہ عقلمندی کی بات نہیں سوجھی تھی۔ الطاف حسین کا کہناہے کہ یہ ملک انکے بزرگوں کی قربانیوں سے بنا ھے اور وہ اس کے خلاف کچھ کرنے کا سوچ بھی نہیں سکتے۔کراچی میں بوری بند لاشیں بکھیر کر نہ جانے ملک کی کیا خدمت کی جا رہی ہے۔

دراصل الطاف حسین نے اپنی مواصلاتی جدوجہد کے سلسلے میں لندن سے بذریہ ٹیلیفون کراچی کےعوام سے خطاب کیاتھا۔ اس خطاب کے بارے میں بی بی سی کے ایک تجزیہ نگار کا کہنا تھا کہ یہ کراچی کی سیاست میں ایک نئ جہت متعارف کراۓگا۔ میں ابھی تک سمجھنے سے قاصر ہوں کہ دوقومی نظرئے کے متعلق ہرزہ سرائی کرکے اور گریٹر پنجاب کا ہوا کھڑا کر کے کونسی نئی جہت متعارف کرانا مقصود ہے۔
ایم کیو ایم کاعام طور پر یہ لائحہ عمل دیکھنے میں آیا ہے کہ الطاف حسین کی تقاریر کے بعد ایم کیو ایم کے کچھ بزعم خود دانشور حضرات بھی سرگرم ہو جاتے ہیں۔ ان کا کام الطاف حسین کی تقریر کے رد عمل میں لکھے گئے کالموں کا جواب دینا ہوتاہے۔ نتیجتا ان حامی دانشوروں کی کئی مجہول تحاریر اخبارات کے ادارتی صفحات کی زینت بنتی ہیں جن میں الطاف حسین کی دانشمندی کی داد دی جاتی ہے اور ان کی تقریر پر رد عمل کا اظہار کرنے والوں کو ان کے انجام سے خبردار کیا جاتا ہے۔ ان تحاریر کی اشاعت میں یقینا ایم کیو ایم کے پریس کے ساتھ خوشگوار تعلقات کا ہاتھ ہو گا۔ اچھے وقتوں میں تو جرائد کے مدیروں کو 90 عزیزآباد بلا کر پریس ایڈوائس دے دی جا تی تھی۔ اب محض دھمکیوں پر گزارا کرنا پڑتا ہے۔

اس جلسے اور الطاف حسین کے خطاب کے بارے میں میرے ذہن میں کئی سوالات اٹھے ہیں۔ میں اپنے اس بلاگ میں ان تمام سوالات کا احاطہ نہیں کرنا چاہتا ہوں۔ میں محظ چند نکات پر روشنی ڈالوں گا۔ جلسے کے آغاز میں الطاف حسین کی تقریر سے قبل جلسے کے حاضرین پر گل پاشی کی گئی۔ سوال پیدا ہوتا ہے کہ اس گل پاشی کا مقصد کیا تھا۔ اس کو سمجھنے کے لئے ایم کیوایم کے نزدیک الطاف حسین کا مقام سمجھنا ضروری ہے۔ الطاف حسین اپنے حامیوں کے نزدیک ایک روحانی شخصیت کا درجہ رکھتے ہیں اور انہیں باقاعدہ پیر صاحب کہا جاتا ہے۔ تقریر سے قبل گل پاشی کا مقصد غالباً حاضرین پر موقعہ کی تقدیس کا تاثر گہرا کرنا تھا۔
اپنے خطاب کے دوران الطاف حسین نے کئی مواقع گنوائے جن میں ان کے مطابق دو قومی نظریہ ٹوٹ گیا تھا۔ اگرچہ ہم بحیثیت قوم ایسے نظریاتی موضوعات پر بات کرنے کے معاملے میں پہلے کی نسبت بہتر قوت برداشت کا مظاہرہ کرتے ہیں پھر بھی الطاف حسین کا طرزتخاطب سوال طلب ہے۔ کیا ہمارے ملک و قوم پر واقعی اتنا نازک وقت آگیا ہے کہ بھتہ خوری اور دہشت گردی کی سیاست کرنے والے میڈیا کے بھونپو میں چیخ چیخ کر دو قومی نظرئے کے ٹوٹنے کااعلان کرتے پھریں۔
ایک من موہنی بات جو الطاف حسین نے اپنے خطاب میں کی وہ یہ کہ آئندہ کسی کی گالی کا جواب گالی سے نہیں دیا جائے گا۔ الطاف بھائی آپ کو گالی دینے کے لئے باہر کے لوگوں کی کیا ضرورت ہے۔ یار دوستوں کو اب بھی لاہور میں ایک پریس کانفرنس یاد ہو گی جس میں ایم کیو ایم کے لیڈر حضرات نے الطاف حسین کے ساتھ وفاداری کا حلف اٹھایا تھا۔ یہ تقریب حلف وفاداری ایم کیو ایم کے مزاج اور ذہنی سطح کی مکمل طور پر عکاسی کرتی ہے۔ اپنی وفاداری کا اظہار کرتے ہوئے پریس کانفرنس میں حاظر ایم کیو ایم کے لیڈران نے جو الفاظ ادا کئے و کچھ یوں تھے:
میں اگر الطاف حسین کے ساتھ غداری کروں تو گویا میں اپنی بہن کے ساتھ زنا کروں۔۔
میں اگر الطاف حسین کے ساتھ غداری کروں تو گویا میں اپنی ماں کے ساتھ زنا کروں۔۔
الطاف بھائی کی ہمہ جہت شخصیت کا احاطہ ایک بلاگ کی سپیس میں کرنا ممکن نہیں ہے۔ لیکن ہمیں یقین ہے کہ وہ اپنے معرکہ آرا بیان دیتے رہیں گے اور ہم بلاگ لکھتے رہیں گے۔